بەيرۋت سوعىس ايماعىنا اينالدى: يزرايل ليۆان استاناسىنا تاعى شابۋىل جاسادى

استانا. KAZINFORM - يزرايل اسكەرى ليۆاننىڭ وڭتۇستىگىندەگى قۇرلىق وپەراتسياسىن جالعاستىرىپ جاتىر، سونىمەن بىرگە ەل استاناسى بەيرۋتتەگى «حەزبوللانىڭ» ينفراقۇرىلىمدىق نىساندارىنا زىمىران شابۋىلدارىن جاساۋدا.

BBC ءتىلشىسىنىڭ حابارلاۋىنشا، «بەيرۋت سوعىس ايماعىنا اينالدى».

سەنبىدەن جەكسەنبىگە قاراعان ءتۇنى يزرايل بەيرۋتتىڭ وڭتۇستىك بولىگىنە جاپپاي زىمىران شابۋىلىن جاساپ، «حەزبوللا» ينفراقۇرىلىمىن اتقىلادى.

سوققىلار جارتى ساعات بويى ۇزدىكسىز بىرىنەن سوڭ ءبىرى جالعاستى، دەپ جازادى Reuters كۋاگەرلەرگە سىلتەمە جاساپ.

وت ۇشقىندارى بىرنەشە شاقىرىم قاشىقتىقتان كورىنگەن.

بەيرۋتتاعى BBC ءتىلشىسى قالا ىشىندە كەم دەگەندە التى ۇلكەن جارىلىس بولعانىن، جارىلىستار اراسىندا ۇشقىش درونداردىڭ دىبىسى ەستىلگەنىن حابارلادى.

سوققىلاردىڭ ءبىرى جانارماي قۇيۋ ستانتسياسىنا تيگەن بولۋى مۇمكىن، دەپ جازادى BBC جۋرناليسى، وسى جەردە اسپانعا وت شارى كوتەرىلدى جانە ۆيدەودان ۇلكەن ءورت شىعىپ جاتقانىن كورۋگە بولادى.

ال بەيرۋتتاعى CNN ءتىلشىسى تۇندە بولعان سوققىنى كەيىنگى ۋاقىتتاعى ەڭ ءىرى شابۋىل دەپ سيپاتتادى.

يزرايل قورعانىس كۇشتەرى «بەيرۋت ايماعىنداعى حەزبوللا لاڭكەستەرىمەن بايلانىستى نىساندارعا شابۋىل جاساپ جاتقانىن» راستادى. شابۋىل باستالعانعا دەيىن بىرنەشە ساعات بۇرىن تساحال ءوز جوسپارلارى تۋرالى ەسكەرتۋ جاساپ، «جاقىن ارادا» قاي ايماقتى نىساناعا الاتىنىن كورسەتىپ، 500 مەتر راديۋستا تۇراتىن ادامداردى شۇعىل ەۆاكۋاتسيالاۋعا شاقىردى.

اۋەجاي ماڭىنداعى ايماق سەنبى كۇنى يزرايلدىڭ زىمىران سوققىلارىنا ۇشىراعان بولاتىن.

سەنبى كۇنى تاڭەرتەڭ يزرايل قولباسشىلىعى «حەزبوللانىڭ» تاۋلى ايماقتاردا، قالىڭ توعايلاردا جانە حالىق تىعىز قونىستانعان ايماقتاردا ورنالاسقان «جارىلعىش زاتتارى بار» قارۋ قويمالارىنىڭ جويىلعانىن حابارلادى.

وسىعان دەيىن يزرايل بەيرۋت ورتالىعىنا سوققى جاساپ، 6 ادام قازا تاپقانىن جازدىق.