بەسكە دەيىن ۇلگەر: قازاقستاندا مەكتەپ جاسىنا دەيىنگى بالالاردىڭ اتا-انالارىنا ارنالعان جاڭا موبيلدى قوسىمشا ىسكە قوسىلادى
استانا. قازاقپارات - قازاقستاندا مەكتەپ جاسىنا دەيىنگى بالالاردىڭ اتا-انالارىنا بالالاردى كۇتۋ جانە دامىتۋ بويىنشا كونسۋلتاتسيالىق كومەككە قول جەتكىزۋگە مۇمكىندىك بەرەتىن «بەسكە دەيىن ۇلگەر» موبيلدى قوسىمشاسى ىسكە قوسىلۋدا. بۇل تۋرالى وقۋ-اعارتۋ مينيسترلىگى وكىلدەرىمەن ورتالىق كوممۋنيكاتسيالار قىزمەتى الاڭىندا وتكەن بريفينگتە بەلگىلى بولدى.
«بەسكە دەيىن ۇلگەر» قوسىمشاسى اتا-انالارعا ءۇي جاعدايىندا بالالارعا دەنساۋلىق، تاماقتانۋ، تاربيە، داعدىلاردى دامىتۋ جانە بالالارمەن ءوزارا ارەكەتتەسۋ سياقتى ماڭىزدى ماسەلەلەر بويىنشا قولجەتىمدى ءارى تۇسىنىكتى كونتەنت ۇسىنادى. قوسىمشاداعى بارلىق ماتەريالدار نەيروبيولوگيالىق زەرتتەۋلەردىڭ عىلىمي دەرەكتەرىنە نەگىزدەلىپ ازىرلەنگەن، بۇل ولاردىڭ تيىمدىلىگى مەن پراكتيكالىق قۇندىلىعىن قامتاماسىز ەتەدى.
«قازىرگى ۋاقىتتا قوسىمشا پيلوتتىق رەجيمدە قاراعاندى، شىعىس قازاقستان، قىزىلوردا جانە اقتوبە وبلىستارىنداعى مەكتەپكە دەيىنگى ۇيىمداردا تەستىلەنۋدە. تولىق اۋقىمدا ىسكە قوسۋ قاراشا ايىنا جوسپارلانعان. سونداي- اق كونتەنت كونسۋلتاتسيالىق ورتالىقتاردا دا قولجەتىمدى بولادى»، - دەپ اتاپ ءوتتى مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى مانار اداموۆا.
اتا-انالار مەكتەپكە دەيىنگى جاستاعى بالالاردى تاربيەلەۋ جانە دامىتۋ ماسەلەلەرى بويىنشا تاۋلىك بويى ادىستەمەلىك جانە پسيحولوگيالىق قولداۋ الا الادى، بۇل وتباسىلاردا ۇيلەسىمدى اتموسفەرا قالىپتاستىرۋعا ىقپال ەتەدى.
