بەردەنوۆكە جاسالعان قاستاندىق: ساراپشى شىمكەنتتەگى قىلمىستىڭ ءوسۋ سەبەپتەرىن اتادى

شىمكەنت. KAZINFORM - قالا اكىمىنىڭ ورىنباسارىنا جاسالعان قارۋلى شابۋىل، سونداي-اق قالادا قىلمىس دەڭگەيىنىڭ كۇردەلەنە ءتۇسۋى كوپشىلىكتى الاڭداتىپ وتىر. بۇل جۇيەلى ءارى دەر كەزىندە شارالار قابىلداۋ قاجەتتىگىن كورسەتەدى.

ق ر باس پروكۋرورى بەرىك اسىلوۆتىڭ مالىمدەۋىنشە، جىلدىڭ العاشقى ءۇش ايىندا ەلدەگى قىلمىس دەڭگەيى تومەندەگەن. الايدا وسى وڭ ءۇردىس اياسىندا شىمكەنت ەرەكشە كوزگە ءتۇسىپ وتىر - مۇندا قىلمىس 25,8 پايىزعا ارتقان.

شىمكەنت قالاسى اكىمىنىڭ ورىنباسارى رۋسلان بەردەنوۆكە جاسالعان رەزونانستى شابۋىلدان كەيىن قاۋىپسىزدىك ماسەلەسى قايتادان قوعام نازارىنا شىقتى. قالالىق اكىمدىك ماڭىنداعى وقيعا قىلمىستىق تەرگەۋدىڭ نىسانىنا عانا اينالىپ قويماي، مەگاپوليس تۇرعىندارىنىڭ قانشالىقتى قورعالعانىن جانە نەگە شىمكەنت قىلمىس ءوسىمى ەڭ جوعارى وڭىرلەردىڭ قاتارىنا ەنگەنى جونىندەگى تالقىلاۋعا سەبەپ بولدى.

وسى جاعدايدى سارالاپ، داعدارىستان شىعۋدىڭ ىقتيمال جولدارىن انىقتاۋ ءۇشىن كوپشىلىككە بەلگىلى ادۆوكات جانە قوعام قايراتكەرى ەۆگەني ياۆورسكيدەن پىكىر سۇرادىق.

- سوڭعى جىلدارى شىمكەنتتە قىلمىستىڭ ءوسۋى بايقالادى. بۇگىنگى تاڭدا جاعداي قانشالىقتى كۇردەلى؟

- شىنىندا دا، شىمكەنت الاڭداتارلىق جاعدايعا تاپ بولدى - قىلمىستاردىڭ، سونىڭ ىشىندە كۇش قولدانۋمەن جاسالاتىن قىلمىستاردىڭ سانى ارتىپ كەلەدى. 2024- 2025 -جىلدارعا ارنالعان رەسمي دەرەكتەر تولىق جاريالانباعانىمەن، قالا اكىمىنىڭ ورىنباسارى رۋسلان بەردەنوۆكە جاسالعان قارۋلى شابۋىل سياقتى وقيعالار وزىنەن-ءوزى كوپ نارسەنى اڭعارتادى. بۇل - كوشە قىلمىسىنىڭ ايقىن كورىنىسى.

- ءسىزدىڭ ويىڭىزشا، بۇل ءوسىمنىڭ ارتىندا نە تۇر؟

- بۇل جاعدايدىڭ نەگىزىندە الەۋمەتتىك فاكتورلاردىڭ جيىنتىعى جاتىر. ەڭ الدىمەن، بۇل - قارقىندى دامىپ كەلە جاتقان مەگاپوليستەردەگى ەكونوميكالىق تەڭسىزدىك. بۇعان زاڭسىز قارۋ اينالىمىن باقىلاۋدىڭ السىزدىگىن قوسساق - وتە قاۋىپتى ۇيلەسىم پايدا بولادى.

- رۋسلان بەردەنوۆكە قاتىستى وقيعا قوعامدا ۇلكەن رەزونانس تۋدىردى. بۇل جاعداي حالىقتى نەگە سونشا الاڭداتتى؟

- سەبەبى بۇل - جوعارى لاۋازىمدى شەنەۋنىككە جاسالعان شابۋىل، ياعني قورعاۋعا بارلىق مۇمكىندىگى بار ادامعا باعىتتالعان ارەكەت. ەگەر، ونىڭ ءوزى قورعالماعان بولسا، وندا قاراپايىم حالىق تۋرالى نە ايتۋعا بولادى؟ قاۋىپسىزدىك قىزمەتى، ارنايى جاعدايلار نەمەسە ارتىقشىلىقتارى جوق تۇرعىندار ءۇشىن بۇل - ۇلكەن الاڭداۋشىلىق تۋعىزادى.

- بۇگىنگى وقيعالار اياسىندا شىمكەنتتىڭ قانداي بەينەسى قالىپتاسىپ جاتىر؟

- تاريحي تۇرعىدا شىمكەنت الماتى نەمەسە استانامەن سالىستىرعاندا، تىنىش قالا سانالاتىن. الايدا بۇل پىكىر قازىر وزگەرۋدە. ادامدار توناۋ، ۇرلىق، شابۋىل سياقتى وقيعالارعا ءجيى تاپ بولۋدا. قالا حالقى 1,2 ميلليوننان اسادى جانە بيلىك جەدەل ءارى ويلاستىرىلعان شارالار قابىلداماسا، قىلمىستىق احۋالدىڭ ودان ءارى ناشارلاۋىمەن بەتپە-بەت كەلۋىمىز مۇمكىن.

- قالا اكىمىنىڭ ورىنباسارىنا جاسالعان شابۋىل مەن قىلمىسكەر قولدانعان قارۋ تۋرالى نە ايتاسىز؟

- پوليتسيا مالىمەتى بويىنشا، قىلمىسكەر «سايگا-12» قارۋىن قولدانعان - بۇل كالاشنيكوۆ اۆتوماتىنىڭ ازاماتتىق نۇسقاسى، اڭشىلار اراسىندا تانىمال. قارۋ كوزدەرىنىڭ قايدان كەلگەنى تۋرالى سۇراق ءالى اشىق كۇيىندە قالۋدا. قازاقستاندا قارۋ-جاراق تىركەۋ مەن ليتسەنزيالاۋعا قاتىستى قاتاڭ ءتارتىپ ورناتىلعانىمەن، كولەڭكەلى نارىق بار جانە ول ءالى دە ناقتى باقىلاۋعا الىنباعان سەكىلدى.

- حالىق اراسىندا قارۋدىڭ سانى تۋرالى مالىمەت بار ما؟

- شىمكەنت بويىنشا ناقتى ستاتيستيكا جوق، ءبىراق جالپى ۇلتتىق كورسەتكىشتەرگە سۇيەنسەك، ءار 100 مىڭ ادامعا شامامەن 15-20 مىڭ تىركەلگەن قارۋ تۇسەدى دەپ بولجاۋعا بولادى. ال زاڭسىز قارۋدىڭ كولەمىن باعالاۋ قيىن، دەگەنمەن ونىڭ قولدانىلۋ جاعدايلارى ماسەلەنىڭ اۋقىمدىلىعىن كورسەتەدى.

- قانداي قادامدار جاعدايدى وزگەرتە الادى؟

- مەن ءتورت باسىم باعىتتى ۇسىنار ەدىم:

1. پاترۋلدەۋ جۇمىسىن كۇشەيتۋ قاجەت، اسىرەسە كەشكى جانە تۇنگى ۋاقىتتا.

2. زاڭسىز قارۋ اينالىمىمەن كۇرەسۋ كەرەك. بۇل جەردە جۇيەلى تەكسەرۋلەر قاجەت.

3. قىلمىستىڭ قوزعاۋشى كۇشى ءجيى بولاتىن ەكونوميكالىق تەڭسىزدىكتى تومەندەتۋگە باعىتتالعان الەۋمەتتىك باعدارلامالار.

4. ازاماتتاردىڭ بيلىككە دەگەن سەنىمىن قالپىنا كەلتىرۋ ءۇشىن قىلمىس ستاتيستيكاسىن اشىق ءارى تۇراقتى جۇرگىزۋ كەرەك.

- ەگەر بۇل شارالاردى قابىلداماساق، قانداي قاۋىپتەر تۋىنداۋى مۇمكىن؟

- شىمكەنت - ەلدىڭ ماڭىزدى مادەني جانە ەكونوميكالىق ورتالىعى. الايدا، ەگەر شۇعىل شارالار قابىلدانباسا، قالا قاۋىپسىز جانە ءومىر سۇرۋگە قولايلى ورىن رەتىندە ءوزىنىڭ بەدەلىن جوعالتۋى مۇمكىن. بەردەنوۆكە جاسالعان شابۋىل - بۇل تەك جەكە تراگەديا عانا ەمەس، سونىمەن قاتار قالا بولاشاعى تۋرالى قوعامدىق ديالوگقا سەبەپ بولدى. وكىنىشكە وراي، ءبىزدىڭ ازاماتتار مادەني قۇندىلىقتارىن جوعالتىپ بارادى.

ايتا كەتەيىك، كەشە شىمكەنتتە قالا اكىمىنىڭ ورىنباسارى رۋسلان بەردەنوۆكە قاستاندىق جاسالدى. كۇدىكتى شەنەۋنىككە قاراي ءۇش رەت وق اتقان. وقيعا سالدارىنان اكىمدىك قىزمەتكەرى جاراقات الىپ، اۋرۋحاناعا جەتكىزىلدى.

ال، بۇگىن دارىگەرلەر رۋسلان بەردەنوۆتىڭ ومىرىنە قاۋىپ ءتونىپ تۇرماعانىن ايتتى. جاسالعان وتا دا ءساتتى ءوتتى.

اۆتور

قايرات زاينيشيەۆ