بىرنەشە پاتەرى بار ادامعا مۇلىك سالىعى قالاي سالىنباق

استانا. KAZINFORM - بىرنەشە پاتەرىنىڭ جيىنتىق قۇنى 450 ميلليون تەڭگەدەن اساتىن ادامدارعا مۇلىك سالىعى 1,5 پايىز بولۋى مۇمكىن بۇل تۋرالى ۇلتتىق ەكونوميكا ۆيتسە-ءمينيسترى ازامات ءامرين ايتتى.

- وسى ورايدا ەڭ باستىسى مۇلىككە ارنالعان سالىق مولشەرلەمەسىنىڭ ارتۋى جايىندا ايتقان ءجون شىعار. ەندى مۇلىك جيىنتىعىنىڭ بارىنە بىردەي قولدانىلاتىن مولشەرلەمەنى ەسەپكە الامىز. ويتكەنى ءبىز ستاتيستيكانى قارادىق. بىزدە مەنشىگىندە 65 پاتەر بار ادام تىركەلگەن. ايتالىق، ءبىر بولمەلى پاتەر 25 ميلليون تەڭگە تۇرسا، وندا قازىر وعان مۇلىك سالىعى قۇنىنىڭ شامامەن 0,5-0,6 كوەففيتسيەنتىن قۇرايدى. ەگەر، 60 پاتەردىڭ ءارقايسىسىن وسى قۇن بويىنشا الساق، وندا سوماسى 0,6 پايىزدىق مولشەرلەمەمەن بولادى، - دەدى ۆيتسە-مينيستر سەناتتا ءوتىپ جاتقان سالىق ساياساتىنىڭ جانە سالىقتىق اكىمشىلەندىرۋدى جەتىلدىرۋدىڭ وزەكتى ماسەلەلەرىنە ارنالعان دوڭگەلەك ۇستەل وتىرىسىندا.

ونىڭ اتاپ وتۋىنشە، اتالعان پاتەرلەردىڭ جيىنتىق قۇنى 450 ميلليون تەڭگەدەن اسىپ كەتەدى. سوعان وراي سالىناتىن سالىق مولشەرلەمەسى 0,6 ەمەس 1,5 پايىز بولۋى ءتيىس.

- سوندىقتان جيىنتىعىن ەسەپتەگەن كەزدە بارلىق مۇلىكتىڭ مولشەرلەمەسى ەندىگى ۋاقىتتا 1,5 پايىز بولىپ، ارتادى. بۇل مۇلىكتەردى ساتىپ الۋعا مۇمكىندىگى بار ادامعا جوعارى سالىق سالىنۋى ءتيىس، - دەدى ازامات ءامرين.

بۇعان دەيىن جاڭا سالىق كودەكسىنىڭ ەسكىسىنەن قانداي ەرەكشەلىگى بار ەكەنىن جازعان ەدىك.

اۆتور

مارلان جيەمباي