بەيرۋتكە جاسالعان جاپپاي سوققى: يزرايلدىڭ كوزدەگەنى كىم ەكەنى ايتىلدى

استانا. KAZINFORM - يزرايل بەيسەنبى كۇنى ءتۇن ورتاسى شاماسىندا بەيرۋتتىڭ وڭتۇستىگىندەگى «حەزبوللا» جەتەكشىسى حاسان ناسراللانىڭ مۇراگەرىنە قارسى كۇشتى اۋە شابۋىلىن جاسادى. بۇل ناسراللا قازا تاپقاننان كەيىن ءبىر اپتادان كەيىن بولدى.

سوققى نىساناسى حاشەم سافي اد-دين بولدى، دەپ حابارلايدى Axios جانە The New York Times.

سونىمەن بىرگە The New York Times ءيزرايلدىڭ ءۇش شەنەۋنىگىنە سىلتەمە جاساي وتىرىپ، سوققى كەزىندە حاشەم سافي اد- دين جەراستى بۋنكەرىندە "حەزبوللانىڭ" باسقا دا جوعارى لاۋازىمدى جەتەكشىلەرىمەن كەزدەسۋگە قاتىسقانىن حابارلادى.

«حەزبوللاعا» جاقىن دەرەككوزدەردىڭ حابارلاۋىنشا، بەيرۋتتىڭ وڭتۇستىگىندەگى حەزبوللانىڭ قورعانى رەتىندە بەلگىلى داحيە ايماعىنا بارلىعى 11 اۋە بومباسى لاقتىرىلعان.

ليۆاننىڭ رەسمي ۇلتتىق اقپارات اگەنتتىگى (NNA): «وسى ۋاقىتقا دەيىن قاتارىنان 10-نان استام سوققى تىركەلدى، بۇل ليۆانداعى يزرايل سوعىسى باستالعاننان بەرگى بەيرۋتتىڭ وڭتۇستىك شەتىندەگى ەڭ كۇشتى شابۋىلداردىڭ ءبىرى بولدى» دەپ حابارلادى.

ليۆان ارمياسىنىڭ مالىمەتىنشە، بەيرۋتتان تىس تاۋلى ايماقتارعا دا سوققى جاسالعان.

سافي اد- ءديننىڭ سوققىدان جاراقات العانى نەمەسە الماعانى ازىرگە بەلگىسىز، يزرايل بۇل تۋرالى ازىرگە تۇسىنىك بەرگەن جوق. «حەزبوللادان» دا ازىرگە ەشقانداي حابار جوق. بەلگىلى بولعانى، بۇل سوققى ءبىر اپتا بۇرىن «حەزبوللا» جەتەكشىسى حاسان ناسراللانى ولتىرگەن سوققىدان دا كۇشتىرەك بولدى.

اتقارۋشى كەڭەستىڭ باسشىسى رەتىندە حاشەم سافي «حەزبوللا» ۇيىمىنىڭ ساياسي ىستەرىن قاداعالايدى.

سافيەددين «حەزبوللانىڭ» اتقارۋشى كەڭەسىن باسقارۋمەن قاتار، توپتىڭ كونسۋلتاتيۆتىك كەڭەسىنىڭ (شۋرا) نەگىزگى مۇشەسى جانە ونىڭ جيھاد كەڭەسىنىڭ باسشىسى قىزمەتىن اتقارادى.

بۇل سوققى يزرايل قورعانىس كۇشتەرى ليۆاننىڭ وڭتۇستىگىندەگى قۇرلىقتاعى وپەراتسيالارىن كەڭەيتكەن كەزدە جاسالدى.

اۆتور
ەركەجان سماعۇلوۆا