بۇرىن زەرتتەۋدە كەزدەسپەگەن تىڭ دەرەك: سارايشىق قالاسىنان كونە كەسەنەنىڭ بولىگى تابىلدى

Фото: "Алматы" телеарнасы
Фото: "Алматы" телеарнасы

استانا. KAZINFORM - اتىراۋ وبلىسىنا قاراستى سارايشىق قالاسىنان كونە كەسەنەنىڭ بولىگى تابىلدى، - دەپ حابارلايدى «الماتى» تەلەارناسى.

عالىمدار سارى توپىراق استىنان شىققان نىسان بۇعان دەيىنگى زەرتتەۋلەردە كەزدەسپەگەن تىڭ دەرەك ەكەنىن ايتتى.

تىڭ دەرەكتى ارحەولوگتار كونە سارايشىق قالاسىنان قازبا جۇمىستارىن جۇرگىزۋ كەزىندە تاۋىپتى. كەسەنە ءدالىزى شامامەن 15-16-عاسىرعا جاتادى. كۇيدىرىلگەن كىرپىشتەن بەرىك ءارى ءساندى قالانعان كەسەنەنىڭ كۇمبەزى قيراعان ەكەن. ءبىراق قابىرگە كىرىپ-شىعاتىن جابىق ءدالىز سول قالپىندا ساقتالىپتى. ەسىگى وڭتۇستىك شىعىسقا قاراعان دروموستىڭ ۇزىندىعى – 170، ال بيىكتىگى - 60 سانتيمەتر. ارحەولوگ بۇل ءدالىزدىڭ جارتىلاي قازىلعان بولىگى ەكەنىن ايتتى.

«سارايشىق قالاسىندا وسىنداي كەسەنەلەر بۇرىن دا انىقتالعان، ءبىراق ولار قاتتى بۇلىنگەن بولاتىن. بۇل كەسەنەنىڭ ەرەكشەلىگى دروموسىنىڭ تولىق ساقتالۋىندا. وسىنداي ۇلگىدەگى كەسەنەلەردە بەلگىلى، قوعامداعى ستاتۋسى جوعارى ادامدار جەرلەنگەنى انىق»، - دەدى ارحەولوگ امانگەلدى زاينوۆ.

ارحەولوگتار قازبا جۇمىسىن ءۇش بولىككە ءبولىپ جۇرگىزىپتى. سول جۇمىستىڭ ناتيجەسىندە بۇل ماڭنان دالىزگە جالعاسقان كولەمدى ءقابىردىڭ قابىرعالارى دا تابىلدى.

«بۇل كەسەنەنى سالۋعا سارى جانە قىزىل كىرپىشتەر پايدالانىلعان. سارى كىرپىشتەر - التىن وردا ءداۋىرىنىڭ ەسكى كىرپىشتەرى، ال قىزىلى قۇرىلىس سالىناردا كۇيدىرىلىپ جاسالعانى انىق. بۇل - سارايشىقتاعى ەڭ سيرەك كەزدەسەتىن نىسان»، - دەدى ستۋدەنت ەراسىل ومىربەك.

سارايشىقتان تابىلعان تاريحي مۇرا بۇل عانا ەمەس. دروموستىڭ وڭتۇستىك بولىگىنەن شارۋاشىلىق بولمە دە انىقتالىپتى. وندا قىش قۇمىرالار مەن ساندىك بۇيىمدار جانە ورتا عاسىرلىق التىن وردا تيىندارى تابىلعان. ارحەولوگيالىق نىسان الداعى ۋاقىتتا تولىققاندى زەرتتەلمەك.

 

سوڭعى جاڭالىقتار