بىرەۋ قارىزعا اقشا سۇراسا، قالاي باس تارتۋعا بولادى؟ 3 ءادىس
بىرەۋ سىزدەن قارىزعا اقشا سۇراسا، اركەز ءبىر سەناري قايتالانا ما؟ ونىڭ بۇل وتىنىشىنەن باس تارتۋعا ۇيالاسىز، ءوزىڭىزدى «ول اقشانى قايتارادى» دەپ كوندىرەسىز، سەبەبى وعان «جوق» دەسەڭىز، ونىڭ سىزدەن كوڭىلى قالادى دەپ ويلايسىز نەمەسە ءوزىڭىزدى ىڭعايسىز سەزىنەسىز.

سوندىقتان كەلىسە سالعان دۇرىس دەن سانايسىز. باس تارتا الماۋ، ءوزىڭىزدى بىرەۋگە مىندەتتى سەكىلدى نەمەسە كىنالى سەزىنۋ، باسقا ادام ءۇشىن ءوز جايلىلىعىڭىز بەن رەسۋرسىڭىزدى قيۋ - مۇنىڭ ءبارى جەكە شەكارا قويا الماۋدى كورسەتۋى مۇمكىن. ەگەر بىرەۋگە قارىزعا اقشا بەرگىڭىز كەلمەسە نەمەسە مۇمكىندىگىڭىز بولماسا، قالاي باس تارتۋعا بولادى؟
بىرەۋ سىزدەن قارىزعا اقشا سۇرادى:
ەگەر ءسىز باسقا ادامعا كومەكتەسە الامىن دەگەن قۋانىش سەزىمىندە بولساڭىز جانە ودان قانداي دا ءبىر جاۋاپتى ارەكەت كۇتپەسەڭىز، ويلانباستان وزىڭىزگە قولايلى سومانى بەرە بەرىڭىز.
ەگەر «جوق» دەپ ايتۋعا ىڭعايسىزدانساڭىز، «ەگەر باس تارتسام، مەن جايلى نە ويلايدى»، «رەنجىپ قالسا نە ىستەيمىن»، «قاجەت بولعان كەزدە ماعان كومەكتەسپەي قويماي ما» دەگەن سەكىلدى ويلار مازالاسا، بۇل دۇرىس ەمەس ارەكەتتىڭ بەلگىسى. بۇل جاعدايدا اقشا شىنىمەن بەرگىڭىز كەلمەسە، باس تارتىپ ۇيرەنۋ كەرەك.
نەگىزىندە جەكە شەكاراسى ساقتالعان جانە وزىنە سەنىمدى ادامدار قارىزعا اقشا بەرۋدەن باس تارتۋعا سەبەپ ىزدەمەيدى، ولار جاي «جوق» دەپ ايتا الادى جانە ول ءۇشىن وزدەرىن كىنالى سەزىنبەيدى. ەگەر ءسىز دە سولاي ءوزىڭىزدى ىڭعايسىز سەزىنبەي، وتىنىشتەن باس تارتىپ ۇيرەنگىڭىز كەلسە، تومەندەگى كەڭەستەرگە كوز جۇگىرتىڭىز:
1-كەڭەس: ادامعا ەمەس، وتىنىشكە «جوق» دەڭىز
بۇل جاي عانا ءوتىنىش. وعان كەلىسۋ مىندەتتى ەمەس. سىزدەن تەك مۇمكىندىك جايلى سۇراپ تۇر. بۇل باس تارتساڭىز، مىندەتتى تۇردە ونىمەن قارىم- قاتىناسىڭىز بۇزىلادى دەگەن ءسوز ەمەس. ءسىز تەك ءدال سول ساتتە نەمەسە سول ادىسپەن كومەكتەسە المايسىز.
2-كەڭەس: ءوز ۇستانىمىڭىزدى ساتپاڭىز
كەي ادامدار مانيپۋلياتسيا جاساپ، ءسىزدى وزىنە ءتيىمدى جاققا اۋدارعىسى كەلۋى مۇمكىن. ولار اياۋشىلىق سەزىمىن وياتۋعا تىرىسادى نەمەسە رەنجىپ قالادى. بەرىلمەڭىز. ءوز ۇستانىمىڭىزدى ساقتاڭىز. بۇل سىزگە نە ءۇشىن ماڭىزدى ەكەنىن ويلاڭىز.
3-كەڭەس: جاۋاپ بەرۋگە ءبىر كۇن ۋاقىت سۇراڭىز
بۇل ۋاقىت سىزگە ويلانۋ ءۇشىن قاجەت. ونىمەن قالاي سويلەسەتىنىڭىزدى ويلاڭىز.
جەكە شەكارانى ساقتاي وتىرىپ، بىلاي باس تارتۋعا بولادى:
«ماعان ءبىزدىڭ قارىم-قاتىناسىمىز قىمبات، مەن ونى قۇرتقىم كەلمەيدى. بۇرىنعى دوستارىممەن اقشاعا قاتىستى جاعىمسىز تاجىريبە باسىمنان وتكەن. ونى قايتالاعىم كەلمەيدى»؛
«مەنىڭ ومىرلىك ۇستانىمىم - ەشكىمنەن قارىز الماۋ جانە ەشكىمگە قارىز بەرمەۋ»؛
نە ءۇشىن قارىزعا اقشا بەرمەيتىنىڭىزدى شىنايى ايتۋ. مىسالى، اقشاڭىز بىرەۋدە تۇرسا، بۇل سىزگە ىڭعايسىزدىقتار تۋدىراتىنىن جانە ونى قالاعان ۋاقىتىڭىزدا قولدانا المايتىنىڭىزدى ايتىڭىز.
ءسوزسىز، شۇعىل اقشا كەرەك بولاتىن جاعدايلار بولادى. ءوزىڭىزدى تىڭداڭىز، قانشا بەرە الاتىنىڭىزدى ويلاڭىز: قانشا اقشا جوعالتۋعا دايىنسىز، سونشا بەرىڭىز. ارينە، كوپشىلىك ادام قارىزعا العان اقشاسىن قايتارادى، ءبىراق ءارتۇرلى جاعداي بولادى، سوندىقتان وسى ءپرينتسيپتى ۇستانعان ءجون.