بەيبىت الىبەكوۆ پەن نۇرلان قويانبايەۆ دەپۋتات بولۋى مۇمكىن بە

Әлібеков
Фото: Kazinform

استانا. KAZINFORM - ءماجىلىس دەپۋتاتى، «Respublica» پارتياسىنىڭ كوشباسشىسى ايداربەك قوجانازاروۆ دينارا شۇكىجانوۆانىڭ وكىلەتتىگىن تاپسىرۋى تۋرالى پىكىر ءبىلدىرىپ، ورنىنا كىم كەلەتىنى جونىندە ايتتى.

«بىزدە دە باسقالار سياقتى پارتيالىق ءتىزىم بار. ورتالىق كەڭەسپەن جينالۋدى جوسپارلاپ وتىرمىز، ءبىر اپتادا كەلەسى دەپۋتاتتى انىقتاۋىمىز كەرەك. ارينە، ۇمىتكەرلەر بار. ءبىراق بەيبىت الىبەكوۆ پەن نۇرلان قويانبايەۆتىڭ پارلامەنتكە كەلۋى ەكىتالاي. باسقا جىگىتتەر بار. ازىرگە ەش فاۆوريتىمىز جوق، ءبارىمىز داۋىس بەرەمىز. دينارا شۇكىجانوۆا مۇشە بولعان كوميتەتكە ساي كەلەتىن، كاسىپكەرلىك تاجىريبەسى بار ءبىرقاتار ادام بار. شىنىمدى ايتسام، قازىر پىكىر ايتۋ قيىن، ويتكەنى ءارقايسىمىزدىڭ ءوز ويىمىز بار. ەندى وسى ويلاردىڭ ءبارىن ورتاعا سالامىز. دينارانىڭ ءوزى پارتيامىزدا تەڭ ءتوراعا بولىپ قالا بەرەدى. ونىڭ دا ۇسىنىستارى بار شىعار»، - دەپ جاۋاپ بەردى ا. قوجانازاروۆ ءماجىلىس كۋلۋارىندا.

ونىڭ ايتۋىنشا، دينارا شۇكىجانوۆا كوپتەن بەرى بيزنەسكە قايتا ورالعىسى كەلەتىنىن ايتىپ جۇرگەن. ءبىراق ول باستاعان باستامالارىن اياقتاۋى كەرەك ەدى.

«قازىر بارلىق باستامالارىن تابىستى اياقتادى، سوندىقتان بيزنەسكە كەتىپ جاتىر. مەنىمەن جانجالداسىپ كەتتى دەگەن ءسوز - قاۋەسەت. ول مەنىڭ جاقىن دوسىم، «Respublica» پارتياسى قۇرىلماي تۇرىپ- اق دوس بولعانبىز. پارتيادا كوشباسشىلىق ءۇشىن كۇرەس بولعان جوق. اينالىپ كەلگەندە، ونىڭ قالاۋى ونەركاسىپتە جۇمىس ىستەۋ بولدى. ول قارمەتكە بارمايدى، قوستانايعا، ءوزى جۇمىس ىستەگەن كاسىپورىنعا ورالادى. ەشكىم ماجىلىستەن تۇڭىلگەن جوق. دينارا، كەرىسىنشە، وتە ۇلكەن تاجىريبە العانىن ايتۋدا. ەڭ باستىسى، ول پارلامەنت پاراعىن تۇبەگەيلى جاپقان جوق. بولاشاقتا بۇل تاقىرىپقا قايتا ورالۋى مۇمكىن»، - دەدى پارتيا باسشىسى.

ايتا كەتەيىك، بۇگىن پارلامەنت ءماجىلىسىنىڭ جالپى وتىرىسىندا دەپۋتات دينارا شۇكىجانوۆانىڭ وكىلەتتىگى مەرزىمىنەن بۇرىن توقتاتىلدى.

اۆتور

ايجان سەرىكجان قىزى

سوڭعى جاڭالىقتار