برونح دەمىكپەسى: قىستا اۋرۋدىڭ اسقىنۋىنان قالاي قورعانۋعا بولادى

برونح دەمىكپەسى - تىنىس جولدارىنىڭ ەڭ ءجيى كەزدەسەتىن اۋرۋى. سوزىلمالى وكپە اۋرۋى كەز كەلگەن جاستا بولۋى مۇمكىن. دەمىكپەنىڭ ەمى جوق، ءبىراق باقىلاۋعا بولادى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا الەمدە برونح دەمىكپەسى دياگنوزى قويىلعان 262 ميلليونعا جۋىق ناۋقاس بار. ونىڭ ىشىندە قازاقستان حالقىنىڭ %10 ى دەمىكپەگە شالدىققان. 11-جەلتوقسان - دۇنيەجۇزىلىك برونح دەمىكپەسىنە قارسى كۇرەس كۇنى بولدى. وسى ورايدا، Kazinform ءتىلشىسى الماتىداعى ق ر پرەزيدەنتى ءىس باسقارماسىنا قاراستى ورتالىق كلينيكالىق اۋرۋحاناسىنىڭ اللەرگولوگ-دارىگەرى زارينا جاكىبايەۆامەن سۇحباتتاسقان بولاتىن.

- برونح دەمىكپەسىنىڭ بەلگىلەرى مەن ەمى تۋرالى كوبىرەك بىلگىمىز كەلەدى. نەگىزگى بەلگىلەرى قانداي؟

- برونح دەمىكپەسى - سوزىلمالى وكپە اۋرۋى. كەۋدەدەگى بىتەلۋمەن سيپاتتالاتىن دەرت. تىنىس الۋ جولدارى تارىلىپ، ءىسىنىپ، دەم الۋدى قيىنداتادى جانە جوتەلدى قوزدىرادى، دەم شىعارعاندا ىسقىرىق جانە ەنتىگۋ پايدا بولادى. تۇنشىعۋ ۇستاماسى نەگىزىنەن تۇندە نەمەسە تاڭعى ساعات 5-6 شاماسىندا بولادى. سونداي-اق تىنىس الۋ قىسقارىپ، اۋا جەتىسپەۋشىلىگى بايقالادى. مىنە، دەمىكپەنى وسى بەلگىلەرى ارقىلى ادەتتەگى جوتەلدەن اجىراتۋعا بولادى.

- ورتالىق كلينيكالىق اۋرۋحاناسىنىڭ دارىگەرلەرى دەمىكپە اۋرۋىن قالاي انىقتاپ، ەمدەيدى؟

- جاڭا ايتىلعان بەلگىلەر ناۋقاستا العاش رەت بايقالسا، ونى دەنساۋلىق جاعدايىنا قاراي اجىراتامىز، ياعني انامنەزىن ەسەپكە الامىز، اللەرگيالىق انامنەزگە نازار اۋدارامىز. سودان كەيىن اۋرۋدى انىقتاۋ ءۇشىن زەرتحانالىق جانە اسپاپتىق تەكسەرۋ جۇرگىزەمىز. سپيروگرافيالىق پروتسەدۋرا جۇرگىزىلەدى، فارماكولوگيالىق سىناق بۇگىندە «برونح دەمىكپەسى» دياگنوزىن قويۋعا مۇمكىندىك بەرەدى. سونىمەن قاتار وكپەگە كومپيۋتەرلىك توموگرافيا جاساپ، كەۋدەنى رەنتگەنگە تۇسىرەمىز. زەرتحانالىق تەكسەرۋگە قاننىڭ جالپى اناليزى مەن قاقىرىقتى تالداۋ كىرەدى. زەرتحانالىق تەكسەرۋدىڭ ناتيجەسى بويىنشا ءبىز قانداي دا ءبىر اللەرگەننىڭ بار ەكەنىنە كۇدىكتەنسەك، وندا بەلگىلى ءبىر اللەرگەندەرگە ارنايى يممۋنوگلوبۋلين ە ءۇشىن تالداۋ جاسايمىز. وسى زەرتتەۋلەردىڭ بارلىعى ناقتى دياگنوز قويۋعا مۇمكىندىك بەرەدى.

ەمدەۋگە كەلەتىن بولساق، ءدال دياگنوزدان كەيىن ءبىز نەگىزگى تەراپيانى تاڭدايمىز. بۇگىندە بۇل - دارىلىك ينگالياتورلار. وسىنداي دياگنوز قويىلعان ناۋقاستار كەيىن وزدەرىنىڭ ەمحاناسىنا بارىپ تىركەلۋى كەرەك. برونح دەمىكپەسى مىندەتتى الەۋمەتتىك مەديتسينالىق ساقتاندىرۋ اياسىندا تەگىن كورسەتىلەتىن اۋرۋلاردىڭ تىزىمىنە ەنگىزىلگەن.

- دەمىكپەدەن ءبىرجولا جازىلىپ كەتۋ مۇمكىن بە؟

- دەمىكپەنىڭ ەمى جوق، سەبەبى ول - جازىلمايتىن سوزىلمالى اۋرۋ، ءبىراق ونى باقىلاۋعا بولادى. ول ءۇشىن اللەرگولوگتىڭ بارلىق ۇسىنىستارىن ورىنداپ، نەگىزگى تەراپيالىق ءدارى-دارمەكتەردى ۇنەمى قابىلداۋ كەرەك.

- دەمىكپە اۋرۋى قالاي جۇعادى؟

- اۋرۋدىڭ پايدا بولۋىنىڭ نەگىزگى فاكتورى - گەنەتيكالىق بەيىمدىلىك، ياعني دەمىكپە تۇقىم قۋالايدى. اتا-اناسىنىڭ بىرەۋى دەمىكپەمەن اۋىراتىن بالانىڭ دەمىكپەگە شالدىعۋ قاۋپى - %30. ال اناسى مەن اكەسى دە اۋىرسا ىقتيمالدىعى - 70 پايىز. اۋرۋ كەز كەلگەن جاستا پايدا بولۋى مۇمكىن.

- دەمىكپە قاي كەزدە كۇشەيەدى؟

- برونح دەمىكپەسىمەن اۋىراتىن ادامدار ءۇشىن كۇز-قىس مەزگىلى قيىن بولۋى مۇمكىن. كەيبىرەۋلەر ءۇشىن اۋرۋدىڭ قوزۋ كەزەڭدەرى كوكتەم مەن جازدا. ولار ءارتۇرلى فاكتورلاردىڭ اسەرىنەن تۋىنداۋى مۇمكىن.

- بۇل اۋرۋ ءجيى كەزدەسە مە؟

- برونح دەمىكپەسى - كەڭ تارالعان اۋرۋلاردىڭ ءبىرى. دۇنيەجۇزى بويىنشا 300 ميلليونعا جۋىق ادامعا وسى دياگنوز قويىلعان. ءبىزدىڭ ەلدە ەرەسەكتەردىڭ %5 دا جانە بالالاردىڭ %10 دا كەزدەسەدى، ياعني بالالار ءجيى اۋىرادى.

- دەمىكپەدەن قالاي قورعانۋعا بولادى؟ ءبىراز كەڭەس بەرسەڭىز؟

- برونح دەمىكپەسىنىڭ قاۋپىن ازايتۋ ءۇشىن كەيبىر ەرەجەلەردى قاتاڭ ساقتاۋ كەرەك. پاتسيەنتتەرگە سۋىقتان جانە اللەرگيا تۋدىراتىن نارسەلەردەن اۋلاق بولۋدى، تەمەكى شەگۋدى توقتاتۋدى، ديەتانى ساقتاۋدى، ءۇي-جايلاردى تازا ۇستاۋدى جانە ۇنەمى ىلعالدى تازالاۋ جۇرگىزۋدى ۇسىنامىز. سونداي-اق، مۇنداي دياگنوزى بار ناۋقاستارعا دارىگەر تاعايىنداعان ەمدى ەلەپ، نەگىزگى تەراپيانى قابىلداۋعا كەڭەس بەرەمىز. ەمدەۋ تۇراقتى بولۋى كەرەك.

- برونح دەمىكپەسىنەن ادام ءولۋى مۇمكىن بە؟

- ەگەر سيمپتومدار اۋىر بولسا جانە دەمىكپەمەن اۋىراتىن ادامدارعا دەر كەزىندە كومەك كورسەتىلمەسە، اۋرۋ ولىمگە اكەلۋى مۇمكىن. ەگەر دارىگەردىڭ بارلىق ۇسىنىستارىن ورىنداسا، ادام وسى دياگنوزبەن ۇزاق ءومىر سۇرە الادى.

- راقمەت!

اۆتور

الما مۇقانوۆا