بۇرىنعى ادىلەت ءمينيسترى مارات بەكەتايەۆ 9 جىلعا سوتتالدى
استانا. KAZINFORM - ەكس-ءمينيستردىڭ مۇلكى تاركىلەنىپ، 9 جىلعا باس بوستاندىعىنان ايىرىلدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ءمالىم ەتتى.
- بۇرىنعى ادىلەت ءمينيسترى مارات بەكەتايەۆ 9 جىلعا باس بوستاندىعىنان ايىرىلىپ، مۇلكى تاركىلەندى. ەكس-شەنەۋنىككە قاتىستى قىلمىستىق ءىس الاياقتىق، اسا ءىرى مولشەردە ۇرلىق جاساۋ، كاسىپكەرلىك قىزمەتكە زاڭسىز قاتىسۋ فاكتىسى بويىنشا تەرگەلدى، - دەدى دانيار بيگايداروۆ ۆەدومستۆودا وتكەن باسپا ءسوز ءماسليحاتىندا.
سونداي-اق اگەنتتىكتىڭ رەسمي وكىلى تەرگەۋ «قۇپيا» بەلگىسىمەن جۇرگىزىلگەندىكتەن، قىلمىستىق ءىستىڭ ءمان-جايى جاريالاۋعا جاتپايتىنىن ەسكەرتتى.
ايتا كەتسەك، بۇرىنعى ادىلەت ءمينيسترى مارات بەكەتايەۆتىڭ ءىسى سوتقا بيىل ناۋرىزدا ءتۇستى.
ەسكە سالايىق، بۇرىنعى ادىلەت ءمينيسترى 2023-جىلى قازاندا لاۋازىمدىق وكىلەتتىگىن اسىرا پايدالاندى دەگەن كۇدىكپەن ۇستالدى.
