بولاشاقتا پويىزدار ۇشاقپەن جارىساتىن بولادى

استانا. قازاقپارات- كولىك يندۋسترياسىندا باسەكە كوپ. زاۋىتتار ءتۇرلى ادىسكە كوشتى. ال تەحنيكانىڭ شاپشاڭدىعى ارتقان ۇستىنە ارتىپ بارادى. ءتىپتى پويىزدار ۇشاقپەن جارىساتىن بولدى، دەپ حابارلايدى 24kz.

بۇل اۋە قاتىناسىنا ايتارلىقتاي اسەر ەتۋى مۇمكىن. جالپى الەم ەلدەرىندەگى جۇردەك پويىزداردىڭ دامۋ قارقىنى قانداي؟

الەمدەگى ەڭ العاشقى جوعارى جىلدامدىقتى پويىز جاپونيادا پايدا بولعانىمەن، قازىر ەڭ جىلدامى قىتايدا، ول - شاڭحاي ماگليەۆى. ماگليەۆ ءسوزى ماگنيتتى ليەۆيتاتسيا دەگەن سوزدەردىڭ قىسقارتىلعان ءتۇرى. ياعني، بۇل تەحنولوگيانىڭ سىرى ماگنيتتەردىڭ ءوزارا ارەكەتىندە جاتىر، ولاردىڭ بىردەي پوليۋستەرى كەرى تەبەدى.

قىتايلىقتار ماقتان تۇتاتىن ماگليەۆ ساعاتىنا 460 شاقىرىم جىلدامدىقپەن جۇرەدى. پويىز شاڭحايداعى پۋدونگ حالىقارالىق اۋەجايىنان لونگيان مەترو ستانسياسىنا دەيىن بارادى. 30 شاقىرىمدىق جولدى 7 مينۋت 20 سەكۋندتا ەڭسەرەدى. قىتاي بۇل قارقىننان تايماق ەمەس. بىرەر كۇن بۇرىن شاڭحاي - چۇڭشين- چىڭدۋ اراسىنداعى جوعارى جىلدامدىقتى پويىزدار ءۇشىن چۋنتاي - ياڭجى تۋننەلىنىڭ قۇرىلىسى باستالدى.

شان ۆەي، قىتايداعى تەمىرجول جەلىلەرى بويىنشا مەنەدجەر:

- بۇل جوباعا جاڭا تەحنولوگيالاردى ەنگىزدىك. «اقىلدى» ماشينانىڭ كومەگىمەن، كەدەرگىلەردى اۆتوماتتى تۇردە بولدىرماۋعا الدىن الا ارەكەت ەتۋگە بولادى. ياعني، باسىپ وزۋ جانە كۇتپەگەن كەدەرگىلەر كەزىندە توتەنشە تەجەۋ سياقتى ماسەلەلەردى رەتتەپ وتىرامىز.

ەكىنشى جىلدام پويىز دا قىتايدا. 2010 -جىلدان بەرى وتاربا شاڭحاي مەن نانجيڭدى بايلانىستىرادى. قازىر شاڭحايدان حاڭجوۋعا جانە ۋحاننان گۋاڭجوۋعا باراتىن پويىز دا ساعاتىنا 379 شاقىرىم جىلدامدىقپەن جۇرەدى.

يتاليانىڭ «قىزىل جەبەسى» دەگەن اتپەن تانىمال پويىز

ەۋروپاداعى ەڭ جىلدام پويىز. ميلاننان فلورەنسياعا نەمەسە ريمگە جولاۋشىلاردى 3 ساعاتتا جەتكىزەتىن پويىز ساعاتىنا 354 شاقىرىم جىلدامدىقپەن جۇرەدى. كەلەسى يسپانياداعى ەڭ جىلدام پويىز - Siemens كومپانياسى شىعارعان Velaro E. بۇل جولاۋشىلاردى بارسەلونادان پاريجگە 6 ساعاتتا جەتكىزە الادى جانە ساعاتىنا 349 شاقىرىم جىلدامدىقپەن جۇرەدى.

يلون ماسك 1 ساعاتتا كەز كەلگەن جەرگە جەتكىزەتىن پويىزدىڭ يدەياسىن ۇسىندى

يلون ماسك لوس-اندجەلەستەن سان-فرانسيسكوعا بار بولعانى 30 مينۋتتا جەتۋگە بولاتىن كولىك ءتۇرىنىڭ جوباسىن ۇسىنعان بولاتىن. ال ەكى قالانىڭ اراسى ۇشاقپەن 1 ساعات، جەڭىل كولىكپەن 6 ساعات. بۇل وسىدان 11 جىل بۇرىنعى يدەيا. يلون ماسك بۇل كولىكتى پويىز، ۇشاق، اۆتو جانە كەمەدەن كەيىنگى بەسىنشى كولىك ءتۇرى رەتىندە تانىستىرعان.

Hyperloop ارنايى تىرەۋلەردىڭ ۇستىنەن وتەتىن جەر ءۇستى قۇبىرى سەكىلدى ويلاستىرىلعان. ال ونىڭ ىشىندە ساعاتىنا 480 مەن 1220 شاقىرىمعا دەيىن قوزعالاتىن كاپسۋلالار بولادى. كاپسۋلانىڭ ۇزىندىعى شامامەن 25-30 مەتر جانە قاتىناۋ ارالىعى - 30 سەكۋند. Hyperloop جوباسى جۇزەگە اساتىن بولسا، ادام جانە جۇك تاسىمالى سالاسىندا ۇلكەن توڭكەرىس بولماق. سول يدەيانىڭ تەستتىك نۇسقاسى ءساتتى ورىندالدى، دەگەنمەن، Hyperloop جۇمىس ىستەۋ ءۇشىن قانشا ەنەرگيا قاجەت ەكەنى ءالى بەلگىسىز.

قازىر كوپتەگەن ەل جوعارى جىلدامدىقتى ەلەكتر پويىزدارىن ەنگىزۋدى قولعا السا، عالىمدار ماگنيتتى ليەۆيتاتسيانى دامىتۋدى تالقىلاپ جاتىر. ەگەر ماگنيتتى ليەۆيتاتسيالى پويىزدى ۆاكۋۋمدىق تۋننەلدە جۇرگىزسە، اۋا كەدەرگىسىنەن قۇتىلۋعا بولادى. ءىس جۇزىندە مۇنداي پويىزداردىڭ جىلدامدىعى ساعاتىنا 6000-8000 ك م- گە دەيىن جەتەدى.

توكيودان توياما مەن كانازاۆاعا «جاپون ءالپى» ارقىلى اپاراتىن حوكۋريكۋ شينكانسەن E7 جاپونياداعى ەڭ سۇرانىسقا يە پويىزداردىڭ ءبىرى. جاپونيانىڭ تاريحي اسەم جەرلەرىنە اپاراتىن Hokuriku Shinkansen E7 ساعاتىنا 259 شاقىرىم جىلدامدىقپەن قوزعالادى. بۇل ءتىزىمدى امەريكالىق پويىزبەن اياقتايىن. 2000 -جىلى ىسكە قوسىلعان Amtrak Acela بوستون، نيۋ- يورك، فيلادەلفيا، بالتيمور جانە ۆاشينگتون DC اراسىندا ساعاتىنا 241 شاقىرىم جىلدامدىقپەن جۇرەدى.