بۇيرەگىن 15 ميلليون تەڭگەگە ساتپاق بولعان قاراعاندىلىق راقىمشىلىققا ىلىكتى

اقتوبە. KAZINFORM - اقتوبە قالالىق سوتىنىڭ سۋدياسى 27 جاستاعى قاراعاندىلىققا زاڭ اياسىندا راقىمشىلىق جاسادى. بۇيرەگىن 15 ميلليون تەڭگەگە ساتپاق بولىپ، اقشانىڭ تەڭ جارتىسىن الىپ جاتقاندا ۇستالعان سوتتالۋشى سوت زالىنان بوساپ شىقتى.

وقيعا بيىل ءساۋىر ايىندا بولدى. قاراعاندى وبلىسى نۇرا اۋدانىنىڭ 27 جاستاعى تۇرعىنى الەۋمەتتىك جەلى ارقىلى بۇيرەك ساتاتىنىن جازىپ، حابارلاما قالدىرادى. ارادا بىرنەشە كۇن وتكەندە اقتوبە قالاسىنان حابارلاسىپ، كەلىسەدى. كەيىن قاراعاندىلىق مەديتسينالىق تەكسەرۋدەن وتۋگە كەلىسىپ، جولعا شىعادى. اقتوبەگە كەلگەن سوڭ تاپسىرىس بەرۋشى ۇسىنعان پاتەرگە ورنالاسىپ، كەلىسىم بويىنشا تەكسەرۋدەن وتەدى. ءسويتىپ اقىرعى كەلىسىمدە، 7,5 ميلليون تەڭگە اقشا الىپ جاتقان كەزدە ۇستالىپ، تەرگەۋ جۇرەدى. وعان قىلمىستىق كودەكستىڭ 24-بابىنىڭ 3-بولىگى، 116-بابىنىڭ 1-بولىگىمەن ايىپ تاعىلدى. الايدا بۇگىن ول راقىمشىلىق جاساۋ تۋرالى ءوتىنىش حات ءتۇسىردى.

- قىلمىستىق كودەكستىڭ 24-بابى 3-بولىگى، 116-بابى 1-بولىگىمەن كوزدەلگەن قىلمىستىق قۇقىقبۇزۋشىلىقتى جاسادى دەپ ايىپتالعان سوتتالۋشى قىلمىستىق كودەكستىڭ 78-بابى 2-بولىگى نەگىزىندە كونستيتۋتسيانىڭ 30 جىلدىعىنا بايلانىستى راقىمشىلىق جاساۋ تۋرالى اكتىسىنە بايلانىستى قىلمىستىق جاۋاپتىلىقتان بوساتىلسىن. قىلمىستىق ءىس جۇرگىزۋ قىلمىستىق-پروتسەستىك كودەكستىڭ 35-بابى 1-بولىگى 3-تارماعى نەگىزىندە توقتاتىلسىن. كۇزەتپەن ۇستاۋ تۋرالى بۇلتارتپاۋ شاراسى جويىلسىن، - دەدى  2-اقتوبە قالالىق سوتىنىڭ سۋدياسى ايان كۋسايەۆ.

ەسكە سالساق، بيىل قاڭتاردا اتىراۋ قالاسىنىڭ 27 جاستاعى تۇرعىنى بۇيرەگىن ساتپاق بولعانى ءۇشىن سوتتالدى. ول جازاسىن بوستاندىقتا ءجۇرىپ وتەيدى.