بىرىككەن اراب امىرلىكتەرى قازاقستاندا امبەباپ بانك اشپاقشى

استانا. KAZINFORM - قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ءماجىلىستىڭ جالپى وتىرىسىندا بىرىككەن اراب امىرلىكتەرىنىڭ كوممەرتسيالىق بانكى قازاقستاندا امبەباپ بانك اشۋدى جوسپارلاپ وتىرعانىن ايتتى.

زاڭناماعا قارجى نارىعىندا تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋگە ارنالعان زاڭ جوباسىن تانىستىرعان اگەنتتىك باسشىسى ءدال قازىر ەلىمىزدە ءۇش حالىقارالىق بانك ءوز فيليالىن اشىپ جاتقانىن ايتتى.

«شەتەلدىك بانكتەردى قازاقستان نارىعىنا اكەلۋ ءۇشىن ءبىز ەلىمىزبەن تىعىز ەكونوميكالىق قارىم-قاتىناسى بار مەملەكەتتەردى زەرتتەدىك. بىرىنشىدەن، ول ازيا مەملەكەتتەرى، اراب مەملەكەتتەرى، تۇركيا، قىتاي، ەۋروپالىق وداق مەملەكەتتەرى. قازىر ءۇش حالىقارالىق قارجى توبى قازاقستاندا بانك اشۋ تۋرالى شەشىم قابىلدادى. ماۋسىم ايىندا وڭتۇستىك كورەيانىڭ BNK Financial Grou دەيتىن قارجىلىق توبىمەن جۇمىس ىستەدىك. ونىڭ اكتيۆتەرى شامامەن 135 ميلليارد دوللار بولادى. ولار قازاقستاندا ءۇش جىل بۇرىن شاعىن نەسيە ورتالىعىن اشقان. ەندى سول ۇيىمعا ليتسەنزيا الماقشى. ماۋسىم ايىندا رۇقسات بەردىك»، - دەدى ول.

ءمادينا ءابىلقاسىموۆا قالعان ەكى بانك اراب ەلدەرىنەن كەلەتىنىن ايتتى.

«جاقىندا قاتار مەملەكەتىنىڭ بانكى «بايتەرەكتەن» Bereke بانكتى ساتىپ الدى. Qatar Investment Authority دەگەن ۇلكەن حولدينگ بار. سونىڭ قۇرامىنداعى بانك ءبىزدىڭ بانك سەكتورىنا كىرمەكشى.
بىرىككەن اراب امىرلىكتەرىنىڭ قارجى نارىعىن رەتتەۋشىلەرىمەن كەزدەسىپ، بانك وكىلدەرىمە جولىقتى. ول ەلدە ADCB Bank دەگەن بار. اكتيۆ كولەمى بويىنشا امىرلىكتەردەگى ءۇشىنشى ءىرى بانك بولىپ ەسەپتەلەدى. قازىر قازاقستاندا يسلامدىق قارجى وپەراتسيالارىن جاسايتىن بانك بار. وسى بانك امبەباپ ليتسەنزيا الماقشى»، - دەدى ول.

اۆتور
ەسىمجان ناقتىباي