بۇگىن - قازاقستان قارۋلى كۇشتەرىندە تانكيستەر كۇنى
استانا. KAZINFORM - قازاقستان قارۋلى كۇشتەرىندە 15- قىركۇيەك - بروندى تانك تەحنيكاسىمەن قىزمەتى تىعىز بايلانىستى اسكەري قىزمەتشىلەر مەن ارداگەرلەردىڭ مەرەكەسى - تانكيستەر كۇنى رەتىندە اتاپ وتىلەدى.
بۇل تەحنيكا قۇرلىق اسكەرلەرىنىڭ قۋاتى مەن سوققى كۇشىنىڭ سيمۆولىنا اينالعان، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.
مەرەكەنىڭ تاريحى ەكىنشى دۇنيەجۇزىلىك سوعىس جىلدارىنا كەتەدى. 1941-جىلى شىمكەنت تەمىرجولى ەڭبەككەرلەرىنىڭ باستاماسىمەن رەسپۋبليكادا تانك كولونناسىن قۇرۋ ءۇشىن قارجى جيناۋ جۇمىستارى ۇيىمداستىرىلدى. ناتيجەسىندە، 1942-جىلدىڭ 15-قىركۇيەگىندە مايدانعا «قازاقستان كومسومولى» دەگەن جازۋى بار 46 تانك اتتاندى. ولار ماڭىزدى شايقاستارعا قاتىسىپ، بەرلينگە دەيىن جەتكەن. بۇگىندە تانك اسكەرى اعا بۋىننىڭ داڭقتى داستۇرلەرىن جالعاستىرۋدا.
قۇرلىق اسكەرلەرىنىڭ باس قولباسشىسى گەنەرال- مايور مەرەكە كوشەكبايەۆتىڭ ايتۋىنشا، جىل سايىن تانكيستەردىڭ كاسىبيلىگى مەن شەبەرلىگى ارتىپ، اتىس تەحنيكاسى مەن ۇرىس جۇرگىزۋ تاكتيكاسى جەتىلدىرىلىپ كەلەدى.
ارميا گەنەرالى ساعادات نۇرماعامبەتوۆ اتىنداعى اسكەري كوللەدجدە تانكيستەر كۇنىنە ارنالعان سالتاناتتى ءىس- شارا ءوتتى. وعان قورعانىس مينيسترلىگىنىڭ باسشىلىعى، قۇرلىق اسكەرلەرىنىڭ قولباسشىلىعى، ارداگەرلەر، اسكەري قىزمەتشىلەر مەن كۋرسانتتار قاتىستى.
قورعانىس ءمينيسترى اتىنان جينالعانداردى ونىڭ ورىنباسارى گەنەرال- مايور شايح-حاسان جازىقبايەۆ قۇتتىقتادى. ءوز سوزىندە ول ارداگەرلەر مەن قازىرگى تانكيستەردىڭ ەلدىڭ قورعانىس قابىلەتىن نىعايتۋداعى ءرولىن اتاپ ءوتتى.
- قازىرگى قاقتىعىستار تانك اسكەرلەرىنىڭ ءالى دە ۇرىس الاڭىنداعى شەشۋشى كۇشتەردىڭ ءبىرى ەكەنىن كورسەتۋدە. تانكيستەر - بۇل كۇشتىڭ، ماشىقتىڭ جانە ۇيلەسىمدىلىكتىڭ سيمۆولى، - دەدى قورعانىس ءمينيسترىنىڭ ورىنباسارى.
مەرەكە اياسىندا ارداگەرلەر مەن اسكەري قىزمەتشىلەرگە العىس حاتتار مەن ماراپاتتار تابىستالدى. مەرەكەلىك ءىس- شارا 68665 اسكەري ءبولىمى قۇرمەت قاراۋىلى روتاسىنىڭ دەفيلەسى جانە قارۋلى كۇشتەر ۇلتتىق اسكەري-پاتريوتتىق ورتالىعى ورتالىق ءانسامبلىنىڭ مەرەكەلىك كونتسەرتتىك باعدارلاماسىمەن اياقتالدى.
وسىعان دەيىن قورعانىس مينيسترلىگىنىڭ اسكەري-كلينيكالىق گوسپيتالى زاماناۋي جابدىقتارمەن تولىققانى تۋرالى جازدىق.
