بەس بالانىڭ ءومىرىن قيعان ءجىتىقاراداعى ءورت: ءتىلسىز جاۋعا نە سەبەپ بولدى

استانا. KAZINFORM - قوستاناي وبلىسىنىڭ اكىمى قۇمار اقساقالوۆ ءجىتىقارا قالاسىندا ءبىر وتباسىنىڭ بەس بىردەي بالاسىنىڭ اجالىنا سەبەپ بولعان توتەنشە جاعدايعا تۇسىنىك بەردى.

- وكىنىشكە قاراي، بەس بالا قايتىس بولدى. بۇقارالىق اقپارات قۇرالدارىندا بالالاردىڭ جالعىز، قاراۋسىز قالعانى تۋرالى حابارلاندى. جالعىز ءتىرى قالعان ءۇيدىڭ ۇلكەن بالاسى تاڭەرتەڭ تۇرىپ پەشتى جاعۋعا تىرىسقان بولۋى كەرەك. ول پەشكە وتىنمەن بىرگە تاعى ءبىر نارسە سالعان، سول جارىلىسقا سەبەپ بولعان. قايعىلى وقيعادان كەيىن بىردەن بالالاردىڭ اناسىمەن كەزدەستىم، بىرنەشە كۇن ىشىندە وتباسىعا ەكى بولمەلى پاتەر ساتىپ الىندى، - دەدى قۇمار اقساقالوۆ ءوڭىردىڭ الەۋمەتتىك-ەكونوميكالىق دامۋى تۋرالى ەسەپ بەرۋ بارىسىندا.

ودان بولەك، اكىمنىڭ ايتۋىنشا، زارداپ شەككەن وتباسىنا قارجىلاي قولداۋ مەن پسيحولوگيالىق كومەك كورسەتىلدى.

- ەندى ءبىز ءۇشىن مۇنداي جاعدايدىڭ قايتالانباۋى ماڭىزدى. جىلۋ ماۋسىمى الدىندا جەرگىلىكتى اتقارۋشى ورگانداردىڭ قىزمەتكەرلەرى مەن ءورت قىزمەتى ماماندارى بارلىق ءۇيدى ارالاپ ءتۇتىن مۇرجاسىنىڭ، پەشتىڭ جاي- كۇيىن تەكسەرىپ شىقتى. جىلۋ كوزدەرىن قالاي دۇرىس پايدالانۋ كەرەكتىگى تۋرالى نۇسقاۋلىق بەرىلدى، - دەيدى ول.

ەسكە سالا كەتەيىك، قازاننىڭ باسىندا قوستاناي وبلىسى ءجىتىقارا قالاسىندا ءورت شىعىپ، بەس بالا قازا تاپقان ەدى.

كەيىن وبلىس اكىمى قۇمار اقساقالوۆ قايعىلى وقيعاعا قاتىستى مالىمدەمە جاسادى.

داۋلەت ىزتىلەۋ

اۆتور