بۇگىن بريۋسسەلدە «دوس- مۇقاسان» فيلمى كورسەتىلەدى

  بۇگىن، 26- قىركۇيەك كۇنى بريۋسسەلدىڭ Cinema Palace كينوتەاترىندا «دوس- مۇقاسان» فيلمى كورسەتىلەدى، دەپ حابارلايدى قازاقپارات ءتىلشىسى.

«فيلم مەملەكەت قولداۋىمەن ءتۇسىرىلىپ، 2022 -جىلى كينوپروكاتقا شىقتى. بۇگىندە كارتينا ونلاين پلاتفورمالاردا ورنالاسقان. بريۋسسەلدەگى كورسەتىلىمدى قازاقستاننىڭ بەلگياداعى ەلشىلىگى ۇيىمداستىرىپ وتىر»، - دەدى مادەنيەت جانە اقپارات مينيسترلىگىنەن اگەنتتىك تىلشىسىنە.

ايتا كەتەيىك، فيلمدى ەفرات ءشارىپوۆتىڭ سەناريى بويىنشا «Aray Media Group» ستۋدياسى تۇسىرگەن. پروديۋسەرى - ايگۇل بايبەك، ال مۋزىكالىق درامانىڭ رەجيسسەرى - ايدىن ساحامان.

كينوجوباعا ق ر مادەنيەت جانە سپورت مينيسترلىگى مەن ۇلتتىق كينەماتوگرافيانى قولداۋ مەملەكەتتىك ورتالىعى قولداۋ بىلدىرگەن.

اكتەرلىك قۇرام پورترەتتىك ۇقساستىق بويىنشا تاڭدالعان. باستى رولدەردى اكتەر مەيىرعات امانگەلدين، ماقسات ءسابيتوۆ، ەلدوس شايكەنوۆ، سايات ماقۇلبايەۆ، ايعانىم ساعىنبايەۆا، نيكيتا پوگودايەۆ، نۇرعيسا قۋانىشباي ۇلى جانە ءابىلمانسۇر سەرىكوۆ سومدادى. تانىمال بلوگەرلەر مەن ۆاينەرلەر ارتۋر اسقار ۇلى مەن زۋحرا سايپي دە دەبيۋتتىك ءرولىن ويناپ شىقتى.

«دوس- مۇقاسان» فيلمىنىڭ جابىق كورسەتىلىمى وتكەن جىلدىڭ 27-قىركۇيەگىندە ءوتتى. ال ەكى كۇننەن كەيىن قازاقستاننىڭ بارلىق كينوتەاترلارىنا پروكاتقا شىقتى.