بۇرىنعى Jusan Bank مەملەكەتكە ءالى 950,2 ميلليارد تەڭگە قارىز

استانا. KAZINFORM - قارجى داعدارىسى كەزىندە مەملەكەتتەن قارجىلاي كومەك العان بانكتەردىڭ ءبارى الداعى 3-5 جىلدىڭ ىشىندە قارىزىن تۇگەل قايتارىپ بىتەدى.

تەك Alatau City Bank (بۇرىنعى Alatau City Bank - رەد.) قانا بۇل مەرزىمدە قارىزىن قايتارىپ ۇلگەرمەيتىنى بەلگىلى بولدى.

بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ءابىلقاسىموۆا ءماجىلىس دەپۋتاتىنىڭ سۇراعىنا بەرگەن جاۋابىندا ايتتى.

- بانكتەرگە بەرىلگەن مەملەكەتتىك كومەك تۋرالى ايتساق، قازىر 4 بانكتە 1,3 تريلليون تەڭگە مولشەرىندە مەملەكەت قاراجاتى بار. اتاپ ايتقاندا، ەۋرازيالىق بانكتە - 150 ميلليارد تەڭگە، ر ب ك بانكتە - 176,8 ميلليارد تەڭگە، Alatau City Bank-تە - 950,2 ميلليارد تەڭگە، Nur Bank-تە 46,8 ميلليارد تەڭگە بار، - دەدى اگەنتتىك باسشىسى.

سونداي-اق، ول اگەنتتىك 2022 -جىلدان باستاپ بانك زاڭناماسىنا وزگەرىستەر ەنگىزگەنىن ەسكە سالدى.

- بانكتەردىڭ مەملەكەتتەن العان كومەكتى تەزىرەك قايتارۋىنا باعىتتالعان جاڭا تالاپتار قويدىق. مەملەكەتتەن كومەك العان بانكتەردىڭ اكسيونەرلەرىنە ديۆيدەند الۋعا تىيىم سالدىق. وسى تىيىمنان كەيىن بانكتەر مەملەكەت الدىنداعى قارىزىن تەزىرەك قايتارا باستادى. 2023-2025 -جىلدار اراسىندا 526,9 ميلليارد تەڭگە مەزگىلىنەن بۇرىن قايتارىلدى. ونىڭ ىشىندە Halyq Bank مەملەكەتكە 250 ميلليارد تەڭگەنى تولىق قايتاردى. Alatau City Bank مەرزىمىنەن بۇرىن 150 ميلليارد تەڭگەنى ، بانك سەنتر كرەديت 60 ميلليارد تەڭگەنى تولىق قايتاردى. ر ب ك بانك 66,9 ميلليارد تەڭگەنى وتەدى. بۇل جۇمىستى ۇلتتىق بانكپەن بىرگە جالعاستىرىپ جاتىرمىز.

بيىلدان باستاپ مەملەكەت الدىندا كومەك قارىزى بار بانكتەرگە مينيمالدى رەزەرۆ تالابىن كوتەردىك. بانكتەر قالعان قارىزدارىن الداعى 3-5 جىلدىڭ ىشىندە قايتارادى، Alatau City Bank-تەن باسقاسى، - دەدى ءمادينا ءابىلقاسىموۆا.

ايتا كەتەيىك، ءدال قازىر ۇلتتىق بانك پەن قارجى نارىعىن دامىتۋ جانە رەتتەۋ اگەنتتىگى ماجىلىستە بانكتەر تۋرالى زاڭ جوباسى تانىستىرىپ جاتىر.

اۆتور

ەسىمجان ناقتىباي