بەيجىڭدە نۇرعيسا تىلەنديەۆتىڭ مەرەيتويىنا ارنالعان مادەني كەش ءوتتى
بەيجىڭ. KAZINFORM - قىتاي استاناسى بەيجىڭدە قازاقتىڭ كورنەكتى كومپوزيتورى، ديريجەر، قازاقستاننىڭ حالىق ءارتىسى نۇرعيسا تىلەنديەۆتىڭ 100 جىلدىعىنا ارنالعان حالىقارالىق مادەني كەش ءوتتى.
مەرەيتويلىق ءىس- شارا اياسىندا قالانىڭ ورتالىق كونتسەرت زالىندا ء«القيسسا» اتتى شىعارماشىلىق باعدارلاما ۇسىنىلدى. كەش بارىسىندا كومپوزيتوردىڭ ءومىر جولى مەن شىعارماشىلىعىنا ارنالعان مۋزىكالىق تۋىندىلار ورىندالدى.
سالتاناتتى كەشكە الماتى وبلىسىنىڭ اكىمى مارات سۇلتانعازيەۆ قاتىسىپ، قۇتتىقتاۋ ءسوز سويلەدى. ءوڭىر باسشىسى ءوز سوزىندە قازاقستان مەن قىتاي اراسىنداعى مادەني ىنتىماقتاستىقتىڭ ماڭىزدىلىعىنا توقتالدى.
«نۇرعيسا تىلەنديەۆ - قازاق رۋحانياتىنىڭ التىن دىڭگەگى. ونىڭ شىعارمالارى - ۇلتتىڭ تاريحي جادى مەن مادەني كودىن بەينەلەيتىن تەڭدەسسىز مۇرا. ۇلى كومپوزيتوردىڭ عاسىرلىق مەرەيتويىنىڭ بەيجىڭدە اتالىپ ءوتۋى - قوس حالىق اراسىنداعى دوستىق پەن ءوزارا قۇرمەتتىڭ جارقىن كورىنىسى»، - دەدى مارات سۇلتانعازيەۆ.
رەسمي بولىمنەن كەيىن ن. تىلەنديەۆ اتىنداعى «وتىرار سازى» فولكلورلى- ەتنوگرافيالىق وركەسترى ساحناعا شىعىپ، كورەرمەنگە كومپوزيتوردىڭ تاڭداۋلى تۋىندىلارىن ۇسىندى. وركەسترگە قازاقستاننىڭ ەڭبەك سىڭىرگەن قايراتكەرى، سازگەردىڭ قىزى ءدىنزۋحرا تىلەنديەۆا ديريجەرلىك ەتتى.
كەش بارىسىندا قازاقستاننىڭ حالىق ءارتيسى سەكەن تۇرىسبەك، ق ر ەڭبەك سىڭىرگەن قايراتكەرلەرى نۇركەن ءاشىروۆ پەن مادينا ءسادۋاقاسوۆا، سونداي-اق الماتى وبلىسىنىڭ ونەر ۇجىمدارى ونەر كورسەتتى. سونىمەن قاتار، شارا اياسىندا قازاقتىڭ ءداستۇرلى قولونەرى مەن جەڭىل ونەركاسىپ ونىمدەرىنىڭ كورمەسى ۇيىمداستىرىلدى.
كونسەرتكە قاتىسقان بەيجىڭ قالاسىنىڭ تۇرعىنى قالامقاس سەرىك قىزى ءوز اسەرىمەن ءبولىستى:
«نۇرعيسا تىلەنديەۆتىڭ اۋەندەرى - جۇرەككە جەتەتىن شىنايى ونەر. كۇي مەن سازدان تۋعان ەلدىڭ رۋحىن سەزىندىم. قىتايدا تۋىپ- وسسەم دە، قازاق بولىپ تۋعانىما ەرەكشە ماقتاندىم»، - دەدى ول.
ايتا كەتەيىك، يۋنەسكو شەڭبەرىندە اتالىپ جاتقان مەرەيتوي اياسىندا نۇرعيسا تىلەنديەۆتىڭ شىعارماشىلىعىن حالىقارالىق دەڭگەيدە ناسيحاتتاۋعا ارنالعان مادەني شارالار جىل بويى جالعاسادى. بۇل باستامادا الماتى وبلىسى بەلسەندىلىك تانىتىپ وتىر.
اقەركە قابدۇلكاكىم
