بۇگىن - مەملەكەتتىك رامىزدەر كۇنى

استانا. KAZINFORM - بۇگىن - مەملەكەتتىك رامىزدەر كۇنى. بيىل مەملەكەتتىگىمىزدىڭ سيمۆولدارىنىڭ قابىلدانعانىنا 32 جىل تولدى.

1992 -جىلدىڭ باسىندا مەملەكەتتىك ءۇش نىشان - تۋ، ەلتاڭبا جانە ءانۇرانىمىزدى تاڭداۋ ءۇشىن جوعارعى كەڭەس پرەزيديۋمى جۇمىس توبىن قۇرىپ، ارناۋلى شىعارماشىلىق كوميسسيا تاعايىندادى. ونىڭ قۇرامىنا سالىق زيمانوۆ، ەربول شايمەردەنوۆ، سەرىكبولسىن ءابدىلدين، سەرىك ءابدراحمانوۆ جانە تاعى باسقا قايراتكەرلەر كىردى. وسىدان كەيىن بۇكىل قازاقستان كولەمىندە ەلتاڭبا، تۋ، ءانۇران نۇسقالارىنا كونكۋرس جاريالاندى.

ءبىر عانا تۋدىڭ وزىنە 600 ادامنان 1200 نۇسقا تۇسسە، ەلتاڭبانىڭ 245 جوباسى، ءانۇراننىڭ 750 ۇلگىسى بايقاۋعا قاتىستى.

ەستەتيكالىق سيپاتىمەن دە، تاريحي، ساياسي، ەكونوميكالىق سيمۆوليزمگە سايكەس كەلۋى بويىنشا دا ۇزدىك تۋىندى ۇسىنعان بايقاۋ جەڭىمپازدارىن ءقازىر حالىق مەملەكەتتىك نىشان اۆتورلارى رەتىندە تانيدى.

ولار: تۋ اۆتورى - شاكەن نيازبەكوۆ. ەلتاڭبا اۆتورلارى - جانداربەك مالىبەكوۆ پەن شوتا ءۋاليحانوۆ.

سونىمەن قاتار تاۋەلسىز قازاقستاننىڭ تۇڭعىش ءانۇران اۆتورلارى رەتىندە - اۋەنىن جازعان مۇقان تولەبايەۆ، ەۆگەني برۋسيلوۆسكي مەن لاتيف ءحاميديدىڭ ەسىمى تاريحتا قالدى. ۇزدىك ماتىنگە جاريالانعان بايقاۋدا مۇزافار الىمبايەۆ، قادىر مىرزاليەۆ، تۇمانباي مولداعاليەۆ جانە جادىرا دارىبايەۆا جەڭىپ شىقتى. كەيىن، ياعني، 2006 -جىلى جاڭا مەملەكەتتىك گيمن قابىلداندى. تاڭداۋ ەل اراسىندا كەڭىنەن تانىمال «مەنىڭ قازاقستانىم» انىنە تۇسكەن ەدى.

1956 -جىلى سازگەر ءشامشى قالداياقوۆ پەن جۇمەكەن ناجىمەدەنوۆتىڭ شىعارماشىلىق تاندەمىنەن شىققان تۋىندىنىڭ باستاپقى ءماتىنىن تۇڭعىش پرەزيدەنت نۇرسۇلتان نازاربايەۆ وڭدەدى.

2006 -جىلى 6-قاڭتاردا قازاقستان پارلامەنتى جاڭا مەملەكەتتىك گيمنىن بەكىتتى. ءبىرىنشى رەت ول 2006 -جىلى 11-قاڭتاردا مەملەكەت باسشىسىنىڭ سالتاناتتى ۇلىقتاۋ راسىمىندە ورىندالدى.

2007 -جىلى 4-ماۋسىمدا قابىلدان «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭعا سايكەس جىل سايىن 4-ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.

ايتا كەتەرلىگى، وسى جىلدىڭ 15-ناۋرىزىندا اتىراۋدا وتكەن ۇلتتىق قۇرىلتايىندا مەملەكەت باسشىسى قاسىم-جومارت توقايەۆ قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالاناتىندىعىن ايتقان ەدى.

«ەلتاڭبامىزعا قاتىستى سىني پىكىرلەر ايتىلىپ قالادى. ونى كەڭەس زامانىنداعى گەربكە ۇقساتىپ جاتادى. تىم ەكلەكتيكالىق، كۇردەلى دەيدى. مۇنداي ويدى ەل ىسىنە بەي-جاي قارامايتىن بەلسەندى ازاماتتار عانا ەمەس، ماماندار دا ايتىپ ءجۇر. ورىندى پايىمدار ەسكەرۋسىز قالماۋى كەرەك. ورتاق كەلىسىمگە كەلگەن جاعدايدا ارناۋلى كوميسسيا قۇرۋعا بولادى. بۇل كوميسسيا ماسەلەنى جان-جاقتى قاراستىرىپ، قوعامدىق تالقىلاۋ وتكىزەدى. سوسىن قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالانادى»، - دەدى قاسىم-جومارت توقايەۆ.

ءسال كەيىنىرەك قارجى ءمينيسترى ءمادي تاكيەۆ ەلتاڭبانى اۋىستىرۋعا قاتىستى وڭ شەشىم قابىلدانعان جاعدايدا عانا شىعىستارىنا بايلانىستى قالعان جايتتار قاراستىرىلاتىندىعىن اتاپ ءوتتى.

ال مەملەكەتتىك كەڭەسشى ەرلان قارين Jibek Joly تەلەارناسىنداعى «ۋادە» باعدارلاماسىنا بەرگەن سۇحباتىندا مەملەكەت باسشىسى ءوز سوزىندە «ەلتاڭبانى اۋىستىرۋعا قاتىستى ءارتۇرلى پىكىردىڭ ايتىلاتىندىعىن، ەگەر قاجەت بولسا، كوميسسيا قۇرىپ تالقىلاۋ قاجەتتىگىن، وڭ شەشىم قابىلدانسا بايقاۋ جاريالاۋ كەرەكتىگىن» عانا ايتقانىن العا تارتادى.

«مەملەكەت باسشىسى ەلتاڭبانى مىندەتتى تۇردە اۋىستىرۋ كەرەك دەگەن پىكىر ايتقان جوق. وكىنىشكە وراي، كوپشىلىگى مالىمدەمەنى دۇرىس قارامايدى، وقىمايدى، تىڭدامايدى. شىن مانىسىندە، پرەزيدەنت ول جەردە قوعامدا كەيبىر ازاماتتىڭ ەلتاڭباعا قاتىستى ءارتۇرلى پىكىر ايتىپ جۇرگەنىن، ماسەلەگە قاتىستى ۇستانىم قالىپتاسسا، وندا اشىق تۇردە تالقىلاۋ» كەرەكتىگى تۋرالى پىكىر ايتتى»، - دەيدى ول.

اۆتور

مارلان جيەمباي