بۇگىن - مەديتسينا قىزمەتكەرى كۇنى

استانا. KAZINFORM - بۇگىن قازاقستاننىڭ مەديتسينا سالاسىنىڭ وكىلدەرى كاسىبي مەركەلەرىن اتاپ وتەدى. ەلىمىزدە ماۋسىمنىڭ ءار ءۇشىنشى جەكسەنبىسى - مەديتسينا قىزمەتكەرلەرىنىڭ كۇنى. بۇل كۇندى اتاپ ءوتۋ ق ر پرەزيدەنتىنىڭ 1998 -جىلعى جارلىعىمەن بەلگىلەندى.

وسىعان وراي اقوردادا مەملەكەت باسشىسى ەلىمىزدىڭ مەديتسينا قىزمەتكەرلەرىن كاسىبي مەرەكەسىمەن قۇتتىقتادى.

پرەزيدەنتتىڭ جارلىعىمەن وتاندىق مەديتسينانى دامىتۋعا ەلەۋلى ۇلەس قوسقان ماماندار ماراپاتتالدى.

- راسىندا، دارىگەر بولۋ - جۇرەكتىڭ ءىسى. بۇل - ەكىنىڭ ءبىرى اياق باسا بەرمەيتىن جۇگى اۋىر، كۇردەلى جۇمىس. مەديتسينا قىزمەتكەرلەرى - ۇلت ساۋلىعىنىڭ ساقشىلارى، ەڭ قادىرلى ماماندىق يەلەرى. اسىرەسە، جاھاندىق ىندەت، ياعني كوۆيد كەزىندە بۇكىل ەل دارىگەرلەردىڭ ادال قىزمەتىنە كۋا بولدى. كۇردەلى كەزەڭدە مەديتسينا ماماندارى مىڭداعان ادامدى قۇتقارىپ قالدى. ءبىز ابزال جانداردىڭ تاباندى ەڭبەگىن باعالايمىز. ولاردىڭ قايسارلىعىن ماقتان تۇتامىز. «ءبىر ادامنىڭ ءومىرىن قۇتقارۋ بارشا ادامزاتتى قۇتقارۋمەن بىردەي». دارىگەرلەر وتا كەزىندە، اۋرۋحانا پالاتاسىندا كۇن سايىن ەرلىك جاسايدى دەسەك، ارتىق بولمايدى. جەدەل جاردەم كولىگىندە ادام ومىرىنە اراشا تۇسەتىن ساتتەر بولادى. سوندىقتان سىزدەر، قۇرمەتتى مەديتسينا قىزمەتكەرلەرى، بەيبىت كۇننىڭ باتىرلارى دەگەن اتقا لايىقسىزدار. مەن بارشا مەديتسينا ماماندارىنا زور ريزاشىلىعىمدى بىلدىرەمىن، - دەدى قاسىم-جومارت توقايەۆ.

بۇگىندە ەلىمىزدىڭ دەنساۋلىق ساقتاۋ سالاسىندا 380 مىڭعا جۋىق ادام جۇمىس ىستەيدى. ءار ماماننىڭ ەڭبەگى وراسان زور. ۇلت ساۋلىعىن ساقتاۋعا بۇكىل ءومىرىن ارناعان تۇتاس اۋلەتتەر بار.

جىل سايىن 45 مەملەكەتتەن شامامەن 10 مىڭ ادام قازاقستانعا ەمدەلۋ ءۇشىن ارنايى كەلەدى. بۇل ەلىمىزدەگى دارىگەرلىك كومەكتىڭ ساپاسى جوعارى ەكەنىن كورسەتەدى.

ايتا كەتەيىك، ەلىمىزدە ءورتاشا ومىر ءسۇرۋ ۇزاقتىعى 75,4 جاسقا جەتتى. مەديتسينالىق نىساندار قاتارى كوبەيىپ، تەحنيكالىق بازاسى نىعايتىلىپ جاتىر.

- بەس جىلدا 800 گە جۋىق دەنساۋلىق ساقتاۋ نىسانى، ياعني كوپتەگەن ەمحانا مەن اۋرۋحانا سالىندى. بۇل جۇمىس توقتامايدى، مەملەكەت الداعى ۋاقىتتا دا ينفراقۇرىلىمدى دامىتا بەرەدى. ۇلت ساۋلىعىن جاقسارتۋ العاشقى مەديتسينالىق كومەكتەن باستالادى. ەلىمىزدە اۋىلدىق جەردەگى مەديتسينا جۇيەسىن جاڭعىرتۋعا ارنالعان ۇلتتىق جوبا جۇزەگە اسىرىلىپ جاتىر. بۇگىندە 469 عيمارات بوي كوتەردى. جىل سوڭىنا دەيىن تاعى 186 نىسان سالىنادى. اۋداندىق اۋرۋحانالار زامانعا ساي قۇرالدارمەن جابدىقتالىپ جاتىر، - دەدى پرەزيدەنت.

پرەزيدەنتتىڭ تاپسىرماسىمەن بىلتىردان باستاپ «قازاقستاننىڭ ەڭبەك سىڭىرگەن دارىگەرى» اتاعى بەرىلە باستادى. بۇل - مەديتسينا قىزمەتكەرلەرىنە دەگەن ايرىقشا قۇرمەتتىڭ بەلگىسى. وسى ورايدا اباي بايگەنجين ەلىمىزدە العاش بولىپ «قازاقستاننىڭ ەڭبەك سىڭىرگەن دارىگەرى» اتاعىن الدى.