بولاشاقتا «وقجەتپەس» برەندىمەن الەمگە تانىلساق دەگەن نيەتىمىز بار - ايان اقمۇرزين
استانا. KAZINFORM - ۇلى دالادا ءومىر سۇرگەن حالقىمىزدىڭ ءداستۇرلى تىرشىلىك داعدىسى، ءومىر سالتى تابيعاتپەن تىعىز بايلانىستى. ال قازىرگى ادامدار دا دەنساۋلىققا پايدالى وسىنداي تابيعات اياسىندا دەمالىپ، سەرۋەندەۋدى ۇناتادى.
قاراعايلى ورماندا تازا اۋامەن تىنىستاپ، شيپالى تۇنىق سۋدان قۋات الىپ، قۇستارى سايراعان تاۋدا سەرۋەن- سەيىل قۇراتىن ونداي جايلى مەكەندى ق ر پرەزيدەنت ءىس باسقارماسى مەديتسينالىق ورتالىعىنا قارايتىن «وقجەتپەس» ەمدەۋ-ساۋىقتىرۋ كەشەنىنەن كورەسىز. جىل وتكەن سايىن كەڭەيىپ، كەمەلدەنىپ، الىس-جاقىنعا داڭقى شىعىپ جاتقان تەڭدەسىز كۋرورت بۋرابايدا ورنالاسقان «وقجەتپەس» ەمدەۋ-ساۋىقتىرۋ كەشەنىنىڭ باسقارۋشى ديرەكتورى ايان اقمۇرزيننەن وتاندىق شيپاجايدىڭ قازىرگى جاي-كۇيى، جۇمىس باعىتى، بولاشاق جوسپارلارى تۋرالى كەڭىرەك كەڭەسىپ بىلدىك.
- ايان مىرزا، «وقجەتپەس» شيپاجايى قوناقتارىنا قانداي ەم جاساپ سەرگىتىپ، دەنساۋلىعىن وڭالتۋعا كومەكتەسەدى؟
- «وقجەتپەس» ەمدەۋ-ساۋىقتىرۋ كەشەنىنىڭ ىرگەتاسى قالانعانىنا بيىل 60 جىل تولادى. «وقجەتپەس» كەشەنىندەگى قازىرگى زامانعى ەمدەۋ- دياگنوستيكالىق بازامەن تولىقتىرىلعان تابيعي بىرەگەي فاكتورلار: قاراعاي ورمانىنىڭ ەكولوگيالىق تازا اۋاسى، بالپاش سور كولىنىڭ ەمدىك بالشىعى جانە ماي بالىق كولىنىڭ مينەرالدى سۋى، رادوندى تەراپيا، «قۇلاگەر - اراسان» مينەرالدى سۋى جۇرەك- تامىر جۇيەسى، تىنىس الۋ مۇشەلەرى، تىرەك-قيمىل اپپاراتى، اس قورىتۋ، قان اينالىمى جانە جۇيكە جۇيەسى اۋرۋلارىن، ۋرولوگيالىق جانە گينەكولوگيالىق اۋرۋلاردى ەمدەۋگە جانە وڭالتۋعا مۇمكىندىك بەرەدى.
مىسالى، بالپاش سور كولىنىڭ بالشىعى تىرەك-قيمىل جۇيەسى اۋرۋلارىن، ارتروزدى، ءارتريتتى، ومىرتقا وستەوحوندروزىن ەمدەۋگە كومەكتەسەتىن بيولوگيالىق بەلسەندى بالشىق بولىپ ەسەپتەلەدى. بۇل تىرەك-قيمىل اپپاراتىنىڭ اۋرۋلارىن ەمدەپ قانا قويماي، قابىنۋعا قارسى اسەر ەتەدى. شيپاجايدىڭ سۋ ەمحاناسىندا ۆاننانىڭ بەس ءتۇرى سۋ ماسساجى، قىلقان جاپىراقتى ۆاننا، ءتورت كامەرالى ۆاننا مەن مينەرالدى ۆاننا بار. سونىمەن بىرگە مينەرالدى سۋ ينگالياتسياسى، دارىلىك زاتتار ينگالياتسياسى جانە ءشوپ تۇنبالار ينگالياتسياسى سەكىلدى ءتۇرلى ينگالياتسيالار دا جاسالادى. دارىگەردىڭ نۇسقاۋى بويىنشا كەلۋشىلەر ءشوپ تۇنبالارىنان بۇقتىرىلعان شاي تۇرلەرىن، وتتەگى كوكتەيلدەرىن ىشە الادى.
سونداي- اق، كەلۋشىلەر اراسىندا بۇعى مۇيىزىنەن الىناتىن پانتا تەراپياسىنا سۇرانىس جوعارى. جالپى الەمدە بۇعىنىڭ ءمۇيىزى مەن قانى ەمدىك ماقساتتا كەڭىنەن قولدانىلادى. سول پانتوتەراپيانىڭ ارقاسىندا يممۋنيتەت جاقسارىپ، دەنەنىڭ ءارتۇرلى ينفەكسيالارعا توزىمدىلىگى ارتادى. ول ءۇشىن مۇنداعى بۇعى ءمۇيىزىنىڭ سورپاسى قۇيىلعان ۆانناعا، پانتالى بۋ ساۋناسىنا تۇسە الادى.
- قازاقتىڭ ۇلى دالاسىنداعى «وقجەتپەس» كەشەنى قوناقتارعا ۇلتتىڭ سالت-ءداستۇرىن، بولمىسىن ناسيحاتتاۋعا باعىتتالعان «Qazaq nomad» جوباسىن دا جاساپ شىعىپتى…
- ءبىز قازاق مادەنيەتىن، داستۇرلەرىن قىزمەتىمىزگە، تاماق مازىرىنە، بولمەلەردى ناقىشتاۋعا پايدالاندىق. كول جاعاسىندا، ورمان ىشىمەن سەرۋەندەيتىن جاياۋ جۇرگىنشىلەر سۇرلەۋى بار. سول جولمەن جۇرگەن دەمالۋشىلار 100 مەتر سايىن ورناتىلعان ءار تاقتايشالاردان «قوزى كورپەش-بايان سۇلۋ» ليرو-ەپوستىق جىرىنىڭ ۇزىندىلەرىن وقىپ نەمەسە اۋديو نۇسقاسىن تىڭداي الادى. سونداي-اق، تاماق مازىرىنە دە قىمىز، باۋىرساق، جەنت سەكىلدى دەنساۋلىققا پايدالى ۇلتتىق تاعامدار قوسىلعان.
سونىمەن بىرگە كەلۋشىلەر كيىز ءۇيدىڭ شيپالى اۋاسىمەن تىنىستاپ، ءتاتتى، سىرلى سارىندى قازاق كۇيلەرىن تىڭداپ ساناسىن سەرگىتىپ، راحاتتانىپ دەمالادى. بۇدان بولەك ارنايى دايىندالعان الاڭدا ساداق اتىپ، قازاقتىڭ جاۋىنگەرلىك رۋحىن سەزىنىپ، سەرپىلىپ، سەرگيدى. وسىلاردىڭ بارلىعى ءبىزدىڭ ەم الۋشىلاردىڭ، اسىرەسە شەتەلدىك قوناقتاردىڭ ەرەكشە ىقىلاسىن وياتىپ، قىزعۋشىلىعىن تۋدىردى. ءبىز وسىلايشا الىس-جاقىنان كەلگەن قوناقتارىمىزعا حالقىمىزدىڭ سالت-ءداستۇرىن، بولمىسىن ناسيحاتتاي وتىرىپ، دەنساۋلىقتارىنىڭ دا وڭالۋىنا كومەكتەسەمىز.
- ەندى «وقجەتپەس» ەمدەۋ-ساۋىقتىرۋ كەشەنىنىڭ جەتىستىكتەرى، بولاشاق جوسپارلارى تۋرالى ايتساڭىز؟
- بۋرابايداعى بۇل شيپاجايدىڭ 1965 -جىلى جۇمىسىن باستاعاننان بەرگى شەجىرەسىنە قاراساڭىز ۇزدىكسىز دامىپ، كەمەلدەنىپ، ءوسىپ وتىرعانىن كورەسىز. ال، سوڭعى جىلدارداعى جەتىستىكتەرىنە شولۋ جاساساق، 2006 -جىلى اندورردا دۇنيە جۇزىلىك سۋمەن جانە كليماتپەن ەمدەۋ فەدەراتسياسىنىڭ باس اسسامبلەياسىمەن ساناتوريالىق-كۋرورتتىق ەمدەۋدى ۇيىمداستىرۋداعى جەتىستىكتەرى جانە دۇنيەجۇزىلىك دەنساۋلىق ساقتاۋ ۇيىمدارىنىڭ اراسىندا بەلسەندى عىلىمي جۇمىستارى ءۇشىن «وقجەتپەس» ە س ك- نە «الەمدەگى ەڭ ۇزدىك كۋرورت» ماراپاتى تابىس ەتىلدى.
2011 -جىلى ساناتوري مەنشىكتى بۇلاقتىڭ رادوندى سۋىن پايدالانۋ ارقىلى جاڭا مەديتسينالىق قىزمەت كورسەتۋ - رادوندى تەراپيانى ەنگىزدى. 2012 -جىلى مامىردا لوندوندا ( ۇلى بريتانيا) بريتان ينستيتۋتى ديرەكتورلارىنىڭ شەشىمىمەن ءبىزدىڭ ەمدەۋ-ساۋىقتىرۋ كەشەنى «ەۋروپالىق ساپا» حالىقارالىق ماراپاتقا يە بولدى. 2019-جىلى «ۇزدىك شيپاجاي» ماراپاتىنا يە بولىپ، قازاقستان شيپاجايلارى اراسىندا العاش EuroSpa سەرتيفيكاتىنا يە بولدى. «وقجەتپەستە» حالىقارالىق ستاندارتتارعا سايكەس ساپا مەنەدجمەنتىنىڭ جۇيەسى بار. 2014-جىلى جىل سايىن راستايتىن «4 جۇلدىزدى قوناق ءۇي» جانە «جوعارى ساپالى مەيرامحانا» ساناتىنا سايكەستىك سەرتيفيكاتىن الدى.
2017-جىلدىڭ 27-شىلدەسىنەن باستاپ، قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ ەمدەۋ-ساۋىقتىرۋ كەشەندەرى «وقجەتپەس» برەندىمەن ءبىرىڭعاي جەلىگە بىرىگىپ، قۇرامىنا بۋراباي كۋرورتتىق ايماعىنداعى «وقجەتپەس»، الماتى قالاسىنداعى «Almaty Resort» جانە ر ف ەسسەنتۋكي كۋرورت-قالاسىنداعى «قازاقستان» شيپاجايى كىردى.
قازىرگى ۋاقىتتا ق ر پرەزيدەنتى ءىس باسقارماسى مەديتسينالىق ورتالىعى ءبىزدىڭ ەلىمىزدىڭ ەڭ جاقسى كۋرورتتارىن بىرىكتىرۋ ءۇردىسىن ودان ارى جالعاستىرىپ قىرعىزستاننىڭ ىستىق كولىندەگى «قازاقستان» شيپاجايىن جاڭارتۋ بويىنشا جۇمىستاردى باستاپ كەتتى. وسى ورتالىق الداعى 4-5 جىلدا تولىق جاسالىپ، جابدىقتالىپ، ەڭ جاڭا كەمەلدى كەشەنگە اينالادى دەپ وتىرمىز. سونىمەن بىرگە، سارى اعاشتا شيپاجاي سالۋ نەمەسە جاڭارتۋ جوباسى جوسپارلانعان. ال شىعىس قازاقستان وبلىسىنداعى تارباعاتاي تاۋلارىنىڭ قويناۋىنداعى شيپاجايدى دا ءبىزدىڭ بالانىسقا وتكىزۋ جۇمىستارى ءجۇرىپ جاتىر. بۇدان باسقا بۋراباي تاۋلارىندا وسىدان 4 جىل بۇرىن سالىنعان «اق بۋرا» كەشەنى دە جىل سوڭىنا دەيىن ءبىزدىڭ ورتالىقتىڭ قۇرامىنا كىرەدى دەپ وتىرمىز. بولاشاقتا وسىنداي 6-7 ەمدەۋ- ساۋىقتىرۋ كەشەنىن بىرىكتىرىپ ۇلكەن ورتالىققا اينالىپ، ۇلت دەنساۋلىعى ءۇشىن ساپالى جۇمىس جاساپ، «وقجەتپەس» برەندىمەن الەمگە تانىلساق دەگەن نيەتىمىز بار.
- وسىنداي اۋقىمدى جۇمىستىڭ بارىسىن بايانداپ اڭگىمە وربىتكەنىڭىزگە راقمەت! بولاشاقتاعى ىرگەلى ىستەرىڭىز جەمىستى بولسىن!
سۇحباتتاسقان باقىتجول كاكەش
