بيۋدجەتتى شاعىن توپپەن جوسپارلاۋدى قويۋ كەرەك - ماۋلەن اشىمبايەۆ
استانا. KAZINFORM - سەنات ءتوراعاسى ماۋلەن اشىمبايەۆ قارجى ءمينيسترى ءمادي تاكيەۆكە بيۋدجەتتى جوسپارلاۋ ىسىنە تاۋەلسىز ساراپشىلار مەن قوعامدىق كەڭەستەردى تارتۋ جولدارىن پىسىقتاۋدى ۇسىندى.
2024 -جىلعى بيۋدجەتتىڭ يگەرىلۋى تۋرالى ەسەپتى تالقىلاعان سەناتورلار ءبىر رەت بەكىتىلگەن بيۋدجەتتى قايتا-قايتا وزگەرتۋ بەلەڭ الىپ وتىرعانىن نارازىلىق ءبىلدىردى. ولاردىڭ بۇل ءۋاجىن سەنات سپيكەرى دە قۋاتتادى.
- بىلتىر بيۋدجەتتىڭ شىعىس بولىگىن ءبىر جىلدىڭ ىشىندە 13 رەت، تابىس بولىگىن 3 رەت وزگەرتتىڭىزدەر. ونىڭ تۇسىمدەرگە، سالىقتارعا بايلانىستى وبەكتيۆتى سەبەپتەرى دە بولعان شىعار. ءبىراق بۇل جەردە ۇلكەن جۇيەلى ماسەلەلەر تۋىندايدى عوي. نەگە ولاي جوسپارلانعان؟ جوسپارلانعان كەزدە ءاتۇستى جاسالعان نارسە مە؟ ولاي بولسا، جوسپارلاعان ادامداردىڭ جاۋاپكەرشىلىگى قانداي؟ ولار جاۋاپكەرشىلىككە تارتىلدى ما، جوق پا؟ الدە كەلەسى جىلى دا سول مەتوديكامەن جۇرە بەرە مە؟ جوسپارلاۋ دەرەكتەر نەگىزىندە جاسالادى عوي. باستاپقى دەرەكتەر دۇرىس الىنعان با؟ وسىنداي كەشەندى تۇردە قاراپ، بيۋدجەتتى جوسپارلاۋ ماسەلەسى ءبىر دەڭگەيگە شىعارۋ كەرەكتىگى انىق. ءارى قاراي دا بۇلاي بولا بەرمەيدى ەندى، - دەدى ول.
سەنات ءتوراعاسى قارجى مينيسترىنە بيۋدجەتتى جوسپارلاۋدىڭ اشىق فورماتىن ويلاپ تابۋ كەرەكتىگىن ايتتى.
- ءبىر جىلدا بيۋدجەتتى 13 رەت وزگەرتۋ دەگەن ءبىر رەكورد قوي. ءارى قاراي ونداي رەكوردقا جەتە قويماسپىز دەپ سەنەمىز. وسى باعىتتا كوپتەگەن جۇمىس ىستەلۋ كەرەك سياقتى. جوسپارلاۋدى مينيسترلىكتەر وزدەرى عانا وتىرىپ جاساي بەرمەي، مامانداردى، تاۋەلسىز ساراپشىلاردى قوعامدىق كەڭەستەر ارقىلى تارتۋدىڭ فورماسىن تابۋ ۇتىمدى بولاتىن شىعار. كورپوراتيۆتى تۇردە جاسالسا، 1-2 ادام عانا ءوز ويىمەن جاساي بەرسە، ەرتە مە، كەش پە قاتەلىكتەر اكەلەتىنى تۇسىنىكتى. سوندىقتان بيۋدجەتتى جوسپارلاۋ پروتسەسىنىڭ اشىقتىعىن دا، جاڭا پرينتسيپتەرىندە قامتاماسىز ەتەتىن ۋاقىت كەلگەن سياقتى، - دەدى ماۋلەن اشىمبايەۆ.
بۇعان دەيىن 2024 -جىلعى بيۋدجەتتىڭ 13 رەت وزگەرتىلگەنىن جوعارى اۋديتورلىق پالاتا دا جوسپارلاۋدىڭ ساپاسىزدىعىمەن بايلانىستىرعان بولاتىن.
