بىشكەكتە تۋدى وزگەرتۋگە قارسى نارازىلىق اكسياسى ءوتتى

قىرعىز ەلىنىڭ استاناسىندا م. گوركي اتىنداعى ساياباقتا مەملەكەتتىك تۋدى وزگەرتۋگە قارسى نارازىلىق اكسياسى ءوتتى، دەپ حابارلايدى Kazinfom.

بەيبىت ميتينگىگە جينالعان 50-دەن استام ادام جوگوركۋ كەنەش دەپۋتاتتارىنىڭ ەلىمىزدىڭ مەملەكەتتىك رامىزىندەگى كۇن ساۋلەسىنىڭ بەينەسىن وزگەرتۋ تۋرالى شەشىمىمەن كەلىسپەيتىنىن ءبىلدىردى. اكسياعا قاتىسۋشىلار تۋدى اۋىستىرماۋدى جانە 7-جەلتوقساندا ازاماتتىق بەلسەندى، بۇگىنگى اكسيانىڭ باستاماشىسى ءافتاندىل جوروبەكوۆتى بوساتۋدى تالاپ ەتتى. قۇقىق قورعاۋ ورگاندارى ونى رەسپۋبليكاداعى الەۋمەتتىك جاعدايدى تۇراقسىزداندىرۋعا جانە جاپپاي تارتىپسىزدىككە شاقىرعانى ءۇشىن ەكى اي مەرزىمگە قاماۋعا العان بولاتىن.

ەستەرىڭىزگە سالا كەتەيىك، قاراشا ايىنىڭ سوڭىندا جوگوركۋ كەنەش دەپۋتاتتارى مەملەكەتتىك تۋدى وزگەرتۋ تۋرالى زاڭ جوباسىن ءبىرىنشى وقىلىمدا ماقۇلدادى. قۇجاتتىڭ تۇجىرىمداماسىنا قاتىسقان 80 دەپۋتاتتىڭ 66-سى قولداسا، 8 حالىق قالاۋلىسى قارسى شىقتى. مەملەكەتتىك رامىزدەگى كۇن ساۋلەسىن وزگەرتۋ تۋرالى باستامانى قىرعىز رەسپۋبليكاسى پارلامەنتىنىڭ ءتوراعاسى نۇرلانبەك شاكيەۆ پەن دەپۋتات ۋلان پريموۆ كوتەردى.

بۇعان دەيىن قىرعىز رەسپۋبليكاسىنىڭ پرەزيدەنتى سادىر جاپاروۆتىڭ بۇل باستامانى قولداعانى حابارلانعان بولاتىن. سونداي- اق مەملەكەتتىك رامىزدەگى كۇن ساۋلەسىن وزگەرتۋدى جاقتاعان قىرعىز رەسپۋبليكاسى ۇلتتىق قاۋىپسىزدىك مەملەكەتتىك كوميتەتىنىڭ باسشىسى كامچىبەك تاشيەۆ بۇل تۋرالى ءوزىنىڭ Facebook-تەگى پاراقشاسىندا جازدى.

ەلىمىزدىڭ مەملەكەتتىك تۋىنداعى ساۋلەلەردىڭ كەسكىنىن الداعى ۋاقىتتا وزگەرتۋ يدەياسى قىرعىز قوعامىندا قىزۋ تالقىلانىپ جاتىر. كەيبىرەۋلەر ونى قۇپتايدى، ال باسقالارى، كەرىسىنشە، وزگەرىستەرگە ءۇزىلدى-كەسىلدى قارسى.

اۆتور

ابىلايحان جۇماشيەۆ