بىشكەكتە قارۋ-جاراق جاسىرىلعان ءىرى قويما تابىلدى

استانا. KAZINFORM - بىشكەك قالاسىندا قۇقىق قورعاۋ ورگاندارى قارۋ-جاراق پەن وق-دارىلەر جاسىرىلعان قويمانى انىقتادى.

بىشكەك قالالىق ىشكى ىستەر باسقارماسىنىڭ باسپا ءسوز قىزمەتىنىڭ مالىمەتىنشە، قالاداعى اياقتالماعان قۇرىلىس نىساندارىنىڭ بىرىنەن ج. ت. ەسىمدى ازاماتقا تيەسىلى قارۋ-جاراق قويماسى تابىلعان. ول 1981-جىلى تۋعان، «توحا» لاقاپ اتىمەن تانىمال، ۇيىمداسقان قىلمىستىق توپ پەن يگيل (قازاقستاندا تىيىم سالىنعان ۇيىم - رەد.) تەرروريستىك ۇيىمىنىڭ مۇشەسى بولعان.

تەكسەرۋ بارىسىندا ءۇش تروتيل شاشكاسى، سەريالىق ءنومىرى جوق ماكاروۆ تاپانشاسى مەن سوعان ارنالعان وقجاتار، بەس قول گراناتاسى، ءارتۇرلى كاليبرلى 500 دەن استام وق-ءدارى، ر. ا. اتىنا رەسىمدەلگەن كۋالىك پەن 2023-جىلى كوزىن جويعان قىلمىس الەمىنىڭ سەركەسى كامچى كولبايەۆ، ونىڭ وققاعارى جانە ج. ت. بىرگە تۇسكەن فوتوسۋرەت تابىلعان.

ايتا كەتەيىك، ج. ت. 2015-جىلى بىشكەكتە پانفيلوۆ پەن گوركي كوشەلەرىنىڭ قيىلىسىندا يگيل تەرروريستىك ۇيىمىنا قاتىسى بار ادامدار توبىمەن بىرگە ارنايى وپەراتسيا كەزىندە كوزىن جويعان.

بۇعان دەيىن كامچى كولبايەۆتىڭ باۋىرى ۇيىمداسقان قىلمىستىق توپ مۇشەلەرىنە زاڭسىز جەر بەرۋ ءىسى بويىنشا جەمقورلىق فاكتىسىمەن ۇستالعانى حابارلانعان بولاتىن.

سونداي-اق ماۋسىم ايىنىڭ ورتاسىندا بىشكەكتە قارۋلى جيھادقا شاقىرعان ءدىني توپ مۇشەلەرى قولعا ءتۇستى.