بەس وبلىس ءالى سۋ باسۋ اۋماعىندا تۇر

استانا. KAZINFORM - سۋ تاسقىنىنا بايلانىستى ەلىمىزدىڭ وڭىرلەرىندە جەرگىلىكتى اۋقىمداعى 20 توتەنشە جاعداي جاريالاندى. بۇل تۋرالى ۇكىمەت وتىرىسىندا توتەنشە جاعدايلار ۆيتسە-ءمينيسترى باۋىرجان سىزدىقوۆ ايتتى.

«مينيسترلىك سۋ تاسقىنى سالدارىن جويۋ بويىنشا ءىس-قيمىلداردى ۇيلەستىرۋدى جالعاسىپ جاتىر. مينيسترلىكتىڭ، اكىمدىكتەردىڭ، قورعانىس، ىشكى ىستەر مينيسترلىگى، ۇلتتىق ۇلان، ۇلتتىق قاۋىپسىزدىك كوميتەت بولىمشەلەرىنىڭ كۇشتەرى مەن قۇرالدارى جۇمىلدىرىلدى. ارەكەت ەتۋ جەدەل ساناتتا جۇزەگە اسىرىلۋدا. سۋ تاسقىنىڭ جاعدايى تۇراقتى - كۇردەلى. باتىس ايماقتاردا سۋ ازداپ تومەندەدى، ورتالىق، سولتۇستىك جانە شىعىس بولىكتەرىندە كەرىسىنشە وزەندەر دەڭگەيىنىڭ قارقىندى جوعارلاۋى بايقالادى. سۋ باسۋ ايماعىندا 5 وبلىستار قالۋدا، اكىمدىكتەرمەن جەرگىلىكتى اۋقىمداعى 20 توتەنشە جاعداي جاريالاندى»، - دەدى ۆيتسە-مينيستر.

ونىڭ اتاپ وتۋىنشە، اقتوبە، باتىس قازاقستان جانە قوستاناي وبلىستارىندا جاعداي ءالى دە كۇردەلى. بۇل جەرلەرگە دەرەۋ كۇشتەر مەن قۇرالدار جۇمىلدىرىلىپ، جىبەرىلدى. وڭىرلەردە اۆاريالىق-قۇتقارۋ جۇمىستارى جالعاسىپ جاتىر.

توتەنشە جاعدايلار ايماعىنان ەڭ الدىمەن مۇمكىندىگى شەكتەۋلى ادامدار، قارتتار، ايەلدەر جانە بالالار قاۋىپسىز جەرگە شىعارىلدى. سۋ تاسقىنى كەزىنەن باستاپ 15 مىڭ 786 ادام قۇتقارىلدى. ونىڭ ىشىندە 6 187 بالا بار. ادام شىعىنىنا جول بەرىلمەدى. قازىرگى تاڭدا ۋاقىتشا ورنالاستىرۋ پۋنكتتەرىندە 4113 ادام، ونىڭ ىشىندە 1911 بالا بار. ولار ءۇشىن بارلىق قاجەتتى جاعداي جاسالعان»، - دەدى باۋىرجان سىزدىقوۆ.