بريتاندىق بارلاۋ قىزمەتىنىڭ بۇرىنعى باسشىسى ا ق ش-تىڭ يرانعا قاتىستى جوسپارىن باعالادى

استانا. KAZINFORM - بريتاندىق بارلاۋ قىزمەتى MI6-تىڭ بۇرىنعى باسشىسى دجون سوەرس تاياۋ شىعىستاعى شيەلەنىسكە قاتىستى پىكىر ءبىلدىردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ا ق ش- تىڭ قاقتىعىسقا تارتىلۋ ىقتيمالدىعى

ۇلى بريتانيانىڭ حالىقارالىق قاتىناستار جونىندەگى كورولدىك ينستيتۋتى - «چاتەم حاۋس» كونفەرەنسياسىندا سويلەگەن سوزىندە دجون سوەرس يزرايلدىڭ ارەكەتتەرى ا ق ش پەن ونىڭ وداقتاستارىن قاقتىعىسقا تارتۋى مۇمكىن ەكەنىن ايتىپ، مۇنىڭ سالدارى بولجاپ بولمايتىنىن اتاپ ءوتتى.

- يزرايلدىكتەر ءبىزدى قاقتىعىسقا تىكەلەي ارالاستىرعىسى كەلەدى. ونداعى ماقسات - يراننىڭ يادرولىق باعدارلاماسىن جويۋ. يزرايل يراننىڭ ۋراندى بايىتاتىن «فوردو» زاۋىتىن جويا المايدى. سەبەبى ولاردا مۇنداي قارۋ جوق. ونىڭ ۇستىنە «فوردو» ەڭ مىقتى قورعالعان نىسانداردىڭ ءبىرى، - دەدى سوەرس.

ونىڭ سوزىنشە، ا ق ش يراننىڭ يادرولىق نىساندارىنا سوققى بەرۋى ابدەن مۇمكىن. ولاي بولعان كۇندە ولار نەگىزىنەن ۋراندى بايىتاتىن جەراستى زاۋىتتارىن كوزدەيدى. ولاردىڭ قاتارىندا «فوردو»، ناتانزداعى نىسان جانە «كيركا تاۋى» دەپ اتالاتىن ورىندى اتاۋعا بولادى.

سوەرس يراننىڭ قۇپيا وبەكتىسى - «فوردونى» جويۋ تەك ا ق ش- تىڭ عانا قولىنان كەلەتىنىن ايتتى. سەبەبى ونداي قارۋ تەك ا ق ش- تا عانا بار. بۇل - قۇپيا بومبالاۋشىلارمەن جەتكىزىلەتىن بۋنكەرگە قارسى بومبالار.

- امەريكالىقتار بۇل نىسانداردىڭ بارلىعىنا سوققى بەرە الادى. ءبىراق كەز كەلگەن اسكەري وپەراتسيادا بەلگىلى ءبىر كۇمان بولادى، الدىن الا ناقتى بولجاۋ قيىن. ا ق ش بۇل ءىستى جۇزەگە اسىرا الادى، ءبىراق ولار 30 مىڭ فۋنتتىق ەكى نەمەسە ءۇش بومبانى ءبىر جەرگە ءدال تۇسىرە الادى دەپ تولىق سەنىممەن ايتۋعا بولمايدى. قاجەتتى تەرەڭدىككە جەتۋ ءۇشىن دالدىك اسا ماڭىزدى. سوندىقتان تاۋەكەل ءالى دە بار، - دەپ اتاپ ءوتتى بريتاندىق بارلاۋ قىزمەتىنىڭ بۇرىنعى باسشىسى.

ەندى نە بولادى؟

دجون سوەرستىڭ پىكىرىنشە، ا ق ش يراننىڭ ۋران بايىتۋ زاۋىتتارىنا سوققى جاسايتىن بولسا، تەگەران بۇنى جاۋاپسىز قالدىرمايدى. يران كەك الۋعا تىرىسادى، ال بۇل ءوز كەزەگىندە بۇكىل الەمدەگى امەريكالىق جانە يزرايلدىك نىساندارعا قاۋىپتى كۇشەيتەدى.

ۇلى بريتانيانىڭ ۇستانىمى

مۇنداي جاعدايدا ۇلى بريتانيا قالاي ارەكەت ەتپەك؟ دجون سوەرستىڭ پىكىرىنشە، ۇلى بريتانيا قاقتىعىسقا تىكەلەي ارالاسپاۋى كەرەك. كير ستارمەر جەتەكشىلىك ەتەتىن قازىرگى اكىمشىلىك تە وسىنداي ۇستانىمدا وتىرعان بولۋى كەرەك.

دەگەنمەن، ول ا ق ش- تىڭ ۇلى بريتانيادان ناقتى كومەك سۇراۋى مۇمكىن ەكەنىن جوققا شىعارمايدى. سوەرس ۇلى بريتانيا ا ق ش-قا يرانعا قارسى وپەراتسيا جۇرگىزۋ ءۇشىن ديەگو-گارسيا ارالىنداعى اسكەري بازانى پايدالانۋعا رۇقسات بەرۋى مۇمكىن ەكەنىن ايتتى.

- ەگەر امەريكالىق بومبالاۋشىلار سوققى جاسايتىن بولسا، ولار مۇنى ديەگو-گارسياداعى بازادان جاسايدى. ايتا كەتۋ كەرەك، ءبىز جۋىردا وسى بازانى پايدالانۋعا رۇقسات بەرەتىن ۇزاق مەرزىمدى كەلىسىمگە قول قويدىق، - دەپ قوستى ول.

وسىعان دەيىن يران داعدارىسى ا ق ش سەناتىنداعى داۋ-دامايدىڭ تاساسىندا قالعانى تۋرالى جازعان ەدىك.