بوراندى كۇنى جولعا شىعىپ كەتكەن جۇرگىزۋشىلەرگە قانداي شارا قولدانىلادى

استانا. KAZINFORM - اۋا رايى قولايسىزدىعى تۋرالى ەسكەرتۋگە قاراماستان جولعا شىعىپ، بوراندا قالىپ قويعاندارعا قانداي شارا قولدانىلادى؟ بۇل تۋرالى ق ر ىشكى ىستەر مينيسترلىگى اكىمشىلىك پوليتسيا كوميتەتىنىڭ رەسمي وكىلى اقتوتى بورانوۆا ايتىپ بەردى.

ماماننىڭ ايتۋىنشا، اۋا رايى قولايسىزدىعىنا بايلانىستى شەشىمدى جول يەسى توتەنشە جاعداي جانە ىشكى ىستەر مينيسترلىكتەرىمەن بىرلەسە قابىلايدى.

- ياعني رەسپۋبليكالىق جانە حالىقارالىق ماڭىزى بار جولداردىڭ يەسى - «قازاۆتوجول» كومپانياسى. ونىڭ قاراماعىندا 107 رەسپۋبليكالىق ماڭىزى بار جول بار، 17 اقىلى ۋچاسكە بار. ەسكەرتۋ حابارلاماسى كەلدى مە، كەلمەدى مە، ادام ەستىدى مە ماڭىزدى ەمەس، مەملەكەتتىك ورگاننىڭ باستى ماقساتى - قاۋىپسىزدىكتى قامتاماسىز ەتۋ، كەلەڭسىز جاعدايدا قالىپ قويعان ازاماتتارعا كومەكتەسۋ، - دەپ ءتۇسىندىردى ا. بورانوۆا.

سونىمەن بىرگە، ق ر اكىمشىلىك قۇقىقۇزۋشىلىقتار كودەكسىنىڭ 667-بابى (قۇقىق قورعاۋ نەمەسە ارناۋلى مەملەكەتتىك ورگان قىزمەتكەرىنىڭ زاڭدى وكىمىنە نەمەسە تالابىنا باعىنباۋ، زاڭدى قىزمەتىنە كەدەرگى جاساۋ) بويىنشا جاۋاپقا تارتۋ شەكتەن شىققان جاعدايدا عانا، مىسالى جولدى جاپقاندا قۇزىرلى ورگاندارمەن توبەسەلىپ، جولعا شىعىپ كەتكەندەرگە قولدانىلادى.

- نەگىزى جولدى جابۋ تۋرالى شەشىم كولىك مينيسترلىگىنىڭ 492-بۇيرىعىمەن قابىلدانادى. سودان كەيىن وسى تالاپتاردى بۇزعانى ءۇشىن دەپ 667-باپپەن ءىس قوزعالادى. بۇل باپتى قاراۋ سوتتىڭ قۇىزرەتىندە بولادى، ياعني ايىپتى 15 تاۋلىككە قاماۋعا الىنادى، نەمەسە 30 ا ە ك ايىپپۇل تولەيدى. دەگەنمەن بۇل جەردە باستى ماقسات - پروفيلاكتيكالىق جۇمىستار. بيىل ازىرگە ەشكىم جاۋاپقا تارتىلعان جوق، - دەدى سپيكەر.

جول ءدال بوران سوعىپ تۇرعان جەردە ەمەس، شامالى 10-20 شاقىرىم قاشىقتىقتان، اينالما جولى بار جەردەن جابىلادى.

- كەي جۇرگىزۋشىلەر «الدىمىز اشىق، بوران جوق، جولدى نەگە جاپتىڭدار؟» دەپ رەنجيدى. جيىرما شاقىرىمنان كەيىن جولدا نە بوپ جاتقانىن بىلمەيدى. ول جەردە اينالما جول بولماعاندىقتان، ولاردى قۇتقارۋ مۇمكىندىگى دە شەكتەۋلى بولادى، - دەيدى اينۇر بورانوۆا.