بۇرىنعى ۆيتسە-مينيستر ەرلان قوجاعاپانوۆعا قاتىستى سوت ۇكىمى شىقتى
استانا. KAZINFORM - بۇگىن استانا قالاسىنىڭ قىلمىستىق ىستەر جونىندەگى اۋدانارالىق سوتى بۇرىنعى مادەنيەت جانە سپورت ۆيتسە- ءمينيسترى ەرلان قوجاعاپانوۆ پەن SUCCESS K اگەنتتىگىنىڭ باس ديرەكتورى ءلاززات كوككوزوۆاعا قاتىستى ءىس بويىنشا ۇكىم شىعاردى.
سوت ۇكىمى بويىنشا ە. قوجاعاپانوۆ ءۇش جىلعا باس بوستاندىعىنان ايىرىلدى. سونىمەن قاتار وعان مەملەكەتتىك قىزمەتتە جۇمىس ىستەۋىنە ءومىر بويىنا تىيىم سالىنىپ، مەملەكەتتىك نارگرادالاردان ايىرۋ تۋرالى شەشىم شىعارىلدى. قاماۋدا بولعان ۋاقىتى جالپى جازا مەرزىمىندە ەسكەرىلەدى.
ال ءلاززات كوككوزوۆا بەس جىلعا باس بوستاندىعىنان ايىرىلدى. ونىڭ دا قاماۋدا وتىرعان ۋاقىتى جازا مەرزىمىن ەسەپتەۋ كەزىندە ەسكەرىلدى.
سوت تۋريزم جانە سپورت مينيسترلىگىنىڭ مۇلىكتى وتەۋ تۋرالى تالاپ-ارىزىن ءىشىنارا قاناعاتتاندىردى. بۇل رەتتە، ەرلان قوجاعاپانوۆتان كەلتىرىلگەن شىعىندى ءوندىرۋ تۋرالى تالاپ قاناعاتتاندىرىلمادى. ال ءلاززات كوككوزوۆاعا 1 ميلليارد تەڭگەدەن استام ماتەريالدىق شىعىندى وتەۋ مىندەتى جۇكتەلدى.
ەسكە سالايىق، بىلتىر 1- ناۋرىزدا سىبايلاس جەمقورلىققا قارسى قىزمەت مادەنيەت جانە سپورت ەكس- ۆيتسە- ءمينيسترىن اۋىر جەمقورلىق قىلمىس جاسادى دەگەن كۇدىك بويىنشا ۇستادى.
انتيكوردىڭ اقپاراتىنشا، ول 2018 -جىلى پەتروپاۆل قالاسىندا قازاقستان رەسپۋبليكاسى مەن رەسەي فەدەراتسياسىنىڭ XV ءوڭىرارالىق ىنتىماقتاستىق فورۋمىنىڭ كورمەسىن ۇيىمداستىرۋ بويىنشا شارت جاساسۋدى قولداعان.
بيىل ناۋرىزدىڭ سوڭىندا انتيكور اتالعان ءىس بويىنشا تەرگەۋ امالدارى اياقتالعانىن حابارلادى. سونداي-اق سوت قورعاۋشى جانە ايىپتاۋشى تاراپتىڭ ءوتىنىشىن قاراستىرعاننان كەيىن قىلمىستىق ءىس بويىنشا ەلوردالىق باعالاۋشىلار پالاتاسىنىڭ مامانىن تارتۋ تۋرالى قاۋلى شىعاردى.
كەزەكتى سوت بارىسىندا ماماندار 2018 -جىلداعى فورۋمدى ۇيىمداستىرۋ جانە وتكىزۋ ءۇشىن ۇسىنىلعان تاۋارلار مەن قىزمەتتەردىڭ نارىقتىق قۇنىن باعالايتىنى ايتىلدى.
كەيىن ەرلان قوجاعاپانوۆتىڭ ءىسى بويىنشا 2018 -جىلعى فورۋمعا جۇمسالعان شىعىندى تەكسەرەتىن باعالاۋشى تاعايىندالدى.
