بۇگىن جىراۋ، جىرشى جامبىل جابايەۆ دۇنيەگە كەلگەن

استانا.قازاقپارات - 179 جىل بۇرىن (1846-1945) اقىن، جىراۋ، جىرشى جامبىل جابايەۆ دۇنيەگە كەلگەن.

قازىرگى جامبىل وبلىسى جامبىل تاۋىنىڭ ەتەگىندە تۋعان. جاسىنان ولەڭ- جىرعا قانىپ وسكەن، ءوز اناسى ۇلداننىڭ اقىندىق تالانتىن بويىنا سىڭىرگەن، «مەنىڭ ءپىرىم - ءسۇيىنباي.. .» دەپ جامبىلدىڭ ءوزى جىرعا قوسقانداي، ءسۇيىنباي ارون ۇلى سياقتى جىر داڭعىلىنان ءتالىم- تاربيە العان.

جامبىل 1919 -جىلى جەتىسۋ حالىق اقىندارى باس قوسقان سلەتكە قاتىستى. 1934 -جىلى رەسپۋبليكالىق ونەر شەبەرلەرىنىڭ تۇڭعىش سلەتىندە جىر تولعاپ، تاعى ءبىر كوزگە ءتۇستى. «زامانا اعىمى»، «بەلسەندىلەرگە»، «قازاقستان تويىنا»، «جاستار الدىنداعى ءسوز» سياقتى ارناۋ، تولعاۋلارى وسى تۇستا جىرلاندى. ونىڭ ۇزدىك شىعارمالارى 40 تان استام شەت ەلدەر تىلدەرىنە اۋدارىلدى. ۇلى جىراۋ قازاق حالقىن، ونىڭ پوەزياسىن بۇكىل الەمگە جاريا ەتتى.

1938 -جىلى جامبىلدىڭ شىعارماشىلىق ونەرىنىڭ 75 جىلدىعىن تويلاعاندا، وعان الەمنىڭ ءار تۇكپىرىنەن قۇتتىقتاۋلار كەلدى. رومەن روللان، مارتين اندەرسەن، نەكسە، كاتارينا سۋساننا پريچارد سياقتى اتاقتى سۋرەتكەرلەر جامبىل پوەزياسىنا وتە جوعارى باعا بەردى. جامبىل تۋرالى جۇزدەگەن ولەڭ-جىرلار جازىلدى. ⅩⅩ عاسىرداعى حالىق اقىندارىنا جامبىلدىڭ اسەرى وتە زور بولدى. بۇل قاتاردا كەنەن ازىربايەۆ، ۇمبەتالى كارىبايەۆ، ءابدىعالي ساريەۆ، نارتاي بەكەجانوۆ، دوسكەي الىمبايەۆ، سايادىل كەرىمبەكوۆ، ورىنباي تايمانوۆ سياقتى بەلگىلى يمپروۆيزاتورلار بار. 1941-جىلى ستاليندىك (كەيىن ك س ر و مەملەكەتتىك) سىيلىعىنىڭ لاۋرەاتى اتانعان. I سايلانعان قازاق ك س ر جوعارعى كەڭەسىنىڭ دەپۋتاتى، ك س ر و جانە قازاقستان جازۋشىلار وداعىنىڭ مۇشەسى بولدى. جامبىلدىڭ ەسىمى قازاقستاننىڭ ءبىر وبلىسىنا، بىرنەشە اۋداندارعا، ءبىرقاتار ەلدى مەكەندەرگە، مەكەمەلەر مەن وقۋ ورىندارىنا، ونەر وردالارىنا، مەكتەپتەرگە، كوشەلەرگە بەرىلگەن. قازاق حالقى جامبىلدىڭ 100 جىلدىق، 125 جىلدىق، 150 جىلدىق، 160 جىلدىق تويلارىن حالىقارالىق دەڭگەيدە سالتاناتتى تۇردە اتاپ ءوتتى.