بۇگىن - ب ۇ ۇ-نىڭ حالىقارالىق بىتىمگەرلەر كۇنى
استانا. KAZINFORM - ب ۇ ۇ-نىڭ بىتىمگەرلىك ميسسيالارىنا 750 دەن اسا قازاقستاندىق اسكەري قىزمەتشى قاتىستى. بۇل تۋرالى قورعانىس مينيسترلىگىنىڭ باسپا ءسوز قىزمەتى ءمالىم ەتتى.
29-مامىر - قاقتىعىستاردى رەتتەۋگە جانە بارىنشا قاۋىپسىزدىكتى قولداۋعا، بەيبىتشىلىكتى قۇرۋعا ەلەۋلى ۇلەس قوساتىن ب ۇ ۇ-نىڭ حالىقارالىق بىتىمگەرلەر كۇنى.
قازاقستاندىق اسكەري قىزمەتشىلەردىڭ الەمدەگى بەيبىتشىلىكتى قولداۋعا قاتىسۋ تاجىريبەسى 2003 -جىلدىڭ تامىزىندا ءبىرىنشى ينجەنەرلىك- ساپەرلىك «قازبات» جاساعىنىڭ قۇرىلۋىنان باستاۋ الادى.
قازاقستان ۇكىمەتىنىڭ ب ۇ ۇ- مەن بىتىمگەرلىك جەلىسى بويىنشا ءوزارا ءىس-ارەكەتى 2014 -جىلى قارۋلى كۇشتەردىڭ العاشقى اسكەري قىزمەتشىسىن باتىس ساحاراداعى ۇيىمنىڭ اسكەري باقىلاۋشىسى رەتىندە جىبەرگەن ساتىنەن باستالدى.
- وسى كەزدەن باستاپ قازاقستاندىق بىتىمگەرلەر ليۆان، باتىس ساحارا جانە كوت-د’يۆۋار سياقتى الەمنىڭ ءارتۇرلى وڭىرلەرىندە قىزمەت ەتتى. 2024 -جىلى قازاقستان ب ۇ ۇ-نىڭ افريكا مەن تاياۋ شىعىستاعى ميسسياسىنا قوسىمشا اسكەري قىزمەتشىلەردى جىبەردى. اسىرەسە ورتالىق افريكا رەسپۋبليكاسىنداعى، ماليدەگى جانە كونگو دەموكراتيالىق رەسپۋبليكاسىنداعى ميسسيالار كۇردەلى بولدى. قازاقستان ت م د-دا ب ۇ ۇ-نىڭ گولان جوتالارىندا قىزمەت ەتۋگە دەربەس ماندات العان العاشقى جانە ازىرگە جالعىز ەل بولىپ تابىلادى. بۇگىندە ءبىزدىڭ 139 اسكەري قىزمەتشىمىز قارسى تاراپتار اراسىندا اتىستى توقتاتۋ رەجيمىن ساقتاۋ جونىندە ماڭىزدى مىندەتتەردى ورىنداپ ءجۇر، - دەلىنگەن حابارلامادا.
ۆەدومستۆو مالىمەتىنشە، ۇيىمنىڭ بىتىمگەرلىك كونتينگەنتىن ءوز بەتىنشە ورنالاستىرۋ تۋرالى شەشىمى نورماتيۆتىك بازانى دامىتۋ جانە اسكەري قىزمەتشىلەردى دايارلاۋدى جەتىلدىرۋ جونىندەگى جۇيەلى جۇمىستىڭ لوگيكالىق ناتيجەسى بولدى. بۇل ۇدەرىستە بىتىمگەرلەردى قۇقىقتىق، گۋمانيتارلىق، تىلدىك جانە پسيحولوگيالىق دايارلاۋمەن قاتار، جان-جاقتى وقىتۋمەن قامتاماسىز ەتەتىن الماتى قالاسىندا بىتىمگەرلىك وپەراتسيالار ورتالىعىن قۇرۋ شەشۋشى ءرول اتقاردى.
- قازاقستاننىڭ ب ۇ ۇ-نىڭ بىتىمگەرلىك ميسسيالارىنا قاتىسۋى حالىقارالىق قاۋىپسىزدىكتى نىعايتۋعا ەلەۋلى ۇلەس قوسىپ قانا قويماي، ەلىمىزدىڭ جاھاندىق ارەناداعى ءرولىن ارتتىرۋعا ىقپال ەتەدى. بۇل وعان قوسا قازاقستاندىق اسكەري قىزمەتشىلەرگە قۇندى جاۋىنگەرلىك تاجىريبە جيناقتاۋعا، كاسىبي دايارلىقتى جەتىلدىرۋگە جانە كوپۇلتتى ورتاداعى ءىس-قيمىلدارعا بەيىمدەلۋگە مۇمكىندىك بەرەدى، - دەپ جازدى قورعانىس مينيسترلىگى.
بىرىككەن ۇلتتار ۇيىمىنىڭ حالىقارالىق بىتىمگەرلەر كۇنى - قازا تاپقانداردى ەسكە الىپ، ب ۇ ۇ-نىڭ الەمدەگى بەيبىتشىلىكتى ساقتاۋ جونىندەگى بىتىمگەرلىك وپەراتسيالارىنىڭ قۇرامىندا قىزمەت ەتكەن ءھام قىزمەت ەتۋدى جالعاستىرىپ كەلە جاتقان ادامدارعا قۇرمەت كورسەتەتىن كۇن.
ەسكە سالا كەتەيىك، بۇعان دەيىن قازاقستاندىق بىتىمگەرلەر اسكەري پارادتا ءجۇرىپ وتكەنىن جازعان ەدىك.
اۆتور
باقىتگۇل اباي قىزى
