بولات وتەمۇراتوۆ استاناداعى مۇقتاج جاندارعا 500 پاتەردىڭ كىلتىن سىيلادى
استانا. قازاقپارات - بولات وتەمۇراتوۆتىڭ قايىرىمدىلىق قورى استانا اكىمدىگىنە 500 پاتەردى رەسمي تۇردە تاپسىرىپ، ولاردى تۇرعىن ۇيگە مۇقتاج ازاماتتار اراسىندا ۇلەستىردى. پاتەرلەردىڭ جالپى قۇنى 10,5 ميلليارد تەڭگەنى قۇرايدى، دەپ حابارلادى turkystan.kz.
«بالامەكەن» قايىرىمدىلىق جوباسى اياسىندا جاڭا پاتەرگە يە بولعاندار قاتارىندا دارىگەرلەر، مۇعالىمدەر، قۇتقارۋشىلار جانە بيۋدجەتتىك سالانىڭ باسقا دا قىزمەتكەرلەرى بار.
بارلىق ۇيلەر جىلدام ليفتىلەرمەن، بەت-الپەتتى تانۋ جۇيەسىمەن، جەراستى اۆتوتۇراقتارىمەن جابدىقتالعان جانە اۋلا اۋماعى كەڭ.
استانا قالاسىنىڭ اكىمى جەڭىس قاسىمبەك بۇل ماڭىزدى ءارى ۋاقتىلى قايىرىمدىلىق جوباسى ءۇشىن العىسىن ءبىلدىردى. «بۇل باستاما - بيزنەستىڭ الەۋمەتتىك جاۋاپكەرشىلىگىنىڭ جانە قوعام يگىلىگى ءۇشىن جاسالعان ىنتىماقتاستىقتىڭ جارقىن ۇلگىسى. ازاماتتارىمىزدىڭ ءومىر ءسۇرۋ جاعدايىن جاقسارتۋعا قوسقان ۇلەسى ءۇشىن بولات وتەمۇراتوۆ قورىنا العىسىمىزدى بىلدىرەمىز»، - دەپ اتاپ ءوتتى ەلوردا اكىمى.
جاڭا پاتەرگە يە بولعان ءورت ءسوندىرۋشى ەرلان شايحىموۆ ءوز اسەرىمەن ءبولىستى.
«مۇنداي پاتەردى الۋ - ءبىز ءۇشىن ناعىز مەرەكە. مەن بەس بالانىڭ اكەسىمىن، بۇل - ءبىز ءۇشىن ۇلكەن قولداۋ. ەندى ءبىز بولاشاعىمىزعا سەنىممەن قاراپ، الاڭسىز ءومىر سۇرە الامىز. وسىنداي مۇمكىندىك ءۇشىن العىسىمىز شەكسىز»، - دەدى ول.
بولات وتەمۇراتوۆ قورىنىڭ «بالامەكەن» قايىرىمدىلىق جوباسى 2019 -جىلى باسپاناعا مۇقتاج قازاقستاندىقتاردى تۇرعىن ۇيمەن قامتاماسىز ەتۋ ماقساتىندا ىسكە قوسىلعان. جوبا اياسىندا اقتوبە، اقمولا، قىزىلوردا جانە تۇركىستان وبلىستارىندا شامامەن 1000 وتباسى، ونىڭ ىشىندە مۇمكىندىگى شەكتەۋلى جاندار، كوپبالالى وتباسىلار مەن تابيعي اپاتتاردان زارداپ شەككەندەر بار - ءوز باسپاناسىنا قول جەتكىزدى.
