بوكستان قازاقستان قۇراماسى 2025 -جىلى ەكى الەم بىرىنشىلىگىنە قاتىسادى
استانا. KAZINFORM - بوكستان قازاقستان ەرلەر قۇراماسىنىڭ باس باپكەرى ۇلتتىق كوماندانىڭ 2025 -جىلعا ارنالعان جوسپارلارىمەن ءبولىستى. بۇل تۋرالى قايرات ءساتجانوۆ «سپورت ءمينيسترى» YouTube-كانالىنا بەرگەن سۇحباتىندا ايتتى.
1bol.kz سپورتتىق پورتالىنىڭ مالىمەتىنشە، كەلەسى جىلى قازاقستاندىق بوكسشىلار ەكى الەم چەمپيوناتىندا باق سىنايدى. ونىڭ ءبىرىنشىسىن IBA (حالىقارالىق بوكس قاۋىمداستىعى)، ەكىنشىسىن World Boxing ۇيىمداستىرادى.
جارىستارعا دايىندىق اياسىندا بىرنەشە وقۋ- جاتتىعۋ جيىنى مەن تۋرنير جوسپارلانىپ وتىر. اتاپ ايتقاندا، قاڭتار ايىندا يسپانيادا بىرلەسكەن جاتتىعۋ لاگەرى وتكىزىلىپ، سول جەردە حالىقارالىق تۋرنير ۇيىمداستىرىلادى. اقپاندا بولگاريادا ءداستۇرلى «ستراندجا كۋبوگى» تۋرنيرى وتەدى. ناۋرىزدا رەسەيدىڭ كيسلوۆودسك قالاسىندا رەسەي، وزبەكستان جانە ازەربايجان قۇرامالارىمەن بىرلەسكەن جاتتىعۋلار مەن تۋرنير جوسپارلانعان.
IBA ۇيىمداستىراتىن الەم چەمپيوناتى مامىر ايىندا تۇركيادا وتەدى. بۇرىن بۇل تۋرنير استانادا وتكىزىلەدى دەپ جوسپارلانعان ەدى. دەگەنمەن جوسپار وزگەرىپ كەتتى. ال World Boxing چەمپيوناتى قىركۇيەك ايىندا العاش رەت جالاۋىن جەلبىرەتەدى.
قايرات ءساتجانوۆ بارلىق بوكسشى وسى تۋرنيرلەر مەن جاتتىعۋ جيىندارىنا قاتىساتىنىن اتاپ ءوتتى. سول بويىنشا ۇلتتىق قۇرامانىڭ ءار سپورتشىسىنىڭ قابىلەتتەرى باعالانىپ، جوسپار قۇرىلادى.
