بۇگىننەن باستاپ اقاۋى بار اقىلى جول ۋچاسكەسىندە ءجۇرۋ تەگىن بولادى

استانا. قازاقپارات - 2025 -جىلعى 15- قىركۇيەكتەن باستاپ رەسپۋبليكالىق ماڭىزى بار اقىلى اۆتوجولداردا تولەم ەرەجەلەرى وزگەردى، دەپ حابارلايدى «قازاۆتوجول» ۇ ك باسپاءسوز قىزمەتى.

كومپانيا مالىمەتىنشە، قازىر ەلىمىزدە بارلىعى 27 اقىلى جول بار.

- اقىلى اۆتوجولدا جول قوزعالىسى قاۋىپسىزدىگىنە اسەر ەتەتىن جانە جوندەۋدى تالاپ ەتىپ تۇرعان جول ۋچاسكەسى بولسا، ءدال سول ارالىق ءۇشىن جوندەۋ جۇمىستارى تولىق اياقتالعانعا دەيىن تولەماقى الىنبايدى. مىسالى، ەگەر اقىلى جول ۋچاسكەسىنىڭ جالپى ۇزىندىعى 100 شاقىرىمدى قۇراسا، ونىڭ 5 شاقىرىمى جوندەۋدى تالاپ ەتسە، وندا جول بويىنداعى اقاۋلار جويىلعانعا دەيىن جۇرگىزۋشىلەر تەك 95 شاقىرىم جول ءۇشىن عانا اقى تولەيدى، - دەپ ءتۇسىندىردى «قازاۆتوجول».

ۇلتتىق وپەراتور جولداردىڭ جاعدايىن ۇنەمى باقىلايدى. ءار جۇرگىزۋشى اقاۋ تۋرالى تاۋلىك بويى جۇمىس ىستەيتىن 1403 نومىرىنە قوڭىراۋ شالىپ، حابارلاي الادى. جاڭا ەرەجە رەسپۋبليكالىق جانە حالىقارالىق ماڭىزى بار بارلىق اقىلى جولدارعا قولدانىلادى.

بۇدان بۇرىن جازدا قازاقستاننىڭ اقىلى جولدارىمەن 24 ميلليوننان استام ساپار جاسالعانى تۋرالى جازعانبىز.