بەيجىڭ ق ح ر مەن ا ق ش كاسىپورىندارىنىڭ اراسىندا ىسكەرلىك ىنتىماقتاستىقتى قولداۋعا دايىن
استانا. KAZINFORM - بەيجىڭ قىتايلىق جانە امەريكالىق كومپانيالار اراسىندا قالىپتى ىسكەرلىك ىنتىماقتاستىقتى قولداۋعا دايىن، دەپ مالىمدەدى قىتايدىڭ كوممەرتسيا مينيسترلىگى.
بۇل تۋرالى مينيسترلىك وكىلدەرى بۇقارالىق اقپارات قۇرالدارىندا جاريالانعان قىتاي «Boeing» ۇشاقتارىن قابىلداۋدى توقتاتتى دەگەن حابار اياسىندا مالىمدەدى، دەپ جازادى Kazinform اگەنتتىگىنىڭ ءتىلشىسى.
قىتاي مەن ا ق ش ۇزاق ۋاقىت بويى ازاماتتىق اۆياتسيا سالاسىندا ءوزارا ءتيىمدى ىنتىماقتاستىقتى قولداپ كەلدى. ءوز كەزەگىندە بۇل ەكىجاقتى ساۋدا مەن گۋمانيتارلىق الماسۋلاردى جۇزەگە اسىرۋعا وڭ ىقپال ەتتى، دەپ كەلتىرەدى ق ح ر- ءدىڭ كوممەرتسيا مينيسترلىگىنىڭ مالىمدەمەسىن شينحۋا.
الايدا «تاريف شوقپارىن» وڭدى-سولدى سىلتەپ جۇرگەن قۇراما شتاتتاردىڭ ارەكەتى جاھاندىق ءوندىرىس جانە جەتكىزۋ تىزبەگىنىڭ تۇراقتىلىعىنا نۇقسان كەلتىرىپ، حالىقارالىق اۋە تاسىمالى نارىعىنىڭ جۇمىسىن بۇزدى، دەپ كورسەتتى ۆەدومستۆو وكىلدەرى.
- كوپتەگەن كاسىپورىنداردا قالىپتى ساۋدا جانە ينۆەستيتسيالىق قىزمەتتى جۇزەگە اسىرۋ مۇمكىندىگى جوق، قىتايدىڭ اۋە كومپانيالارىمەن قوسا بوينگ كومپانياسىنا دا زيان كەلدى، دەپ حابارلادى ۆەدومستۆو وكىلدەرى.
ق ح ر كوممەرتسيا مينيسترلىگىنىڭ وكىلدەرى قىتاي قۇراما شتاتتار كاسىپورىنداردىڭ پىكىرىنە قۇلاق اسىپ، ولاردىڭ تۇراقتى، قالىپتى ساۋدا جانە ينۆەستيتسيالىق قىزمەتىنە قاجەتتى ورتا قالىپتاستىرادى دەگەن ۇمىتتە ەكەنىن جەتكىزدى.
وسىعان دەيىن قىتاي پاناما كانالىنداعى پورتتاردىڭ ساتىلۋىنا تەكسەرۋ جۇرگىزۋدى تالاپ ەتىپ وتىرعانى تۋرالى جازدىق.
