بەت-ءجۇزدى تۇمشالاۋعا تىيىم: ءى ءى م ءدىني كيىمدەردىڭ قاي تۇرىنە تىيىم سالىنعانىن ءتۇسىندىردى

استانا. KAZINFORM - ىشكى ىستەر مينيسترلىگى بەت-ءجۇزدى تۇمشالايتىن كيىمدەردى كيۋگە تىيىم سالۋ تۋرالى جاڭا ەرەجەلەردى ءتۇسىندىردى. زاڭنامالىق تۇزەتۋلەر 12 -شىلدەدە كۇشىنە ەندى.

ەندى قوعامدىق ورىنداردا ادامدى بەينەكامەرا ارقىلى تانۋ مۇمكىن بولماسا، بۇل ەرەجەبۇزۋشىلىق بولىپ سانالادى.

دەگەنمەن، بۇل شەكتەۋدىڭ ءبىرقاتار ەرەكشەلىگى بار. اتاپ ايتقاندا، زاڭ تالاپتارىن ورىنداۋ ءۇشىن، مەديتسينالىق ماقساتتا، توتەنشە جاعدايلار كەزىندە، اۋا رايى قولايسىز بولعاندا نەمەسە سپورتتىق جانە مادەني شارالارعا قاتىسقان كەزدە بەت-ءجۇزدى جاباتىن كيىم كيۋگە رۇقسات ەتىلەدى. حيدجاب سەكىلدى بەتتى جاپپايتىن ءدىني كيىمدەرگە دە بۇل تىيىم جۇرمەيدى.

- تىيىم تەك بەتىن تولىق جاۋىپ تۇراتىن جانە جەكە باسىن تانۋعا كەدەرگى كەلتىرەتىن كيىمدەرگە، سونىڭ ىشىندە بالاكلاۆالارعا، بەتپەردە مەن نيكابتارعا عانا قاتىستى. بۇل رەتتە حيدجاب، شەيلا، حيمار، ءال-ءاميرا جانە باسقا دا ءدىني كيىمدەردىڭ بەتتى جاپپايتىن ەلەمەنتتەرى وسى نورمانىڭ قولدانىسىنا جاتپايدى، - دەدى ق ر ءى ءى م اكىمشىلىك پوليتسيا كوميتەتىنىڭ اعا ينسپەكتورى ە. قيىقوۆ.

ەلجاس قيىقوۆ زاڭنامالىق تۇزەتۋلەردىڭ ماقساتى - ازاماتتاردىڭ قۇقىقتارى مەن بوستاندىقتارىنا، سونىڭ ىشىندە ءدىني سەنىم بوستاندىعىنا نۇقسان كەلتىرمەي، قوعامدىق قاۋىپسىزدىك پەن ءتارتىپتى، تۇلعالاردى سايكەستەندىرۋ ەكەنىن اتاپ ءوتتى.

مۇنداي شەكتەۋ ورتالىق ازيادا بۇرىننان بار. 2023 -جىلى وزبەكستاندا اتالعان شەكتەۋمەن مازمۇنداس تالاپ زاڭ اياسىندا قابىلداندى. وتكەن جىلى تاجىكستاندا ۇلتتىق مادەنيەتكە جات دەپ تانىلعان كيىمدەردى كيۋ مەن ساتۋعا زاڭ جۇزىندە شەكتەۋ قويىلدى. ال بيىل قىرعىزستان ادامنىڭ بەت-الپەتىن انىقتاۋعا مۇمكىندىك بەرمەيتىن كيىم كيۋگە تىيىم سالعان بولاتىن.

مينيسترلىكتىڭ حابارلاۋىنشا، جىل باسىنان بەرى بەينەباقىلاۋ كومەگىمەن 7 مىڭنان استام قىلمىستىق قۇقىقبۇزۋشىلىق، 400 مىڭعا جۋىق اكىمشىلىك قۇقىقبۇزۋشىلىق انىقتالعان.

بۇعان دەيىن بەتتى تولىق جابۋعا قاتىستى قازاقستان مۇسىلماندارى ءدىني باسقارماسى دا مالىمدەمە جاساعان ەدى.

اۆتور

ايجان سەرىكجان قىزى