بۇركىتشى قىز تۇركىستاندا مۇراجاي اشىپ، جاستاردى قۇسبەگىلىك ونەرگە باۋليدى
استانا. KAZINFORM - الەم تانىعان بۇركىتشى قىز تۇركىستاننىڭ ءتۋريزمىن دامىتۋعا ءوز ۇلەسىن قوسپاق.
ايشولپان نۇرعايىپ وڭىردە قۇسبەگىلىك مۇراجايىن اشىپ، جاستاردى اتادان ميراس بولىپ كەلە جاتقان بەكزادا ونەرگە باۋليتىن بولدى. 13 جاسىندا ەسىمى التى قىردان اسقان قازاق قىزىنىڭ باستاماسىمەن ءتىلشىمىز تانىسىپ كەلدى.
ايشولپاننىڭ اتىن ايگىلەگەن - امەريكالىق رەجيسسەر وتتو بەلل تۇسىرگەن كينوتۋىندى. الەمنىڭ 30 ەلىندە كورسەتىلگەن. وسى فيلمنەن كەيىن موڭعوليادا دۇنيەگە كەلگەن بۇركىتشى قىزدىڭ ءومىرى ادام تانىماستاي وزگەردى. نيۋ- يوركتە ايشولپان «ازيانىڭ باتىر قىزى» دەگەن ماراپاتقا يە بولدى.
ايتۋىنشا، قۇسبەگىلىك - قاننان دارىعان ونەر.
- كىشكەنتاي كەزىمنەن، دۇنيەگە كەلگەننەن باستاپ، بۇركىتتى كورىپ ءوستىم، قىزىقتىم. اعام بۇركىتشى بولدى. ول كىسى اسكەرگە كەتكەن سوڭ بۇركىتىن ماعان قالدىرىپ كەتتى. سەگىز جاسىمنان باستاپ قۇسبەگىلىكپەن اينالىستىم. كينوم ارقىلى الەمنىڭ 32 مەملەكەتىندە بولدىم. سول جەردە كينومدى كورسەتتىم. قازاق ەلىنە كەلگەندە باسقاشا سەزىم بيلەدى. قاتتى قۋانىشتان، قوبالجۋدان جىلادىم. ويتكەنى، وتانىمىزدى كورىپ، ساعىنىشىمدى كىشكەنە بولسا دا باستىم، - دەيدى ايشولپان نۇرعايىپ.
الەمگە تانىمال قۇسبەگى قىز وتكەن جىلى اتاجۇرتى - قازاقستانعا وتباسىمەن قونىس اۋدارعان.
شەتەلدىڭ ۇزدىك ۋنيۆەرسيتەتتەرى گرانت ۇسىنىپ، شاقىرسا دا، بۇركىتشى قىز وتاندىق ۋنيۆەرسيتەتتى تاڭداپتى. ءسويتىپ، «قازاق ءتىلى مەن ادەبيەتى» ماماندىعى بويىنشا ءبىلىم العان.
قازىر قۇسبەگىلىكپەن قاتار، ۇستازدىق قىزمەتتى دە قاتار الىپ ءجۇر.
- ايشولپاننىڭ ەرەكشەلىگى - ونىڭ جانى تاپ- تازا. مەن ويلايمىن، تابيعاتپەن ەتەنە جۇرگەن ادام عوي. تابيعات ەشقاشان دا جالعان سويلەمەيدى. تابيعات - تازالىق. تاۋدا جۇرگەن ادام بيىك بولادى. ايشولپاننىڭ باسقا قىزداردان ايىرماشىلعى وسى - تاپ- تازا، ءموپ- ءمولدىر تابيعاتتىڭ ءوزى سياقتى، - دەيدى قۇسبەگىنىڭ ۇستازى بايان كەرىمبەكوۆا.
ايشولپان ۇلتتىق بولمىسىمىزبەن بىتە قايناسقان قۇندىلىقتاردى دامىتۋ ارمانىم ەدى دەيدى. تۇركىستانعا كەلۋ سەبەبى دە وسى.
قازىر ول ەتنواۋىل كەشەنىندە ارنايى مۋزەي اشىپ، قۇسبەگىلىك ونەردى دارىپتەمەك.
مۋزەيدەن بولەك، مۇندا ۇلتتىق كيىم كيىپ، اتقا، تۇيەگە ءمىنىپ، بۇركىتتى قولعا الىپ، تازىنى ەرتىپ، سۋرەتكە تۇسۋگە بولادى.
ايتا كەتەيىك، تۇركىستان وبلىسىندا ەتنوس وكىلدەرى ۇلتتىق ونەردى ۇلىقتادى.
