بىشكەكتە قازاقستانداعى قاڭتار وقيعاسى تۋرالى فيلم كورسەتىلدى

بىشكەك. KAZINFORM - بىشكەكتەگى اباي اتىنداعى قىرعىز-قازاق مادەني ورتالىعىندا «قازاقستان پرەزيدەنتى قاسىم-جومارت توقايەۆتىڭ 2024 -جىلعى 3-قاڭتارداعى ءوتىنىشىن تالداۋ جانە 2022 -جىلعى قاڭتار وقيعالارىنا باعا بەرۋ» تاقىرىبىنا ارنالعان «قاڭتار. مەملەكەتتىك توڭكەرىسكە جاسالعان قادام. قالاي بولدى» اتتى فيلم كوپشىلىك نازارىنا ۇسىنىلدى، - دەپ حابارلايدى Kazinform ءتىلشىسى.

ءىس-شاراعا ساياسي جانە قوعام قايراتكەرلەرى، قىرعىزستاننىڭ ساراپشىلار قاۋىمداستىعىنىڭ جەتەكشى وكىلدەرى سونداي-اق قازاق دياسپوراسىنىڭ مۇشەلەرى قاتىستى.

العاش بولىپ ءسوز العان قازاقستاننىڭ قىرعىز رەسپۋبليكاسىنداعى ەلشىسى ءراپىل جوشىبايەۆ قۇتتىقتاۋ ءسوز سويلەپ، 2022 -جىلعى قاڭتار وقيعاسى قازاقستان تاريحىنداعى جاڭا ءداۋىر بولعانىن اتاپ ءوتتى. ەلشى مەملەكەت باسشىسى قاسىم-جومارت توقايەۆتىڭ «ەگەمەن قازاقستان» گازەتىنە بەرگەن سۇحباتىنىڭ نەگىزگى تۇستارىنا ەگجەي-تەگجەيلى توقتالدى.

قاتىسۋشىلاردىڭ نازارىنا قاڭتار وقيعاسىنا ارنالعان فيلمدى ۇسىنا وتىرىپ، قازاق حالقى وسى ءبىر قورقىنىشتى داعدارىستى ەڭسەرگەنىن تىلگە تيەك ەتتى.

- اپات حالىقتىڭ بىرلىگى مەن بيلىكتىڭ جان-جاقتى شەشىمىنە تانىتقان باتىل ارەكەتتەرىنىڭ ارقاسىندا عانا الدىن الدى، - دەپ اتاپ ءوتتى ديپلومات.

مەملەكەتتىك باسقارۋ جونىندەگى قىرعىز ساراپشىسى شەراديل باقتىعۇلوۆ قاسىم-جومارت توقايەۆتىڭ «ەگەمەن قازاقستان» گازەتىنە بەرگەن سۇحباتى جانە قاڭتار وقيعالارىن باعالاۋ تۋرالى وي بولىسە وتىرىپ، بۇل بايانداما قازاقستانداعى وقيعالاردى اۋقىمدى تۇردە قاراستىرۋعا شاقىراتىنىن اتاپ ءوتتى.

- ق ر پرەزيدەنتى قاسىم-جومارت توقايەۆ ءتۇرلى دەرەككوزدەردەن مول اقپارات الا وتىرىپ، جاڭا قازاقستاننىڭ نەگىزگى باعىتتارىن ايقىنداۋى نەمەسە قاڭتار وقيعاسىنا باعا بەرۋى ستراتەگيالىق پەرسپەكتيۆادان تۋىندايدى، - دەپ ەسەپتەيدى ساياساتتانۋشى.

شەرادىل باقتىعۇلوۆتىڭ پىكىرىنشە، ق ر پرەزيدەنتىنىڭ 2019 -جىلدان بەرى ۇسىنعان باستامالارىنىڭ جيىنتىعىن تالداۋ قازاقستاندا «بارقىت» رەۆوليۋتسيا ءجۇرىپ جاتقانىن راستاۋعا مۇمكىندىك بەرەدى. ساراپشى قوعامدىق جانە الەۋمەتتىك عىلىمدار تۇرعىسىنان «بارقىت» ۇعىمى ەل باسشىلىعى مەن حالىقتىڭ ەداۋىر بولىگىنىڭ ەلدەگى ءومىردى جاقسارتۋعا ۇمتىلىسى جولىنداعى بىرلىگىن بىلدىرەتىنىن ءتۇسىندىردى. ونىڭ ايتۋىنشا، ويتكەنى، 2022 -جىلعى 5-ماۋسىمداعى تۇزەتۋلەرمەن جاڭا قازاقستاننىڭ كونستيتۋتسياسىندا «حالىق ۇنىنە قۇلاق اساتىن مەملەكەت» تۇجىرىمداماسىندا كورىنىس تاپقان رەۆوليۋتسيا - قازاقستاننىڭ الەۋمەتتىك جانە ساياسي جۇيەسىن، مەملەكەتتىك ورگاندار مەن حالىق اراسىنداعى قاتىناستاردى تۇبەگەيلى قايتا قۇرۋ پروتسەسى ءجۇرىپ جاتىر.

اۆتور

باقىتگۇل اباي قىزى