بيگ شانحايداعى ءورت: جاپا شەككەن كاسىپكەرلەردىڭ نەسيەسى كەيىنگە شەگەرىلە مە

استانا. KAZINFORM - بۇگىن تاڭعى ساعات 3 شاماسىندا ەلوردادا ءۇش قاباتتى بازار عيماراتى ورتكە ورانعان ەدى. وعيعانىڭ سەبەبى ءالى دە انىقتالىپ جاتىر.

جاۋاپتىلار كاسىپكەرلەردىڭ نەسيەسى مەن سالىق ەسەبىن كەيىنگە شەگەرۋ ماسەلەسى بويىنشا ءتيىستى مەكەمەلەرمەن كەلىسسوز جۇرگىزىپ جاتقاندارىن ايتادى.

- بۇگىنگى باستى مىندەتىمىز - زارداپ شەككەن كاسىپكەرلەرگە كۇندەلىكتى جۇمىس بارىسىندا جيى بايلانىساتىن نەگىزگى ۇيىمدارمەن قاجەتتى ماسەلەلەرىن شەشۋگە كومەكتەسۋ. ولار ەكىنشى دەڭگەيلى بانكتەر مەن سالىق ورگاندارى. مىسالى، الداعى ۋاقىتتا ولار قارجىلىق ەسەپتىلىكتى تاپسىرۋ، اي سايىنعى تولەمدەر جاساۋ نەمەسە اينالىم قاراجاتىن تولىقتىرۋ كەزىندە قيىندىقتارعا تاپ بولۋى مۇمكىن. وسىنداي جاعدايدا كاسىپكەرلەرگە جان-جاقتى قولداۋ كورسەتىلۋى كەرەك، - دەيدى استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى حالەل اكىمجانوۆ Kazinform تىلشىسىنە بەرگەن سۇحباتىندا.

بۇل ماسەلەنى شەشۋ ءۇشىن كاسىپكەرلەرگە زارداپ شەككەنىن دالەلدەيتىن ارنايى انىقتاما بەرىلەدى.

- بازار اۋماعىندا جالعا الۋ شارتى نەگىزىندە جۇمىس ىستەيتىن كاسىپكەرلەردىڭ سانى 100 دەن اسادى. قازىرگى ۋاقىتتا ولارعا ءتۇسىندىرۋ جۇمىستارىن جۇرگىزىپ جاتىرمىز. زارداپ شەككەندەر جالعا الۋ شارتىن، ەگەر زاڭدى تۇلعا بولسا، مەملەكەتتىك تىركەۋ نەمەسە قايتا تىركەۋ تۋرالى قۇجاتتى بىزگە ۇسىنىپ، ءوتىنىش جازۋ كەرەك. ءوتىنىش تۇسكەننەن كەيىن 15 جۇمىس كۇنى ىشىندە جاۋاپ بەرەمىز. ەگەر بارلىق قۇجاتتارى تولىق ءارى دۇرىس بولسا، كاسىپكەرگە رەسمي انىقتامانى تابىستايمىز. بۇل قۇجاتتى سالىق ورگاندارى مەن بانكتەرگە رەسمي تۇردە جۇگىنۋ ءۇشىن پايدالانا الادى. قازىرگى تاڭدا 50 دەن استام كاسىپكەر ءوتىنىش بەرىپ ۇلگەردى، - دەيدى بايقوڭىر اۋدانى توتەنشە جاعدايلار باسقارماسىنىڭ باس مامانى ايان قانتەك.

ال كاسىپكەرلەردىڭ ءوزى بازار ىشىندەگى جاعدايدان حابارسىز. ءتىپتى قانشا شىعىن كەلگەنى تۋرالى اقپاراتتى دا بىلە الماي وتىر.

- مەنىڭ نان ساتاتىن دۇڭگىرشەگىم بار ەدى. ءورت كەزىندە ونىڭ ىشىندەگى اقشا دا، تاۋار دا - ءبارى جانىپ كەتتى. قازىر ىشكە كىرىپ، ناقتى جاعدايدى كورە الماي وتىرمىز. ءبىراق ءورت سوندىرۋشىلەر ءىشى كۇلگە اينالىپ كەتتى دەدى. اكىمدىك تاراپىنان قانداي ناقتى شارالار قابىلداناتىنى بەلگىسىز. ءبىز ازىرشە ءوتىنىش جازىپ تاپسىردىق، - دەيدى كاسىپكەر نۇرگۇل ماحانوۆا.

ەسكە سالا كەتەيىك، بۇعان دەيىن زارداپ شەككەن كاسىپكەرلەرگە قانداي قولداۋ كورسەتىلەتىنى تۋرالى جازعان ەدىك.