بولاشاقتا جۇمىسسىز قالماۋ ءۇشىن قانداي ماماندىقتاردى مەڭگەرۋ كەرەك
استانا. KAZINFORM - قازاقستاندا 2 ميلليوننان استام جۇمىس ورنىن جاساندى ينتەللەكت الماستىرۋى مۇمكىن. بۇل تۋرالى حالىقتى جۇمىسپەن قامتۋ دەپارتامەنتىنىڭ باس ساراپشىسى نىسانباي سيسەن ايتتى.
مينيسترلىكتىڭ مالىمەتىنشە حاتشىدان باستاپ وپەراتور، ءتىپتى بۋحگالتەرگە دەيىن - كۇندەلىكتى قۇجات پەن مالىمەت وڭدەۋمەن اينالىساتىن قىزمەتتەر ۇلكەن قاۋىپ ايماعىندا ەكەن.
- ەڭبەك مينيسترلىگى جي سالاسىنداعى جۇمىسشى ماماندارعا قاتىستى تالداۋ جۇرگىزدى. ەسەپ- قيساپقا جاۋاپ بەرەتىن ماماندىقتار تىزىمدە كوش باستاپ تۇر، - دەيدى نىسانباي سيسەن.
دەسە دە، ماماندىق جابىلادى ەكەن دەپ قول قۋسىرىپ وتىرۋعا بولمايدى، - دەيدى ماماندار. كەرىسىنشە جاڭا پايدا بولاتىن قىزمەتتەردى مەڭگەرگەن دۇرىس. جاڭا ماماندىقتار مەن وسى باعىتتا بىلىكتىلىكتى ارتتىرۋ كۋرستارى تۋرالى تولىق اقپاراتتى Skills Enbek پلاتفورماسى ارقىلى بىلۋگە بولادى.
- Skills Enbek پلاتفورماسى ىسكە قوسىلدى. اتالعان پلاتفورمادا بولاشاقتا پايدا بولاتىن نەمەسە جويىلاتىن ماماندىقتار بويىنشا ءتيىستى دەرەكتەردى تابۋعا بولادى. كەز-كەلگەن ق ر ازاماتى قوسىمشاعا تىركەلىپ، وزىنە كەرەكتى اقپاراتتى الا الادى، - دەدى حالىقتى جۇمىسپەن قامتۋ دەپارتامەنتىنىڭ باس ساراپشىسى.
ال، قارجىگەرلەر جاساندى ينتەلەكتىدەن قورقۋعا بولمايدى. جۇمىستىڭ بارلىعىن كومپيۋتەرلىك جۇيە اتقارعانىمەن جاساندى زەيىن ادامنىڭ ورنىن باسا المايدى دەگەن پىكىردە.
- ءوزىم 23 جىلدىق تاجىريبەسى بار قارجى مامانى رەتىندە كەز-كەلگەن جۇيەنىڭ ءبىر بولىگىن عانا اۆتوماتتاندىرۋعا بولادى دەپ ويلايمىن. قاۋىپ-قاتەردى الدىن-الا بولجاپ، كەز-كەلگەن ادام قوسىمشا تابىس تاباتىن جولداردى قاراستىرۋى كەرەك. ايتقىم كەلگەنى وزگەرىستەردەن قورىقپاۋ كەرەك. ءول ۇشىن ىزدەنىپ، جاڭا دۇنيەلەردى مەڭگەرىپ، ءبىلىمىڭىزدى جەتىلدىرۋگە تىرىسقان ءجون. ال، جاساندى ينتەللەكت ءبىزدىڭ قوعامعا تولىق ەنۋى ءۇشىن ءالى شامامەن 5 جىلداي ۋاقىت قاجەت. وسى ۋاقىت ارالىعىندا كوپتەگەن ماماندىقتى مەڭگەرىپ الۋعا بولادى، - دەيدى قارجى سالاسىنىڭ مامانى اسەل جاراسقالي قىزى.
بۇعان دەيىن ەلىمىزدەگى ج و و- دا اتوم سالاسىنا قاتىستى جاڭا ماماندىقتار اشىلاتىنى تۋرالى جازعان بولاتىنبىز.
