بيشىمبايەۆتىڭ سوتى اياقتالۋعا جاقىن - سۋديا
استانا. KAZINFORM - ەكس-مينيستر قۋاندىق بيشىمبايەۆقا قاتىستى سوت وتىرىسى كەلەسى اپتا جالعاساتىن بولدى. سۋديا اياجان قۇلبايەۆا «سوت قاشان اياقتالادى ەكەن؟» دەگەندەرگە جاۋاپ بەرگەن سياقتى. ول سوت تەرگەۋى شارىقتاۋ شەگىنە جەتكەنىن مالىمدەدى.
ول بۇگىنگى سوت وتىرىسىنىڭ سوڭىندا تاراپتارعا سوت تەرگەۋىنە قاتىستى دۇنيەلەردى ۇسىنۋعا ۇلگەرىپ قالۋدى ەسكە سالدى.
بۇگىنگى سوت نەسىمەن ەستە قالدى دەسەڭىز، ايىپتالۋشى قۋاندىق بيشىمبايەۆ سوتقا ۇيالى تەلەفونىنىڭ پارولىن بەرۋدەن باس تارتتى. ونى تەك قورعاۋشىلارىنا ۇسىنا الاتىنىن ايتتى.
ايتا كەتەيىك، بۇعان دەيىن تاعى ءبىر ايىپتالۋشى، بيشىمبايەۆتىڭ ءىنىسى باقىتجان بايجانوۆ ۇيالى تەلەفونىنىڭ پارولىن بەرىپ، جاسىراتىن ەشتەڭە جوق ەكەنىن جەتكىزگەن ەدى. سالتاناتتىڭ قۇربىسى ايدا احمەدينا دا ۇيالى تەلەفونىنداعى جازبالاردى كوپشىلىككە جاريا ەتتى. سالتانات نۇكەنوۆانىڭ ۇيالى تەلەفونى ونسىز دا ايعاق رەتىندە تەكسەرىلگەن ەدى. وسى رەتتە، قۋاندىق بيشىمبايەۆتىڭ ارەكەتى كوپشىلىككە كۇدىك ۇيالاتقانىن اتاپ وتكەن ءجون.
