«بولاشاق» شاحتاسىنداعى اۆاريانى تەرگەۋ جونىندەگى كوميسسيا قۇرىلدى

استانا. قازاقپارات – 27-مامىردا «قازحروم ترانسۇلتتىق كومپانياسى» ا ق فيليالى - دون تاۋ-كەن بايىتۋ كومبيناتىنىڭ «بولاشاق» شاحتاسىندا بولعان وقيعاعا بايلانىستى توتەنشە جاعدايلار ۆيتسە-ءمينيسترى سەرىك تولەنبەرگەنوۆ پەن ت ج م ونەركاسىپتىك قاۋىپسىزدىك كوميتەتى ءتوراعاسىنىڭ ورىنباسارى كەڭگىرباي ەسەنەيەۆ اقتوبە وبلىسىنا باردى.

- ۆيتسە-مينيستر كاسىپورىن باسشىلىعى مەن مەملەكەتتىك ورگاندار وكىلدەرىنىڭ قاتىسۋىمەن كەڭەس وتكىزدى. كەڭەس قورىتىندىسى بويىنشا ۆيتسە-مينيستر ونەركاسىپتىك قاۋىپسىزدىك كوميتەتى ءتوراعاسى ورىنباسارىنىڭ توراعالىعىمەن اۆاريانى تەرگەۋ جونىندەگى كوميسسيا قۇرۋدى تاپسىردى. كوميسسيا اۆاريانىڭ ءمان-جايى مەن سەبەپتەرىن انىقتايتىن بولادى. سۋتەگى شىعارىندىلارىنىڭ قايتالانۋىنا بايلانىستى جانە جۇمىسشىلاردىڭ قاۋىپسىزدىگىن قامتاماسىز ەتۋ ماقساتىندا شاحتاداعى بارلىق جۇمىستى ۋاقىتشا توقتاتا تۇرۋ تۋرالى شەشىم قابىلداندى، - دەلىنگەن ت ج م حابارلاماسىندا.

سونىمەن قاتار سۋتەگى مەن باسقا دا ىلەسپە گازداردى ءبولۋ ماسەلەسىن، ولاردىڭ جۇمىس جۇرگىزۋ قاۋىپسىزدىگىنە اسەرىن زەرتتەۋ بويىنشا عىلىمي- زەرتتەۋ ينستيتۋتتارىن تارتۋ قاجەتتىلىگى اتاپ ءوتىلدى.

- ۆيتسە-مينيستر اۋرۋحانادا جاتقان زارداپ شەككەندەر ادامدارعا بارىپ، تەز ساۋىعىپ كەتۋلەرىنە تىلەكتەستىك ءبىلدىردى، - دەلىنگەن حابارلامادا.

ەستەرىڭىزگە سالا كەتەيىك، 26-مامىردا شاحتادا سۋتەگى ءبولىنىپ، سودان كەيىن ءورت شىقتى. وقيعا سالدارىنان ءۇش قىزمەتكەر ءارتۇرلى دارەجەدە كۇيىك الدى.

بۇعان دەيىن حابارلاعانىمىزداي، ءدوڭ تاۋ- كەن بايىتۋ كومبيناتىنىڭ «بولاشاق» شاحتاسىنداعى كەن ءوندىرۋ بلوگىندا ەلەكتر جابدىقتارىن مونتاجداپ جاتقان ءۇش كەزەكشى ەلەكتروسلەساردى كۇيىك شالدى. ەكى ناۋقاس اۋىر جاعدايدا جانساقتاۋ بولىمىنە جەتكىزىلگەن. ءۇشىنشى ناۋقاس تراۆماتولوگيا بولىمىندە ەم الىپ جاتىر.

ەسكە سالساق، بيىل اقپان ايىندا حرومتاۋ اۋدانىنداعى ءدال وسى «بولاشاق» شاحتاسىندا قىسقا مەرزىمدى تۇيىقتالۋ بولىپ، 4 جۇمىسشىنى كۇيىك شالدى. كوپ ۇزاماي ءبىر جۇمىسشى كوز جۇمدى. سونىمەن قاتار ءدوڭ كەن-بايىتۋ كومبيناتىنداعى وقيعادان سوڭ قىلمىستىق ءىس قوزعالدى.