بۇگىن استانالىقتاردى قانداي مەرەكەلىك شارالار كۇتىپ تۇر

استانا. KAZINFORM - بۇگىن - استانا كۇنى. سوعان وراي، قالادا 100 دەن استام مەرەكەلىك ءىس-شارا ۇيىمداستىرىلىپ جاتىر. Jibek Joly ارناسىنىڭ «بۇگىن LIVE» باعدارلاماسىنا قوناق بولعان استانا قالاسى مادەنيەت جانە ونەردى دامىتۋ ءبولىمىنىڭ باسشىسى قالا قوناقتارىن قانداي توسىن سىيلار كۇتىپ تۇرعانىن باياندادى.

- استانا قالاسىنىڭ اكىمدىگى استانا كۇنىنە وراي 100 دەن استام ءىس-شارا ۇيىمداستىرۋدى جوسپارلاعان. بۇل شارالاردىڭ قاتارىندا مادەني- بۇقارالىق، سپورتتىق جانە الەۋمەتتىك باعىتتاعى باعدارلامالار قامتىلعان.

قالالىق مادەنيەت باسقارماسى قۇرامىنداعى 14 مەكەمەنىڭ بارلىق ۇجىمى مەرەكەگە بەلسەنە قاتىسادى.

5- 6-شىلدە كۇندەرى ءازىربايجان مامبەتوۆ اتىنداعى تەاتردا «ارماندار ورىندالادى» قويىلىمىنىڭ تۇساۋى كەسىلەدى. ەرەكشەلىگى _ قويىلىمعا كاسىبي ارتىستەر ەمەس، ءتۇرلى جۇمىسشى ماماندىق يەلەرى قاتىسادى.

سونداي-اق قالالىق «پەرفومانس» فەستيۆالى وتەدى. ول ورتالىق «Jetisu» ساياباعىندا شەرۋ تۇرىندەگى ساحنالىق كوستيۋمدەرمەن باستالىپ، اشىق اسپان استىنداعى قويىلىمدارمەن جالعاسادى. كىرۋ - تەگىن.

6-شىلدە كۇنى قالانىڭ شەت ايماقتارىنداعى 6 اۋداننىڭ 15 تۇرعىن ءۇي الابىندا كۇندىز كونسەرت وتەدى.

كەشكە Astana Arena ستاديونىندا Open Air كونسەرتى ۇيىمداستىرىلادى. وندا قازىبەك قۇرايىش، «دوس-مۇقاسان»، Nazima ،2rar سىندى تانىمال ورىنداۋشىلار ونەر كورسەتەدى.

ءدال سول ساتتە «قازاق ەلى» الاڭىندا جاستارعا ارنالعان Jastar Energy كونتسەرتى وتەدى. ميراس ءجۇنىسوۆ، Artur جانە ەرلان قانات ۇلى ساحناعا شىعادى، - دەيدى اقەركە جۇمابايەۆا.

مەرەكە قارساڭىندا استانا قالاسىنىڭ تۇرعىندارى مەن قوناقتارىنا ارنالعان وتباسىلىق شارالار دا ۇيىمداستىرىلماق.

- استانا قالاسىندا «مەرەكەلىك ساياباق» جوباسى اياسىندا اشىق اسپان استىندا ءتۇرلى وتباسىلىق ءىس-شارالار وتەدى. بالالارعا سۋرەت سالۋ، بەينەلەۋ، وتباسى بولىپ قاتىساتىن شىعارماشىلىق بەلسەندىلىكتەر ۇيىمداستىرىلادى.

سونىمەن قاتار، 1-ماۋسىمنان باستاپ «وتباسى TIME» جوباسى ىسكە قوسىلعان. دەمالىس كۇندەرى قالا ساياباقتارىندا مادەني- بۇقارالىق ءىس-شارالار مەن اشىق اسپان استىنداعى كينو كورسەتىلىمدەرى ءوتىپ جاتىر. بۇل جوبالار وتباسىلارعا ارنالعان ساپالى ءارى مازمۇندى دەمالىس ۇسىنۋدى كوزدەيدى، - دەيدى استانا قالاسى مادەنيەت جانە ونەردى دامىتۋ ءبولىمىنىڭ باسشىسى.

اقەركە جۇمابايەۆا استانالىق وتباسىلاردى ەكولوگيالىق شاراعا دا اتسالىسۋعا شاقىردى.

- استانا قالاسىنىڭ تازالىعىنا باسا ءمان بەرىلىپ وتىر. «تازا قازاقستان» اكسياسى اياسىندا قولدانىلعان پلاستيك قاقپاقتاردان 4 مەترلىك مىسىق ءمۇسىنى جاسالادى.

كەز كەلگەن وتباسى ءوز پلاستيك قاقپاقتارىن اكەلىپ، وسى شاراعا قاتىسا الادى. بۇل جوبا ارقىلى سانالى تۇتىنۋ مەن ەكولوگيالىق مادەنيەتتى قالىپتاستىرۋ ماقسات ەتىلگەن.

سونىمەن قاتار، قالاداعى حالىقتىڭ تىعىزدىعى ەسكەرىلىپ، ءىس- شارالار بىرنەشە جەردە قاتار ۇيىمداستىرىلادى، - دەدى ول.

ايتا كەتەلىك بۇگىن ورتالىق ازيا مەن ەۋرازيا كەڭىستىگىندەگى ماڭىزدى ساياسي، ەكونوميكالىق جانە مادەني ورتالىققا اينالعان ەلوردامىز - استانا كۇنى.