بوكس فەدەراتسياسى: قىزايبايعا تولەم كەشىككەن جوق
استانا. KAZINFORM – قازاقستان بوكس فەدەراتسياسىنىڭ پرەزيدەنتى شاحمۋرات مۋتاليپ پاريج وليمپياداسىنداعى سىياقىلاردىڭ كەشىكتىرىلۋىنە قاتىستى پىكىر ءبىلدىردى.
2025-جىلدىڭ 20-مامىرىندا استانادا قازاقستان بوكس فەدەراتسياسىنىڭ جىلدىق كونفەرەنسياسى ءوتتى. جيىنعا ايماقتىق فەدەراتسيا باسشىلارى مەن ەرلەر قۇراماسىنىڭ باس باپكەرى قايرات ءساتجانوۆ قاتىستى.
سونداي-اق شاراعا قازاقستان بوكس فەدەراتسياسىنىڭ پرەزيدەنتى شاحمۋرات مۋتاليپ قاتىسىپ، Tengri Sport تىلشىسىنە پاريجدە وتكەن 2024-جىلعى وليمپيادا جۇلدەگەرلەرىنە جانە سەربياداعى ايەلدەر اراسىنداعى الەم چەمپيوناتىنىڭ مەدال يەگەرلەرىنە تولەمدەر تۋرالى سۇراقتارعا جاۋاپ بەردى.
- نۇربەك ورالباي مەن نازىم قىزايباي توعىز اي بويى سىياقىلارىن الا الماي ءجۇردى. مۇنداي جاعدايدا فەدەراتسيا سپورتشىلارىن مەملەكەت الدىندا قورعاي ما؟
«بىرەۋ ادەيى كەشىكتىرىپ جاتىر دەگەن دۇرىس ەمەس. مۇندا ءوز ەرەكشەلىكتەرى بار - مىسالى، دوپينگ-باقىلاۋ پروتسەسى 2-3 ايعا دەيىن سوزىلادى. ەگەر سپورتشى دوپينگ-تەستەن وتپەي قالسا، وعان تولەم دە بەرىلمەيدى. ءبىراق قازىر مەملەكەت بارلىعىن بەلگىلەنگەن مەرزىمدە ورىنداپ جاتىر دەپ ويلايمىن، ولار ءوز سىياقىلارىن الدى. ياعني رەسمي كەشىكتىرۋ بولعان جوق. سونىمەن قاتار وليمپيادادان كەيىن فەدەراتسيا تاراپىنان دا سىياقىلار بەرىلدى»، - دەدى شاحمۋرات مۋتاليپ.
- ال سەربياداعى الەم چەمپيوناتىنىڭ مەدال يەگەرلەرىنە تولەمدەر قالاي جۇرگىزىلىپ جاتىر؟
«فەدەراتسيا تاراپىنان تولەندى، ال IBA (حالىقارالىق بوكس قاۋىمداستىعى) تاراپىنان ازىرگە بەلگىسىز. بۇل ماسەلەنى ناقتىلاۋ كەرەك»، - دەپ قوستى ول.
ەسكە سالايىق، پاريجدەگى (فرانسيا) وليمپيادا ويىندارى وتكەن جىلدىڭ 11-تامىزىندا اياقتالعان بولاتىن. وندا قازاقستاندىق سپورتشىلار جەتى مەدال جەڭىپ الدى (1 التىن، 3 كۇمىس، 3 قولا).
زاڭ بويىنشا 49 سپورتشى مەن 63 جاتتىقتىرۋشى سىياقى الۋى ءتيىس ەدى. الايدا وليمپيادا اياقتالعاننان كەيىن سەگىز ايدان استام ۋاقىت وتسە دە، قاراجات كوپكە دەيىن بەرىلمەگەن. 2025-جىلدىڭ ءساۋىر ايىنىڭ سوڭىندا بۇل تۋرالى قولا جۇلدەگەر نازىم قىزايباي ءبىزدىڭ پورتالىمىزعا مالىمدەگەن ەدى. ول سونداي-اق وليمپيادادان كەيىن الماتى اكىمدىگى پاتەر مەن كولىككە سەرتيفيكات تابىستاعانىمەن، پاتەردىڭ كىلتىن ءالى الماعانىن ايتقان. اكىمدىك سول كەزدە تۇرعىن ءۇي 1,5-2 اي ىشىندە بەرىلەتىنىن ەسكەرتكەن.
نازىمنىڭ بۇل ءسوزى قوعام مەن مەديادا رەزونانس تۋدىردى. 23-ساۋىردە ۇكىمەت جۇلدە تولەمدەرىنە قاتىستى قاۋلى قابىلداپ، 25-ساۋىرگە قاراي تۋريزم جانە سپورت مينيسترلىگى پاريجدەگى مەدال يەگەرلەرىنە سىياقى اۋدارعان. سونىمەن قاتار الماتىدا دا شۋ شىققاننان كەيىن، مەدال يەگەرلەرىنە جەدەل تۇردە جاڭا پاتەرلەردىڭ كىلتى تابىستالدى.
