بريتاندىق كينو سىيلىعىنىڭ لاۋرەاتتارى انىقتالدى

 استانا. KAZINFORM - لوندوندا بريتاندىق كينو اكادەمياسىنىڭ BAFTA سىيلىعىمەن ماراپاتتاۋ ءراسىمى ءوتتى، دەپ حابارلايدى BBC.

ەڭ ۇلكەن جەتىستىككە كريستوفەر نولاننىڭ «وپپەنگەيمەر» بلوكباستەرى جەتتى. ول ۇزدىك فيلم، ۇزدىك ەر ادام ءرولى جانە ۇزدىك رەجيسسەر سياقتى بارلىعى جەتى نوميناتسيانى جەڭىپ الدى.

نولاننىڭ قوس ازاماتتىعى بار: ۇلى بريتانيا جانە ا ق ش. ءبىراق كىمدە-كىم ونىڭ ءالى دە ءوزىنىڭ بريتاندىق تامىرىنا ادال بولىپ قالاتىنىنا كۇمانداناتىن بولسا، نولان مۇنى «ۇيگە ورالۋ» دەپ ايتقاننان كەيىن ونىڭ كۇمانى سەيىلەدى.

«وپپەنگەيمەردىڭ» پروديۋسەرى - نولاننىڭ ايەلى ەمما توماس. ول مۇنداي ءساتتى «ءتىپتى ەلەستەتە الماعانىن» ايتتى.

ەكىنشى ورىندا بەس جۇلدە بەرىلگەن باس ءرولدى ەمما ستوۋن سومداعان «باقىتسىزدار» فيلمى تۇر. ستوۋننىڭ ءوزى ۇزدىك ايەل ءرولى جۇلدەسىن جەڭىپ الدى.

«مۇددەلەر ايماعى» تاريحي دراماسى ءۇش BAFTA جۇلدەسىن جەڭىپ الدى. سونىڭ ىشىندە كورنەكتى بريتاندىق فيلم ءۇشىن جۇلدە بار.

كورەرمەندەر اراسىندا ەڭ تانىمال «باربي» مەن «سولتبەرن» ون ماراپاتقا ۇسىنىلعانىنا قاراماستان، جۇلدەدەن قۇر قالدى.

ماراپاتتاۋ راسىمىنە ۇلى بريتانيا كينواكادەمياسىنىڭ پرەزيدەنتى ۋەلس حانزاداسى ۋيليام دا قاتىستى.

ماراپاتتاۋ ءراسىمى مەن بانكەتتەردەن كەيىن جەڭىمپازدار مەن جەڭىلگەندەر شامامەن ەكى اپتادان كەيىن وتەتىن «وسكار» سىيلىعىن تابىستاۋ راسىمىنە دايىندالۋ ءۇشىن اتلانت مۇحيتىنىڭ ارعى بەتىنە اتتانادى.

اۆتور

زارينا تۋعانبايەۆا