بولاشاقتا حالىققا قىزمەت كورسەتۋ ورتالىقتارى جابىلۋى مۇمكىن با
الداعى ۋاقىتتا ەلىمىزدەگى حالىققا قىزمەت كورسەتۋ ورتالىقتارىن قىسقارتۋ قاراستىرىلىپ جاتقان جوق.

بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى اسەت تۇرىسوۆ ايتتى، دەپ حابارلايدى قازاقپارات ءتىلشىسى.
بۇگىن ءماجىلىستىڭ جالپى وتىرىسىندا دەپۋتات مارحابات جايىمبەتوۆ حالىققا قىزمەت كورسەتۋ ورتالىقتارىنىڭ بولاشاعى تۋرالى سۇرادى.
«ەلىمىزدە بۇل ورتالىقتاردىڭ بولاشاعى بار ما؟ كەز كەلگەن قىزمەت ءتۇرىن سمارتفوندار ارقىلى الىپ جاتىرمىز. سوندىقتان ح ق ك و-لار قىزمەتى قاجەت بولا ما؟»، - دەپ سۇرادى دەپۋتات.
ءوز كەزەگىندە سيفرلىق دامۋ ۆيتسە-مينيستر اسەت تۇرىسوۆ مەملەكەتتىك قىزمەتتەردىڭ 20 پايىزى حالىققا قىزمەت كورسەتۋ ورتالىقتارى ارقىلى ىسكە اسىرىلىپ جاتقانىن ايتتى.
«تۇرعىنداردىڭ كومپيۋتەردى نەمەسە باسقا دا قۇرىلعىلاردى مەڭگەرۋ دەڭگەيى ءارتۇرلى. سوندىقتان الداعى ۋاقىتتا دا ادامدار حالىققا قىزمەت كورسەتۋ ورتالىقتارىنىڭ كومەگىنە جۇگىنەتىنى انىق. اتاپ ايتقاندا، ح ق ك و-لاردى دامىتىپ، سونداي-اق «قازپوشتا» جۇيەسى ارقىلى مەملەكەتتىك قىزمەت كورەسەتۋ دەڭگەيىن كەڭەيتە الامىز. ونلاين رەجيمدە eGov mobile, eGov ارقىلى قىزمەت كورسەتۋدى جەتىلدىرەمىز»، - دەدى ۆيتسە- مينيستر.
سونىمەن قاتار، تىلشىلەر سۇراعىنا جاۋاپ بەرۋ كەزىندە «ازاماتتارعا ارنالعان ۇكىمەت» مەملەكەتتىك كورپوراتسياسى» كوممەرتسيالىق ەمەس اق باسقارما ءتوراعاسى سۇيەنىش ءابدىلدين ح ق ك و قىزمەتكەرلەرىن قىسقارتۋ قاراستىرىلماعانىن ايتتى.
«بيىل شىلدەدەن باستاپ قىزمەتكەرلەردىڭ جالاقىسىن 50 پايىزعا وسىردىك. جالپى، مامانداردى قىسقارتۋ ماسەلەسى كوتەرىلگەن جوق»، - دەدى ول.