بوكستان الەم چەمپيوناتىندا جەتىستىككە جەتكەن ايەلدەر قۇراماسى الماتىعا ورالدى
الماتى. KAZINFORM - ليۆەرپۋلدە وتكەن بوكستان الەم چەمپيوناتىنان ورالعان قازاقستاننىڭ ايەلدەر قۇراماسىن الماتى اۋەجايىندا سالتاناتتى تۇردە قارسى الدى، دەپ حابارلايدى Kazinform ءتىلشىسى.
15 نەن 16-قىركۇيەككە قاراعان ءتۇنى الماتى اۋەجايىندا ەرەكشە اتموسفەرا ورنادى. بۇل ۋاقىتتا ليۆەرپۋلدە وتكەن بوكستان الەم چەمپيوناتىنان ورالعان قازاقستاننىڭ ايەلدەر قۇراماسىن كۇتىپ الۋ شاراسى ءوتتى. كۇتىپ الۋشىلار قاتارىندا Kazinform ءتىلشىسى دە بولىپ، ەل ماقتانىشتارىمەن سۇحباتتاستى.
قازاقستاننىڭ ايەلدەر قۇراماسى 2025 -جىلعى بوكستان الەم چەمپيوناتىندا مەدالدار سانى بويىنشا جالپىكوماندالىق ەسەپتە ءبىرىنشى ورىندى يەلەندى. سونىمەن قاتار ەلدىڭ ابسوليۋتتىك جەڭىسىنە زور ۇلەس قوستى - 7 التىن، 1 كۇمىس جانە 2 قولا مەدال. قۇراما تۇنگى ۋاقىتتا ۇشىپ كەلسە دە، ولاردى قارسى الۋعا تەك تۋىستارى مەن جاقىندارى عانا ەمەس، كوپتەگەن جانكۇيەر دە كەلگەن. سالتاناتتى اتموسفەرانى اسكەري وركەستر مەن دومبىراشىلار جانداندىرا ءتۇستى.
الۋا بالقىبەكوۆا، نازىم قىزايباي، ناتاليا بوگدانوۆا، ايدا ابىكەنوۆا، ۆيكتوريا گرافەيەۆا جانە ەلدانا ءتالىپوۆا جالپى زالعا شىققان بويدا ءداستۇر بويىنشا باۋىرساق پەن قىمىزدان ءدام تاتتى. كەيىن ولار جاقىندارىمەن قاۋىشتى.
26 جاستاعى الەم چەمپيونى ناتاليا بوگدانوۆا Kazinform تىلشىسىنە بەرگەن سۇحباتىندا مۇنداي كەرەمەت قارسى الۋدى كۇتپەگەنىن ايتتى.
- ارينە، ءبىزدى قولدايتىن، بىزگە سەنەتىن وتانداستارىمىزدىڭ بارىنا قۋانىشتىمىز. ءبىز سول ءۇشىن جاتتىعىپ، ەلىمىز ءۇشىن جارىسقا شىعامىز. چەمپيوناتتاعى ەڭ قيىن جەكپە-جەك؟ جەرگىلىكتى سپورتشىمەن (اعىلشىنمەن - اۆت.) بولعان كەزدەسۋ. ونىڭ ءوز ەلىندە ەكەنىن جاقسى تۇسىندىك، مەن بار كۇشىمدى سالىپ، فينالعا وتۋگە تىرىستىم. جانە ول مەنىڭ قولىمنان كەلدى، - دەدى بوگدانوۆا.
ونىڭ ايتۋىنشا، الداعى جوسپارلار - الدىمەن دەمالۋ، كەيىن جاڭا تۋرنيرلەرگە دايىندالۋ.
الەم چەمپيوناتىنىڭ قولا جۇلدەگەرى 24 جاستاعى ۆيكتوريا گرافەيەۆا اۋەجايداعى قارسى الۋ وتە اسەرلى بولعانىن ايتتى.
- قانشاما ادام كەلىپ قولدادى - تۋىستار، جانكۇيەرلەر، بارلىعى قۇتتىقتاپ، قولداۋ ءبىلدىردى. ءبىز، سپورتشىلار، ەڭ الدىمەن ەلىمىزدىڭ ابىرويى ءۇشىن ونەر كورسەتەمىز. حالىقتىڭ وسىنداي قولداۋىن كورۋ - ۇلكەن قۋانىش. مەن قولا جۇلدەگەر اتانسام دا، حالىقتىڭ قولداۋى جىگەر بەرەدى. كەلەسى جارىستاردا بۇدان دا جوعارى مەدال الۋعا تىرىسامىن، - دەدى گرافەيەۆا.
ونىڭ ايتۋىنشا، ەڭ قيىن جەكپە-جەك العاشقىسى بولعان، سەبەبى ول كەزدە قارسىلاسى وتە تاجىريبەلى سپورتشى بولعان جانە ءوزى ءسال سۋىق تيگىزىپ العان ەكەن.
- ءبىراق تۋرنيردىڭ سوڭىنا قاراي قارقىن الىپ، جەڭىلدەۋ بولدى. جارتىلاي فينالدا تورەشىلەر جەڭىستى قارسىلاسقا بەردى، ءبىراق مەن ءوز جەكپە-جەگىمدە جەڭىلدىم دەپ سانامايمىن. تورەشىلەردىڭ شەشىمى سولاي بولعانىمەن، ەندى كەلەسىدە ولاردا ەش كۇمان تۋماۋى ءۇشىن بارىمدى سالۋ كەرەك، - دەپ تۇيىندەدى گرافەيەۆا.
قۇرامانىڭ ەڭ اتاقتى سپورتشىسى، ءۇش دۇركىن الەم چەمپيونى، 32 جاستاعى نازىم قىزايباي ليۆەرپۋل-2025 جارىسىندا كۇمىس جۇلدە يەلەندى. الايدا بۇل ناتيجەدەن ونىڭ كوڭىلى تۇسپەي، كەرىسىنشە، العا جەتەلەيدى ەكەن.
- مەنىڭ باستى ماقساتىم - 2028 -جىلعى وليمپيادادا التىن مەدال يەلەنۋ. مۇمكىن، سالماق دارەجەسىن اۋىستىرۋ كەرەك بولار. مەن وعان دايىنمىن، باستىسى - ماقساتقا جەتۋ، - دەدى نازىم قىزايباي.
جانكۇيەرلەرمەن سۋرەتكە تۇسكەننەن كەيىن، قىزدار جاقىندارىمەن قايتا قاۋىشۋعا مۇمكىندىك الدى.
الدا - قىسقا دەمالىس پەن وتباسىمەن وتكىزەتىن كوپتەن كۇتكەن ۋاقىت. ودان كەيىن كۇش جيناعان سوڭ، سپورتشىلار قايتا جاتتىعۋعا كىرىسىپ، وتانداستارىن جارقىن جەڭىستەرىمەن تاعى دا قۋانتۋعا اتتانادى.
ەسكە سالايىق، قازاقستان بوكستىڭ وتانىندا - انگليادا وتكەن تاريحي الەم چەمپيوناتىندا زور تابىسقا قول جەتكىزدى. بۇل جەڭىستىڭ وتاندىق جانە الەمدىك سپورت ءۇشىن ماڭىزى ەرەكشە.
