بەرىك ءابدىعالي ۇلى ۇلىتاۋ وبلىسىنىڭ اكىمى لاۋازىمىندا نەسىمەن ەستە قالدى

ەلىمىزدە ءۇش جاڭا ايماق قۇرىلعالى ەكى جىلدان استام ۋاقىت ءوتتى. ولاردىڭ اراسىندا ۇلىتاۋ وبلىسى دا بار. وڭىردە ءۇش قالا مەن ەكى اۋدان بار، جالپى 227 مىڭ ادام تۇرادى. ايماق باسشىسى بولىپ تۇرعان تۇسىندا بەرىك ءابدىعالي ۇلى نە ىستەي الدى، نەسىمەن ەستە قالدى؟ بۇل تۋرالى Kazinform اگەنتتىگى ءتىلشىسىنىڭ ماتەريالىنان وقي الاسىز.

بەرىك ءابدىعالي ۇلى 1971 -جىلى 18-قىركۇيەكتە قاراعاندى وبلىسىنىڭ رۋدنيك (قازىرگى جەزقازعان) كەنتىندە دۇنيەگە كەلگەن. ءبىلىمى بويىنشا تاريح جانە قوعامتانۋ پاندەرىنىڭ وقىتۋشىسى. 1994 -جىلى ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن.

وسىدان 35 جىل بۇرىن، 1989 -جىلى ەڭبەك جولىن قاراعاندى وبلىستىق بالالار كىتاپحاناسىندا كىتاپحاناشى قىزمەتىنەن باستاعان. الايدا، رەسمي دەرەككوزدەردە بەرىك ءابدىعالي ۇلىنىڭ مانسابى 1994 -جىلى ق ر پرەزيدەنتى جانىنداعى قازاقستاندىق ستراتەگيالىق زەرتتەۋلەر ينستيتۋتىندا باستالعانى جازىلعان.

ءار جىلدارى تەمىرتاۋ اكىمى، جەزقازعان جانە ارقالىق قالالارىنىڭ اكىمى، قاراعاندى وبلىسى اكىمىنىڭ ورىنباسارى قىزمەتتەرىن اتقاردى. سونداي-اق قازاقستان رەسپۋبليكاسى ءبىرىنشى ۆيتسە-پرەمەرىنىڭ كەڭەسشىسى، مادەنيەت جانە اقپارات ءمينيسترىنىڭ شتاتتان تىس كەڭەسشىسى بولىپ جۇمىس ىستەدى.

جەتىنشى شاقىرىلىمداعى قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولدى.

ول سونداي-اق ساياسي قۋعىن-سۇرگىن قۇرباندارىن تولىق اقتاۋ پروتسەسىنە بەلسەندى قاتىسۋىمەن جانە تۇركىستان لەگيونىنىڭ مۇشەلەرىن اقتاۋ جۇمىستارىمەن تانىمال.

عىلىمي ەڭبەكتەرىنە توقتالار بولساق، بەرىك ءابدىعالي ۇلىنىڭ نەگىزگى تاقىرىپتارى - تاريحي زەرتتەۋلەر. ول - قازاق جانە ورىس تىلدەرىندە جۇزدەن استام عىلىمي ەڭبەكتىڭ اۆتورى. ولاردىڭ ىشىندە «قازاقستاننىڭ كيەلى نىساندارى»، «جەلتوقسان. 1986» قۇجاتتار مەن ەستەلىكتەر جيناعى، «الاش اسكەرى»، «قازاق ميسسياسى»، «ساياسي سوزدىك» جانە ت. ب. بار.

ال ەندى ونىڭ ۇلىتاۋ وبلىسىنىڭ باسشىسى رەتىندە قول جەتكىزگەن جەتىستىكتەرىنە كەلەتىن بولساق، اۋىز تولتىرىپ ايتار نارسە از.

ەستەرىڭىزگە سالا كەتەيىك، وتكەن جىلدىڭ جەلتوقسانىندا Jibek joly تەلەارناسىنا بەرگەن سۇحباتىندا بەرىك ءابدىعالي ۇلى وبلىستاعى ءوندىرىس كاسىپورىندارى، ونداعى قاۋىپسىزدىك ماسەلەسى، ءوزى ەكى رەت شاحتاعا تۇسكەنى جايلى ايتقان ەدى.

وبلىس اكىمى ايماقتىڭ پروبلەمالارى تۋرالى دا ءجيى ايتقان بولاتىن. ولاردىڭ ىشىندە ەڭ وزەكتى جانە ەڭ اۋقىمدىلارى - سۋمەن، جىلۋمەن جابدىقتاۋ، جول قۇرىلىسى جانە كادر تاپشىلىعى. ول ۇلىتاۋ وبلىسىن ەلدىڭ ەكونوميكالىق جانە تۋريستىك ورتالىعىنا اينالدىرۋ جوسپارىن جاريا ەتكەن. الايدا ول ءۇشىن قىرۋار قارجىدان بولەك، ادامي رەسۋرستار دا قاجەت ەكەنى تىلگە تيەك ەتىلدى.

بەرىك ءابدىعالي ۇلى باسشىلىق ەتكەن كەزەڭدە، شىنى كەرەك، وبلىستا اۋىز تولتىرىپ ايتارلىق وزگەرىستەر بولعان جوق. ول جايلى ءتىپتى حالىق قالاۋلىلارى دا ايتىپ، رەنىش بىلدىرگەن.

وكىنىشكە قاراي، وسى ەكى جارىم جىلدا جاڭا وڭىردە ءتۇرلى پروبلەمالاردىڭ بەتى اشىلدى. مىسالى، انا مەن بالا ءولىمى كورسەتكىشىنىڭ جوعارى دەڭگەيى. مۇنى وبلىس اكىمى پەرزەنتحانا جوق دەپ ءتۇسىندىردى.

ول ازداي، اۋىل شارۋاشىلىعى سالاسىنا ءبىر ميللياردتان استام سۋبسيديا بەرىلگەنىنە قاراماستان، وڭىردە جاپپاي مال قىرىلعان.

ال كوكتەم كەلىسىمەن وبلىس باسشىلىعى سۋ تاسقىنىمەن كۇرەسۋگە ءماجبۇر بولدى.

ءدۇيىم جۇرت كوپتەن كۇتكەن جولدارى دا قالپىنا كەلتىرىلەر ەمەس.

ارينە، قارجى پروبلەمالارى دا بارشىلىق. كوكتەمدە ق ر جوعارى اۋديتورلىق پالاتاسى ۇلىتاۋ وبلىسىندا مەملەكەتتىك اۋديت جۇرگىزىپ، 4,1 ميلليارد تەڭگەگە قارجىلىق زاڭ بۇزۋشىلىقتار انىقتاعان.

ءبىراق جاقسى جاڭالىقتار دا بولدى. ماسەلەن. بيىل 33 وتباسى قونىس تويىن تويلادى.

بۇگىن بەرىك ءابدىعالي ۇلى ۇلىتاۋ وبلىسىنىڭ اكىمى لاۋازىمىنان بوساتىلدى.

ونىڭ ورنىنا مەملەكەت باسشىسىنىڭ جارلىعىمەن ۇلىتاۋ وبلىسىنىڭ اكىمى لاۋازىمىنا داستان اداي ۇلى رىسپەكوۆ تاعايىندالدى.

اۆتور

ايزادا اگيلبايەۆا