بىلتىر قاي مينيسترلىك قىزمەتكەرلەرى جەمقورلىقپەن كوپ ۇستالدى

жемқорлық
Фото: Kazinform

استانا. KAZINFORM - قازاقستان سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى ارمان تىلەۋكەنوۆ وتكەن جىلدىڭ قورىتىندىسى بويىنشا سىبايلاس جەمقورلىق فاكتىسىمەن قاي مينيسترلىك قىزمەتكەرلەرى ءجيى ۇستالعانىن ايتتى.

«2023-جىلى مينيسترلىكتەر اراسىندا سىبايلاس جەمقورلىق فاكتىلەرى بويىنشا قۇرىققا ءجيى ىلىككەن، ىشكى ىستەر مينيسترلىگىنەن 193 تۇلعا، توتەنشە جاعدايلار مينيسترلىگىنەن 31 تۇلعا، قارجى مينيسترلىگىنەن 25 تۇلعا، قورعانىس مينيسترلىگىنەن 17 تۇلعا»، - دەدى ارمان تىلەۋكەنوۆ اگەنتتىكتە وتكەن باسپا ءسوز ءماسليحاتىندا.

ونىڭ ايتۋىنشا، انتيكور سان قۋىپ، ستاتيستيكاعا جۇمىس ىستەمەيدى. سونداي-اق، اگەنتتىكتىڭ رەسمي وكىلى قىلمىستىق-پروتسەستىك كودەكسىنىڭ 201-بابىنا سايكەس وزگە اقپاراتتىڭ جاريا ەتىلمەيتىندىگىن ەسكە سالدى.

«كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى»، - دەپ تولىقتىردى ا. تىلەۋكەنوۆ.

سوڭعى جاڭالىقتار