بىرلىك كۇنى: Spectrum مەكتەبىندە جارمەڭكەدەن جينالعان قاراجات مۇعالىمنىڭ ەمىنە بەرىلدى
استانا. KAZINFORM - بىرلىك كۇنىنە وراي ەلوردانىڭ Spectrum حالىقارالىق مەكتەبىندە ءداستۇرلى «Unity Day» قايىرىمدىلىق جارمەڭكەسى ءوتتى. وندا 800 گە جۋىق قوناق مەكتەپ اۋلاسىندا باس قوسىپ، الەمنىڭ 30 دان استام ەلىنىڭ مادەنيەتى مەن تاعامدارى تانىستىرىلدى.
Spectrum حالىقارالىق مەكتەبىندە 30 دان اسا ەلدەن كەلگەن وقۋشى ءبىلىم الادى. اتا- انالار مەن وقۋشىلار ءوز ەلدەرى بويىنشا ۇلتتىق پاراد ۇيىمداستىرىپ، مادەنيەتتەرىن تانىستىرا الدى. ال كونسەرتتىك باعدارلامالار، سان الۋان ۇلتتىق تاعامدار، شەبەرلىك ساعاتتارى مەن مادەني كورمەلەر جانە مالديۆ ارالدارىنا 5 ادامعا ارنالعان جولداما ۇتىسى قوناقتاردىڭ قىزىعۋشىلىعىن تۋدىردى.
سونىمەن بىرگە، فەستيۆال اياسىندا قايىرىمدىلىق جارمەڭكەسى ۇيىمداستىرىلدى جانە جينالعان 4,5 ميلليون تەڭگە قاراجات «ءبىلىم- يننوۆاتسيا» قورىنىڭ مۇعالىمى باقتيار وماروۆتىڭ باۋىر ترانسپلانتاتسياسىنا بەرىلەدى.
− بۇگىن Spectrum International School قازاقستانداعى مادەني الۋان تۇرلىلىك پەن ىنتىماقتى بەينەلەيتىن ماڭىزدى مەرەكە - بىرلىك كۇنىن اتاپ وتۋدە. ءبىزدىڭ مەكتەپتە 30 دان استام ەلدەن كەلگەن بالالار ءبىلىم الادى جانە ءبىز ءارتۇرلى مادەنيەتتەردى، داستۇرلەر مەن تىلدەردى قۇرمەتتەپ، قولدايتىن ورتا قالىپتاستىرىپ وتىرعانىمىزعا ماقتانامىز. بۇل كۇن ءبىزدىڭ ءار ءتۇرلى بولعانىمىزعا قاراماستان، ادامگەرشىلىك، ءوزارا قۇرمەت جانە بىرلىككە ۇمتىلۋ بىرىكتىرەتىنىن كورسەتەدى. ال قايىرىمدىلىق جارمەڭكەسى وقۋشىلارىمىزعا بىلىممەن قاتار، ەمپاتيا، الەۋمەتتىك جاۋاپكەرشىلىك جانە كومەك كورسەتۋگە دايىن بولۋ سياقتى ماڭىزدى قاسيەتتەردى دامىتۋعا مۇمكىندىك بەرەتىنىنە سەنىمدىمىز. بۇل - جاھاندىق ويلاۋ قابىلەتى بار كوشباسشىلاردى تاربيەلەۋدىڭ شىنايى ماقساتى، − دەدى مەكتەپ ديرەكتورى دجوناتان فەرەيرا.
فەستيۆالدە ءۇندىستان، پاكىستان، سەربيا، ساۋد ارابياسى، وزبەكستان، وڭتۇستىك كورەيا، يراك، يندونەزيا، مىسىر جانە گرۋزيانىڭ ەلشىلىكتەرى ءوز مەملەكەتتەرىن رەسمي تۇردە تانىستىردى.
سونىمەن قاتار، مادەنيەت پەن ىنتىماقتاستىق رۋحىندا قازاقستان، ا ق ش، جاپونيا، تۇركيا، فرانسيا، قىتاي، ۇلى بريتانيا، گەرمانيا، يتاليا، يسپانيا، مەكسيكا، برازيليا، بەلگيا، اۋستريا، مالايزيا، ارگەنتينا، ازەربايجان، قاتار، كەنيا، جاڭا زەلانديا، بەلارۋس سياقتى ەلدەر تانىستىرىلدى.
ايتا كەتەيىك، 1-مامىر مەرەكەسىنىڭ قۇرمەتىنە بۇگىن ەلوردادا زياتكەرلىك ۆيكتورينالار مەن كورمەلەردەن باستاپ ءتۇرلى كونسەرتتەر مەن جارىستارعا دەيىن ونداعان مادەني- سپورتتىق ىس- شارا ءوتىپ جاتىر.
قازاقستان حالقى اسسامبلەياسىنىڭ 30 جىلدىعىنا وراي، ەلىمىزدىڭ بارلىق وڭىرىندە «بىرلىك جۇگىرىسى - 2025» رەسپۋبليكالىق مارافونى ءوتتى.
