بيۋدجەت قارجىسىنا ساتىپ الىنعان ءبىر سوتىق جەر دە جەكەمەنشىككە وتپەيدى - ەربولات دوسايەۆ

الماتى. KAZINFORM - الماتى اكىمى ەربولات دوسايەۆ مەدەۋ اۋدانى تۇرعىندارىمەن كەزدەسۋ بارىسىندا مەملەكەتتىك قاجەتتىلىك ءۇشىن جەردى ساتىپ الۋ تەتىگىن ءتۇسىندىردى.

- جەر ۋچاسكەسىن ساتىپ الۋ ءۇشىن بەرىلەتىن وتەماقى سوماسى حالىقتىڭ بارلىق قاجەتتىلىگىن قاناعاتتاندىرۋعا جەتكىلىكسىز دەپ ايتىلىپ جاتىر. باعالاۋدىڭ زاڭنامامەن بەلگىلەنگەن ناقتى مەحانيزمدەرى بار، ءبىراق ەگەر سوت زاڭعا سايكەس كوبىرەك وتەماقى تاعايىنداسا، ول تولەنەدى. قاجەتتى قاراجاتتى تابامىز، ۇنەمدەيمىز. ەڭ باستىسى، قالا دامۋى قاجەت. قالا اكىمى رەتىندە مەندە شاھاردى دامىتۋ ءۇشىن جەتكىلىكتى مەملەكەتتىك جەر قورى جوق، - دەدى ەربولات دوسايەۆ مەدەۋ اۋدانى تۇرعىندارىمەن كەزدەسۋدە.

قالا باسشىسى 2022 -جىلى تاعايىندالعاننان بەرى اكىمدىك جەردى جول سالۋ، الەۋمەتتىك ينفراقۇرىلىم مەن قوعامدىق كەڭىستىكتەردى دامىتۋ ماقساتىندا عانا ساتىپ الىپ جاتقانىن جانە مۇنىڭ ءبارى زاڭ اياسىندا جۇزەگە اسىرىلىپ وتىرعانىن اتاپ ءوتتى.

- بيۋدجەت قاراجاتىنا ساتىپ الىنعان ءبىر سوتىق جەردى دە جەر كودەكسىنە سايكەس جەكەمەنشىككە بەرە المايمىز. بۇل ماسەلەنى بىردەن ناقتىلاپ ايتقىم كەلەدى، اكىمدىك جەردى ساتىپ الىپ، ونى بىرەۋگە بەرە الادى دەگەن وي بولماۋى كەرەك. بۇل جەر كودەكسى بويىنشا قاتاڭ تۇردە تىيىم سالىنعان، بىزدە مۇنداي ارەكەتكە بارۋعا قۇقىعىمىز جوق، - دەدى قالا اكىمى.

وسىعان دەيىن قالا تۇرعىنى مەدەۋ اۋدانىندا قۇرىلىسى جوسپارلانعان كونگرەسس-ورتالىقتىڭ قۇرىلىسى قانشالىقتى زاڭدى ەكەنىن سۇراعان ەدى.

سونىمەن قاتار، الەۋمەتتىك جەلىدە وسى جەر ۋچاسكەسىندە ۇلكەن كەڭسە عيماراتى سالىناتىنى تۋرالى اقپارات پايدا بولدى.

ەربولات دوسايەۆ كونگرەسس-ورتالىق ءۇشىن الىناتىن اۋماقتا ەشقانداي كوممەرتسيالىق نىسان سالىنبايتىنىن جەتكىزدى.

اۆتور

الما مۇقانوۆا